គ.ជ.ប ប្ដូរនីតិវិធីដោះស្រាយបណ្ដឹង
គណៈកម្មាធិការជាតិរៀបចំការបោះឆ្នោតគ.ជ.ប បានសម្រេចប្ដូរនីតិវិធីដោះស្រាយបណ្ដឹងពីសវនាការជាសាធារណៈទៅជាសវនាការសង្ខេបចាប់ពីថ្ងៃទី១៩មករានេះ។ ក្នុងន័យនេះគ.ជ.ប ក៏ពិនិត្យទៅលើប្រភេទនៃពាក្យបណ្ដឹងដែរ ប្រសិនបណ្ដឹងនោះទាក់ទងនឹងច្បាប់ដែលមានចែងស្រាប់គ.ជ.ប នឹងដោះស្រាយតាមរយៈសវនាការសង្ខេប។ ប៉ុន្តែប្រសិនបើបណ្ដឹងនោះទាក់ទងអង្គហេតុដែលត្រូវការព័ត៌មានបន្ថែមនឹងដោះស្រាយតាមរយៈសវនាការសាធារណៈ។
ចុះផ្សាយនៅថ្ងៃ៖
ស្តាប់ - ០១:៥១
ការសម្រេចប្ដូរនីតិវិធីដោះស្រាយបណ្ដឹងរបស់គ.ជ.ប ពីសវនាការសាធារណៈទៅជាសវនាការសង្ខេបត្រូវបានគ.ជ.បលើកបង្ហាញនៅក្នុងសន្និសីទកាសែតស្ដីពីការដោះស្រាយបណ្ដឹងតវ៉ា បណ្ដឹងជំទាស់ ពាក់ព័ន្ធនឹងបញ្ជីបោះឆ្នោតដំបូងនៅព្រឹកថ្ងៃទី១៩មករានេះ។ ហើយនីតិវិធីដោះស្រាយបណ្ដឹងតាមរយៈសវនាការសង្ខេបនឹងចាប់អនុវត្តនៅថ្ងៃទី១៩មករានេះទៅលើពាក្យបណ្ដឹងចំនួន២៣។
លោក ហង្ស ពុទ្ធា អ្នកនាំពាក្យគជប បានគូសបញ្ជាក់ថា ប្រសិនបើសវនាការសង្ខេបដោះស្រាយតែទៅលើសំណុំរឿងពាក់ព័ន្ធអង្គច្បាប់នោះនឹងមានតម្លាភាព។ ប៉ុន្តែប្រសិនបើបណ្ដឹងនោះទាក់ទងអង្គហេតុដែលចាំបាច់ត្រូវការស៊ើបអង្កេតនិងរកព័ត៌មានបន្ថែមគឺគ.ជ.ប ត្រូវតែជំនុំជម្រះតាមរយៈសវនាការជាសាធារណៈវិញ។ ចំពោះសវនាការសង្ខេបដែលដោះស្រាយលើបណ្ដឹងចំនួន២៣នៅថ្ងៃទី១៩មករានេះ លោកពុទ្ធារំពឹងថានឹងទទួលបានលទ្ធផលខ្លះ។
សូមបញ្ជាក់ថា តាមរយៈសវនាការជាសាធារណៈនៅថ្ងៃ១៨មករា គ.ជ.ប បានជំនុំជម្រះទៅពាក្យបណ្ដឹងចំនួន១៦ដែលជាបណ្ដឹងជំទាស់សុំលុបឈ្មោះអ្នកចុះឈ្មោះបោះឆ្នោតចំនួន២០០នាក់ចេញពីបញ្ជីឈ្មោះបោះឆ្នោតដំបូង។ ការដោះស្រាយដែលបានអូសបន្លាយរហូតដល់ម៉ោង១១យប់ ក្រុមប្រឹក្សាជំនុំជម្រះគ.ជ.ប បានសម្រេចរក្សាទុកឈ្មោះអ្នកបោះឆ្នោតទាំង២០០នាក់ក្នុងបញ្ជីឈ្មោះបោះឆ្នោតដំបូងដដែល។ គ.ជ.បក៏បានបើកផ្លូវឲ្យគ្រប់ភាគីពាក់ព័ន្ធមិនពេញចិត្តនឹងសេចក្ដីសម្រេចនេះ ប្ដឹងជំទាស់ទៅក្រុមប្រឹក្សាធម្មនុញ្ញក្នុងរយៈពេល៥ថ្ងៃយ៉ាងយូរ។
គិតត្រឹមថ្ងៃទី១៨មករា គ.ជ.ប ទទួលបានបណ្ដឹងសរុបចំនួន១៤៧បណ្ដឹង។ ដោះស្រាយបានចំនួន៣៩បណ្ដឹង ។ តាមរយៈសវនាការជាសាធារណៈបីថ្ងៃកន្លងមកនេះ ដែលការជំនុំជម្រះត្រូវបានបិទបញ្ចប់ដល់យប់ជ្រៅនោះ គ.ជ.ប នៅមិនទាន់បានលុបឈ្មោះប្រជាពលរដ្ឋណាម្នាក់ចេញពីបញ្ជីឈ្មោះបោះឆ្នោតដំបូងនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ