ក្រសួងសុខាភិបាលអំពាវនាវឲ្យប្រុងប្រយ័ត្នការពុលចំណីអាហារអំឡុងបុណ្យភ្ជុំបិណ្ឌ
ក្រសួងសុខាភិបាលបានអំពាវនាវឲ្យប្រជាជនមានការប្រុងប្រយ័ត្នចំពោះការពុលចំណីអាហារនៅអំឡុងបុណ្យភ្ជុំបិណ្ឌពីថ្ងៃទី២៥ខែកញ្ញា ដល់ថ្ងៃទី១០ខែតុលា។ នេះបើតាមសេចក្តីប្រកាសមួយកាលពីម្សិលមិញ។ ការពុលចំណីអាហារ រាប់ទាំងការពុលស្រាផងនោះ ត្រូវបានក្រសួងចាត់ទុកថា នៅតែជាបញ្ហាដ៏សំខាន់ ដែលត្រូវយកចិត្តទុកដាក់ ទាំងក្នុងប្រទេសកំពុងអភិវឌ្ឍន៍ និងប្រទេសអភិវឌ្ឍន៍។
ចុះផ្សាយនៅថ្ងៃ៖
ស្តាប់ - ០១:៣៧
បើតាមក្រសួងសុខាភិបាល ការពុលអាហារ ដែលនាំឲ្យក្អូត រាក និងការពុលស្រា គឺបង្កឡើងដោយសារចំណីអាហារគ្មានអនាម័យ ឬទឹកកខ្វក់ ដែលមានមេរោគ បាក់តេរី វីរុសប៉ារ៉ាស៊ីត ឬសារធាតុគីមី។ មូលហេតុដែលចំណីអាហារទាំងនោះមានបញ្ហាដល់សុខភាពអ្នកបរិភោគ គឺដោយសារតែការរៀបចំអាហារមិនមានអនាម័យល្អ ទាំងចំណីអាហារ ទាំងអ្នករៀបចំទុកដាក់ និងការចែកចាយចំណីអាហារ។ ដោយឡែក ការពុលស្រា គឺមកពីការផលិត ឬបិតស្រា ដែលមិនមានលក្ខណៈបច្ចេកទេសត្រឹមត្រូវ។ នេះបើតាមក្រសួងដដែល។
តាមការពិសោធន៍របស់ក្រសួងសុខាភិបាលបានរកឃើញថា ស្រាស ឬស្រាថ្នាំ ដែលបង្កឲ្យអ្នកផឹកពុលកន្លងមក គឺមានសារធាតុមេតាណុលកម្រិតខ្ពស់ ដែលធ្វើឲ្យពុល ហើយក្រសួងបានប្រាប់ឲ្យបញ្ឈប់ជាបន្ទាន់ នូវការបរិភោគស្រាស ឬស្រាថ្នាំ ដែលទិញពីប្រភពមិនច្បាស់លាស់ និងដែលផលិតដោយគ្មានការត្រួតពិនិត្យត្រឹមត្រូវ។
សូមរំឮកថា យ៉ាងហោចណាស់មនុស្សចំនួន១៣នាក់បានស្លាប់ជាបន្តបន្ទាប់គ្នានិងរាប់រយនាក់ទៀតមានអាការៈពុល នៅខេត្តក្រចេះកាលពីអំឡុងខែឧសភាឆ្នាំ២០១៨នេះ ដោយក្រសួងសុខាភិបាលអះអាងថាមកពីការពុលស្រាស។
យ៉ាងណាក៏ដោយ ក្នុងសេចក្តីអំពាវនាវនៅថ្ងៃទី២៥ខែកញ្ញា ក្រសួងសុខាភិបាលបានលើកឡើងថា ទោះបីជារដ្ឋាភិបាលនៃបណ្តាប្រទេសនានាលើពិភពលោកបាននិងកំពុងធ្វើឲ្យប្រសើរឡើងនូវសុវត្ថិភាពនៃការផ្គត់ផ្គង់ស្បៀងអាហារក៏ដោយ ប៉ុន្តែការកើតឡើងនៃការពុលអាហារ នៅតែជាបញ្ហាយ៉ាងសំខាន់ទាំងក្នុងប្រទេសកំពុងអភិវឌ្ឍន៍ និងប្រទេសអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ