នាយករដ្ឋមន្រ្តី ឯកភាពការធ្វើកំណែទម្រង់ការគ្រប់គ្រងរដ្ឋបាលនៅថ្នាក់ ក្រុង និងស្រុក
ប្រមុខរដ្ឋាភិបាលនៅថ្ងៃទី២៩មករានេះ បានឯកភាពទៅនឹងសំណើ ក្រសួងមហាផ្ទៃកាលពីថ្ងៃទី១៥មករា ស្តីពីការធ្វើកំណែទម្រង់ការគ្រប់គ្រងរដ្ឋបាលនៅថ្នាក់ក្រុង និងស្រុក។ ការឯកភាពលើកំណែទម្រង់គ្រប់គ្រងរដ្ឋបាលនេះ គឺជាការបើកផ្លូវឲ្យក្រសួងមហាផ្ទៃ លុបចោលការិយាល័យជំនាញរបស់ក្រសួង ស្ថាប័ននៅថ្នាក់ ក្រុង ស្រុក។ ដែលនេះជាចំណុចមួយស្ថិតក្នុងចំណោមគោលការណ៍ជាច្រើនទៀតដែលត្រូវធ្វើកំណែទម្រង់ចាប់ពីថ្ងៃយល់ព្រមនេះតទៅ។
ចុះផ្សាយនៅថ្ងៃ៖
ស្តាប់ - ០២:១១
លុបចោលការិយាល័យជំនាញរបស់ក្រសួង ស្ថាប័ននៅថ្នាក់ក្រុង ស្រុក ដោយត្រូវជំនួសមកវិញនូវការធ្វើសមាហរណកម្មការិយាល័យជំនាញទាំងនោះទៅក្នុងរចនាសម្ព័ន្ធគ្រប់គ្រងរបស់រដ្ឋបាលក្រុង ស្រុក។ នេះគឺជាការប្រកាសរបស់ក្រសួងមហាផ្ទៃកាលពីថ្ងៃ១៥មករា ដែលមានការយល់ព្រមពីលោកនាយករដ្ឋមន្ត្រី ហ៊ុន សែន ហើយទើបមានការផ្សព្វផ្សាយនៅថ្ងៃនេះ។
ក្នុងការធ្វើសមាហរណកម្មការិយាល័យជំនាញនេះ រចនាសម្ព័ន្ធគ្រប់គ្រងថ្មី របស់រដ្ឋបាលក្រុង ស្រុកត្រូវបង្កើតជាអង្គភាពឬការិយាល័យចង្កោមវិស័យ សម្រាប់វិស័យមួយចំនួនដែលពាក់ព័ន្ធដូចជាៈ វិស័យសេដ្ឋកិច្ច និងសង្គមកិច្ច ដើម្បីធានាដល់ការកាត់បន្ថយបន្ទុកចំណាយ និងពង្រឹងរចនាសម្ព័ន្ធស្ថាប័ន។ ប៉ុន្តែយ៉ាងណាក៏ដោយ ចំពោះវិស័យជាអាទិភាពដូចជា ការិយាល័យអប់រំ សុខាភិបាល និងនគរូបនីយកម្ម នៅតែដាក់ជាអង្គភាពដាច់ដោយឡែកៗពីគ្នាដដែល។
ជាការកត់សម្គាល់រាល់ធនធានដែលធ្លាប់តែប្រើប្រាស់នៅថ្នាក់ការិយាល័យត្រូវផ្ទេរនិងដាក់នៅក្រោមការគ្រប់គ្រង នៅថ្នាក់រដ្ឋបាលក្រុង ស្រុក ដោយក្នុងនោះរួមមានៈ ផ្ទេរមុខងារ ផ្ទេរធនធានហិរញ្ញវត្ថុទ្រព្យសម្បត្តិ និងផ្ទេរបុគ្គលិកដែលកំពុងបម្រើការងារនៅតាមការិយាល័យជំនាញ ទៅឱ្យរដ្ឋបាលក្រុង ស្រុក។
ក្នុងនោះក្រសួងមហាផ្ទៃបានរំឭក ឲ្យអង្គភាពមួយចំនួនដែលត្រូវរៀបចំថ្មីនៅថ្នាក់ក្រុង ស្រុក ត្រូវដំឡើងឋានៈឱ្យបានសមស្របទៅនឹងទំហំការងារ និងការទទួលខុសត្រូវក្នុងការផ្តល់សេវាដោយផ្ទាល់ជូនប្រជាពលរដ្ឋ។
រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាក់នៅក្នុងលិខិតចុះថ្ងៃទី១៥មករា ថា ការសម្រេចរៀបចំឡើងវិញនូវរចនាសម្ព័ន្ធ និងប្រព័ន្ធគ្រប់គ្រងនៅថ្នាក់ក្រុង ដើម្បីធានាដល់ការលើកកម្ពស់ប្រសិទ្ធភាពការបំពេញតួនាទី និងការទទួលខុសត្រូវរបស់រដ្ឋបាលក្រុង ស្រុកក្នុងនាមជារដ្ឋបាលមូលដ្ឋានក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាសាទរចំពោះការធ្វើកំណែទម្រង់គ្រប់គ្រងរដ្ឋបាលនេះ។ សាទរក៏ព្រោះតែកន្លងមកលោកមើលឃើញថា ការិយាល័យរបស់មន្ទីរនីមួយៗមានតែបុគ្គលិកតែគ្មានការងារសម្រាប់ធ្វើ។ ទន្ទឹមនឹងការសាទរនេះលោក រងចាំមើលពីប្រសិទ្ធភាពការងារ និងការផ្ដល់សេវាជូនពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ