អតីតតំណាងរាស្ត្រCNRP ស្នើឲ្យដោះលែងសហការីកំពុងជាប់ឃុំមុនការបោះឆ្នោត
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិ នឹងដាក់លិខិតទៅកាន់ពន្ធនាគារនៅថ្ងៃព្រហស្បតិ៍នេះ ដើម្បីចូលជួបអតីតសហការីធ្លាប់រួមការងារជាមួយគ្នា មុនការបោះឆ្នោតជាតិថ្ងៃទី២៩កក្កដា។ ទន្ទឹមនឹងគម្រោងសុំជួបអតីតមិត្តរួមការងារ លោក អ៊ូ ច័ន្ទរ័ត្ន ក៏បានធ្វើការអំពាវនាវដាច់ដោយឡែក ឲ្យមានការដោះលែងអតីតសហការីរបស់ខ្លួន រួមមាន៖ លោក អ៊ុំ សំអាត លោក មាជ សុវណ្ណរ៉ា និងអ្នកឯទៀតមុនការបោះឆ្នោតដែរ។
ចុះផ្សាយនៅថ្ងៃ៖
ស្តាប់ - ០២:២១
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិបានថ្លែងប្រាប់វិទ្យុបារាំងនៅថ្ងៃព្រហស្បតិ៍ទី០៥កក្កដានេះថាហេតុដែលរូបលោកនិងសហការីឯទៀត ចង់ចូលជួបអតីតមិត្តរួមការងារឲ្យបានមុនការបោះឆ្នោតថ្ងៃទី២៩កក្កដា ក៏ដោយសារតែរយៈពេលជិតមួយឆ្នាំក្រោយការរំលាយគណបក្សសង្គ្រោះជាតិ លោកផ្ទាល់មិនទាន់បានជួបប្រាស្រ័យទាក់ទងសួរសុខទុក្ខអ្នកជាប់ឃុំឡើយ។ ការជួបសួរសុខទុក្ខជាផ្នែកមួយសំខាន់ដែលបញ្ជាក់ឲ្យឃើញថា ពួកគេមិនឯកាឡើយ។ នេះបើតាមលោក អ៊ូ ច័ន្ទរ័ត្ន។
បើតាមលោក អ៊ូ ច័ន្ទរ័ត្ន នេះជាលើកទី៣ហើយ ដែលលោកស្នើសុំជួបអ្នកជាប់ឃុំ តែមិនទទួលបានការអនុញ្ញាតពីអគ្គនាយកដ្ឋានពន្ធនាគារឡើយ ក្រោមហេតុផលផ្សេងៗ។ ទន្ទឹមនឹងការដាក់លិខិតស្នើសុំជួបអ្នកជាប់ឃុំជាថ្មីនេះ លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិ ក៏បានអំពាវនាវដាច់ឡែក ឲ្យរដ្ឋាភិបាលដោះលែងអ្នកជាប់ឃុំឲ្យបានមុនការបោះឆ្នោត។ អ្នកជាប់ឃុំទាំងនោះមានជាអាទិ៍៖ លោក អ៊ុំ សំអាន ត្រូវបានឃុំខ្លួននៅក្នុងសំណុំរឿងព្រំដែន, លោក មាជ សុវណ្ណរ៉ា និងសកម្មជនជាយុវជន១១នាក់របស់អតីតគណបក្សសង្គ្រោះជាតិត្រូវបានឃុំខ្លួននៅក្នុងសំណុំរឿងបាតុកម្មរំដោះទីលានប្រជាធិបតេយ្យកាលពីឆ្នាំ២០១៤។ ហើយត្រូវបានតុលាការក្រុងភ្នំពេញកាត់ទោសកាលពីខែកក្កដា ឆ្នាំ២០១៥ ឲ្យជាប់ពន្ធនាគារក្នុងម្នាក់ចាប់ពី៧ទៅ២០ឆ្នាំ។
សម្រាប់លោក អ៊ូ ច័ន្ទរ័ត្ន រដ្ឋាភិបាលមិនគួរបន្តឃុំខ្លួនពួកគេទៀតទេព្រោះពួកគេម្នាក់ៗបានអនុវត្តទោសយ៉ាងហោចណាស់ក៏បាន៣ទៅ៤ឆ្នាំរួចហើយ។ ការឃុំខ្លួននេះបានជះឥទ្ធិពលដល់ជីវភាពក្រុមគ្រួសាររបស់សកម្មជនដែលជាយុវជន និងបានប៉ះពាល់ដល់ធនធានមនុស្សរបស់កម្ពុជា។
ឆ្លើយតបនឹងការលើកឡើងដូច្នេះ លោក សុខ ឥសាន អ្នកនាំពាក្យគណបក្សកាន់អំណាចបានគូសបញ្ជាក់ថា លទ្ធភាពនៃការដោះលែងអ្នកជាប់ឃុំមុនការបោះឆ្នោតគឺជារឿងមិនអាចទៅរួចទេ។ ហើយក៏គ្មានប្រទេសណាធ្វើការដោះលែងអ្នកទោស និងអ្នកជាប់ចោទនោះដែរ។ ដូច្នេះពួកគេមានតែបន្តជាប់ឃុំទៅតាមការកំណត់របស់តុលាការ។ នេះបើតាមលោក សុខ ឥសាន អ្នកនាំពាក្យគណបក្សប្រជាជនកម្ពុជា។
គួរកត់សម្គាល់ថា ក្រៅពីការទាមទារឲ្យដោះលែងលោក អ៊ុំ សំអាន ក៏ដូចជាលោក មាជ សុវណ្ណារ៉ា និងសកម្មជនចំនួន១១នាក់ តួអង្គលោក កឹម សុខា ក៏មានការទទូចទៅរដ្ឋាភិបាលឲ្យធ្វើការដោះលែងជាបន្ទាន់នៅមុនការបោះឆ្នោតដែរ។ តែជារឿយៗ ការទាមទារនេះគ្មានឥទ្ធិពលទៅលើរដ្ឋាភិបាលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ