ក្រសួងសុខាភិបាលចេញប្រកាសផាកពិន័យអ្នកជក់បារីនៅទីសាធារណៈចំនួន២ម៉ឺនរៀល
«ជនណាជក់បារីនៅកន្លែងហាមឃាត់ត្រូវពិន័យ២ម៉ឺនរៀល»នេះគឺជាសារព្រមានរបស់ក្រសួងសុខាភិបាលតាមរយៈប្រកាសចុះថ្ងៃទី១៨ឧសភា ដែលតម្រូវឲ្យអ្នកប្រកបរបរលក់ដូរ កន្លែងធ្វើការ និង កន្លែងសាធារណៈផ្សេងៗ ត្រូវបិទស្លាកបម្រាមនៃការហាមការជក់ឬការបង្ហុយផ្សែងផលិតផលថ្នាំ ជក់។ ក្នុងនោះម្ចាស់អាជីវកម្មដែល មិនអនុវត្តតាមប្រកាសរបស់ក្រសួងពួកគេនឹងទទួលការផាកពិន័យចំនួន៥ ម៉ឺនរៀល។
ចុះផ្សាយនៅថ្ងៃ៖
ស្តាប់ - ០២:១៤
ប្រកាសស្ដីពីការដាក់ស្លាកបម្រាមនៃការហាមជក់ឬបង្ហុយផ្សែងផលិតផលថ្នាំជក់នៅទីសាធារណៈចុះថ្ងៃទី១៨ឧសភា មានគោលបំណងដើម្បីការពារសុខមាលភាពរបស់ប្រជាជនពីផលប៉ះពាល់នៃផលិតផលថ្នាំជក់។ ក្រសួងសុខាភិបាលកំណត់ឲ្យបិទស្លាកបម្រាមឲ្យមើលឃើញច្បាស់ ដូចជា កន្លែងចេញចូល កន្លែងទទួលភ្ញៀវ បន្ទប់ទឹកជាដើម។
ក្នុងនោះក្រសួងសុខាភិបាលតម្រូវឲ្យម្ចាស់អាជីវកម្មឬកន្លែងប្រកបរបរផ្សេងត្រូវដាក់បម្រាមដោយសសេរថា«ហាមជក់បារី ឬ NO SMOKING»ដោយអមជាមួយនឹងសញ្ញាបម្រាមដែលមានរូបភាពបារីមួយដើមនៅក្នុងរង្វង់ក្រហមនិងមានបន្ទាត់ក្រហមមួយគូសចំអង្កត់ផ្ចិតបញ្ឆិតពីខាងលើនៃផ្នែកខាងឆ្វេងមកខាងក្រោមផ្នែកខាងស្ដាំ ។ នៅលើបម្រាមនោះទៀតសោតត្រូវដាក់សារព្រមានថាជនណាជក់បារីនៅកន្លែងហាមឃាត់ត្រូវពិន័យ២ម៉ឺនរៀល។
អ្វីជាការកត់សម្គាល់បម្រាមនៃការហាមជក់បារីនេះត្រូវបានម្ចាស់អាជីវកម្មឬកន្លែងប្រកបរបរមួយចំនួនអនុវត្តរួចហើយប៉ុន្តែមិនទទួលបានប្រសិទ្ធិភាព។ លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាជឿជាក់ថា ប្រកាសស្ដីពីការបិទបម្រាមហាមជក់បារីនេះនឹងទទួលបានប្រសិទ្ធិភាពខ្ពស់ព្រោះនេះជាវិធានការសកលដែលគ្រប់ប្រទេសគេនាំគ្នាអនុវត្ត។ ហើយម្យ៉ាងទៀតប្រសិនបើម្ចាស់អាជីវកម្មមិនអនុវត្តពួកគេនឹងទទួលរងការផាកពិន័យចំនួន៥ម៉ឺនរៀលដូចគ្នានឹងអ្នកជក់ដែលរងការផាកពិន័យចំនួន២ម៉ឺនរៀល។
សូមបញ្ជាក់ថា ប្រកាសស្ដីពីការដាក់ស្លាកបម្រាមនៃការហាមការជក់ឬការបង្ហុយផ្សែងផលិត ផលថ្នាំជក់ធ្វើឡើងដោយតាមអនុក្រឹត្យស្ដីពីវិធានការហាមជក់ឬបង្ហុយផ្សែងផលិតផលថ្នាំជក់នៅកន្លែងធ្វើការឬកន្លែងសាធារណៈដែលអនុម័តដោយគណៈរដ្ឋមន្រ្តីកាលពីខែមិនាឆ្នាំ២០១៦នេះ។
សូមបញ្ជាក់ថា ប្រជាជនកម្ពុជាជិត ១ម៉ឺននាក់ ក្នុងចំណោមប្រជាជន ៦លាននាក់ នៅលើពិភពលោក បានស្លាប់ជារៀងរាល់ឆ្នាំ ដោយសារការប្រើប្រាស់ថ្នាំជក់។ ក្នុងនោះ ក៏មានអ្នកស្លាប់ដោយសារការស្រូបផ្សែងបារី ៦សែននាក់ផងដែរ។ ទឹកប្រាក់ ១០០លានដុល្លា ក៏ត្រូវបានចំណាយសំរាប់ទិញបារី នៅកម្ពុជា ហើយការចំណាយសម្រាប់ព្យាបាល និងថែទាំជំងឺ ដែលបណ្តាលមកពីថ្នាំជក់ គឺមានទំហំធំជាងការចំណាយលើការទិញបារី។ ដូច្នេះការដំឡើងពន្ធថ្នាំជក់ត្រូវគេរំពឹងថា អាចជួយកាត់បន្ថយ បញ្ហាទាំងនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ