NOCC៖ ឆ្នាំ២០១៤ គឺជាឆ្នាំប្រវត្តិសាស្ត្រនៃចលនាកីឡាអូឡាំពិកកម្ពុជា
គណៈកម្មាធិការជាតិអូឡាំពិកកម្ពុជា (NOCC) បានបើកធ្វើមហាសន្និបាតប្រចាំឆ្នាំរបស់ខ្លួន នៅថ្ងៃព្រហស្បតិ៍នេះ ដើម្បីពិនិត្យមើលឡើងវិញពីសកម្មភាពការងារប្រចាំឆ្នាំរបស់ខ្លួន និងលើកទិសដៅសម្រាប់ឆ្នាំ២០១៥។ មហាសន្និបាត បានរៀបចំធ្វើឡើងនៅឯទីស្នាក់ការគណៈកម្មាធិការជាតិអូឡាំពិកកម្ពុជា ដោយមានការអញ្ជើញចូលរួមពីសមាជិកប្រតិបត្តិនិងសហព័ន្ធកីឡាជាតិទាំងអស់នៅកម្ពុជា។ មហាសន្និបាតបានចាត់ទុកថា ឆ្នាំ២០១៤ គឺជាឆ្នាំកំណត់ត្រាប្រវត្តិសាស្ត្រមួយ នៃចលនាកីឡាអូឡាំពិកកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៩
“ឆ្នាំ២០១៤ គឺជាឆ្នាំកំណត់ត្រាប្រវត្តិសាស្ត្រនៃជោគជ័យចលនាកីឡាអូឡាំពិកកម្ពុជា ក៏ដូចជាវិស័យកីឡាជាតិ” ។ នេះគឺជាសេចក្តីសន្និដ្ឋាននៅក្នុងរបាយការណ៍មហាសន្និបាតគណៈកម្មាធិការជាតិអូឡាំពិកកម្ពុជា ដែលបានរៀបចំធ្វើឡើងនៅថ្ងៃទី២៦ខែកុម្ភៈ នៅឯទីស្នាក់ការគណៈកម្មាធិការជាតិអូឡាំពិកកម្ពុជា។ ជាឆ្នាំប្រវត្តិសាស្ត្រ ដោយយោងទៅលើសមិទ្ធផលជោគជ័យ នៃការដណ្តើមបានមេដាយមាសជាលើកដំបូងក្នុងរយៈពេល៦០ឆ្នាំ ពីការប្រកួតកីឡាទ្វីបអាស៊ីលើកទី១៧ (Asian Games) នៅទីក្រុងអ៊ីនឆ័នប្រទេសកូរ៉េខាងត្បូង កាលពីខែតុលា តាមរយៈកីឡាការិនីតេក្វាន់ដូ ស៊ន សៀវម៉ីនិងការដណ្តើមបានមេដាយសំរិទ្ធជាលើកដំបូងដែរ ពីការប្រកួតកីឡាឆ្នេរខ្សាច់ប្រចាំទ្វីបអាស៊ីលើកទី៤ (Asian beach Games 2014) នៅទីក្រុងភូកេតប្រទេសថៃ តាមរយៈកីឡាការិនី នី សំណាង កាលពីខែវិច្ឆិការកន្លងទៅ។ មហាសន្និបាត ក៏បានចាត់ទុកដែរថា ឆ្នាំ២០១៤ គឺជាឆ្នាំនៃរបត់កំណែទម្រង់លើកដំបូង នៃរបបគ្រប់គ្រងវិស័យកីឡាជាតិ និងសហព័ន្ធកីឡាជាតិនៅកម្ពុជា។
លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា ក៍បានថ្លែងកើតសរសើរដែរ ទៅដល់សហព័ន្ធកីឡាជាតិជាច្រើនទៀត ដែលបានដណ្តើមមេដាយមាស ប្រាក់ និងសំរិទ្ធ ពីការប្រកួតកីឡាស៊ីហ្គេមលើកទី២៧នៅប្រទេសមីយ៉ាន់ម៉ាកាលពីខែធ្នូឆ្នាំ២០១៣ ដែលកាលណោះ កម្ពុជាដណ្ដើមបានមេដាយមាស៨ ប្រាក់១១ និង សំរឹទ្ធ ២៨ គ្រឿង។
ជាមួយនឹងមោទនភាពនឹងជោគជ័យក្នុងឆ្នាំ២០១៤កន្លងទៅ មហាសន្និបាតគណៈកម្មាធិការជាតិអូឡាំពិកកម្ពុជាក៍បានដាក់ផែនការ៩ចំណុច សំរាប់អនុវត្តន៍បន្តឆ្នាំ២០១៥ និងយុទ្ធសាស្ត្រ៥ជំហាន ដើម្បីដណ្តើមមេដាយពីរខ្ទង់ ពីការប្រកួតកីឡាស៊ីហ្គេម (Sea Games) លើកទី២៨ ដែលនឹងប្រារព្ធធ្វើឡើង នៅឯប្រទេសសិង្ហបុរីក្នុងខែមិថុនាឆ្នាំ២០១៥នេះ។ ហើយអ្វីដែលជាមហិច្ឆតាធំជាងនេះទៅទៀត គឺការបន្តគ្រប់គ្រងដឹកនាំសក្ដានុពលភាពរបស់កីឡាការិនី ស៊ន សៀវម៉ី ឆ្ពោះទៅដណ្តើម មេដាយពីការប្រកួតកីឡាអូឡាំពិកឆ្នាំ២០១៦ នៅទីក្រុងរីយ៉ូ ( Rio) ប្រទេសប្រេស៊ីល។
ក្រៅពីការលើកឡើងពីសមិទ្ធផល និងលើកទិសដៅសំរាប់ឆ្នាំ២០១៥ មហាសន្និបាតក៍បានប្រកាសតែងតាំង លោក ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្ម និងហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ លោក ជា ច័ន្ទបរិបូរណ៍ រដ្ឋលេខាធិការនៃក្រសួងព័ត៌មាន និងលោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា ជាទីប្រឹក្សាគណៈកម្មាធិការជាតិអូឡាំពិកកម្ពុជា បន្ថែមលើសមាសភាពដឹកនាំសព្វថ្ងៃផងដែរ។
បច្ចុប្បន្ន គណៈកម្មាធិការជាតិអូឡាំពិកកម្ពុជាមានសហព័ន្ធកីឡាជាតិជាសមាជិកចំនួន៤៤ ក្នុងនោះសហព័ន្ធកីឡាជាតិក្របខណ្ឌអូឡាំពិកមានចំនួន២៣ និងសហព័ន្ធកីឡាជាតិមិនអូឡាំពិកចំនួន២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ