លោក ហ៊ុន សែន រំឭកប្រាប់អាជ្ញាធរខេត្តព្រៃវែង មិនឲ្យពលរដ្ឋជួលដីតាមព្រំដែន
លោក ហ៊ុន សែន នាយករដ្ឋមន្ដ្រីកម្ពុជា បានរំឭកប្រាប់អាជ្ញាធរខេត្តព្រៃវែងថា មិនត្រូវអនុញ្ញាតឲ្យពលរដ្ឋជួលដីតាមព្រំដែនឡើយ។ នេះគឺជាការលើកឡើងរបស់ប្រមុខរដ្ឋាភិបាលកម្ពុជា នៅក្នុងពិធីជួបសំណេះសំណាលជាមួយអាជ្ញាធរខេត្តព្រៃវែងកាលពីម្សិលមិញ។ បញ្ហាសន្តិសុខ សណ្ដាប់ធ្នាប់ និងសេវាសាធារណៈ ក៏ត្រូវបានលើកឡើងនៅក្នុងជំនួបនេះដែរ។
ចុះផ្សាយនៅថ្ងៃ៖
ស្តាប់ - ០២:១៩
អាជ្ញាធរខេត្តត្រូវសហការល្អជាមួយអាជ្ញាធរវៀតណាម ដើម្បីជួយឲ្យពលរដ្ឋងាយស្រួលរកស៊ីជាមួយគ្នា ហើយលើលពីនេះ មិនត្រូវអនុញ្ញាតឲ្យពលរដ្ឋខ្មែរ ជួលដីនៅតាមព្រំដែនឡើយ។ នេះគឺជាខ្លឹមសារនៃការលើកឡើងរបស់ប្រមុខរដ្ឋាភិបាលកម្ពុជា នៅក្នុងជំនួបសំណេះសំណាលជាមួយមន្ដ្រីរាជការ និងកងកម្លាំងប្រដាប់អាវុធក្នុងខេត្តព្រៃវែង នៅថ្ងៃទី១០កុម្ភៈ នាខេត្តព្រៃវែង។
សូមជម្រាបថា នេះមិនមែនជាលើកទី១ទេ ដែល លោក ហ៊ុន សែន ហាមពលរដ្ឋមិនឲ្យជួលដីនៅតាមព្រំដែន។ នៅចុងឆ្នាំ២០១៥ រដ្ឋាភិបាលកម្ពុជាធ្លាប់បានចេញសារាចរណ៍ណែនាំឲ្យបញ្ឈប់សកម្មភាពជួលដីនៅព្រំដែន ទៅឲ្យប្រទេសជិតខាងទាំងអស់ ដើម្បីជៀសវាងកុំឲ្យលំបាកក្នុងការគ្រប់គ្រង និងដែលអាចបង្កឲ្យមានភាពស្មុគស្មាញនានា។ អ្នកតាមដានស្ថានការណ៍សង្គមខ្មែរ ចាត់ទុកការអំពាវនាវនិងចំណាត់ការនេះ ថាជាឆន្ទៈវិជ្ជមានរបស់រដ្ឋាភិបាល ប៉ុន្តែវានៅមិនទាន់មានប្រសិទ្ធភាពគ្រប់គ្រាន់ទេ។
ក្រៅពីរំឭកអាជ្ញាធរពីការជួលដីនៅព្រំដែន លោក ហ៊ុន សែន នាយករដ្ឋមន្ដ្រី ក៏បានលើកឡើងផងដែរ បញ្ហាសន្តិសុខ សណ្ដាប់ធ្នាប់ និងសេវាសាធារណៈ។ ប្រមុខរដ្ឋាភិបាលកម្ពុជា ប្រាប់មន្ដ្រីថ្នាក់ក្រោមនៅខេត្តព្រៃវែងទាំងអស់ ត្រូវឲ្យចិត្តទុកដាក់រក្សាសន្តិសុខ សណ្ដាប់ធ្នាប់ រួមមានការបង្ក្រាបបទល្មើសផ្សេងៗ ពិសេសការបង្ក្រាបបទល្មើសគ្រឿងញៀន ចោរកម្ម និងឆក់ប្លន់ជាដើម ដើម្បីផ្ដល់ភាពកក់ក្ដៅ និងធានាដល់សុវត្ថិភាពរបស់ប្រជាពលរដ្ឋ។ ក្នុងសំណុំរឿងសេវាសាធារណៈ លោក ហ៊ុន សែន ចង់ឲ្យមន្ដ្រីដោះស្រាយបញ្ហាជម្លោះដីធ្លី និងយកចិត្តទុកដាក់បម្រើប្រជាពលរដ្ឋឲ្យបានលឿន មានប្រសិទ្ធភាព ហើយត្រូវបំបាត់នូវភាពអសកម្មនានាដែលអាចធ្វើឲ្យថ្នាំងថ្នាក់ដល់ពលរដ្ឋ។
បើតាមប្រមុខរដ្ឋាភិបាលកម្ពុជា អាជ្ញាធរខេត្តព្រៃវែង ត្រូវផ្សព្វផ្សាយឲ្យបានទូលំទូលាយ សារាចរណែនាំអំពីផ្សារលក់ដូរ និងការលុបចោលការបង់ថ្លៃសម្រាប់ពលរដ្ឋដែលលក់ដូរតូចតាច តាមកញ្ច្រែង កញ្ជើ និងល្អីជាដើម។ លោកបញ្ជាក់ទៀតថា នៅខែមេសាខាងមុខនេះ នៅតំបន់មួយចំនួននៅក្នុងខេត្តព្រៃវែង តម្លៃអគ្គីសនីក្នុង១គីឡូវ៉ាត់ម៉ោង នឹងធ្លាក់ថ្លៃមកនៅត្រឹម៤៨០៛ សម្រាប់អ្នកប្រើប្រាស់ក្រោម១០គីឡូវ៉ាត់ម៉ោង ៦១០៛សម្រាប់អ្នកប្រើប្រាស់ក្រោម៥០គីឡូវ៉ាត់ម៉ោង និង ៧៩០៛សម្រាប់អ្នកប្រើប្រាស់លើស៥០គីឡូវ៉ាត់ម៉ោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ