រដ្ឋនឹងដកយកក្រុមហ៊ុនស៊ីនទ្រីមកគ្រប់គ្រង មុនបើកឲ្យមានការដេញថ្លៃពីក្រុមហ៊ុនប្រមូលសម្រាមពី៣ទៅ៤ក្រុមហ៊ុន
លោកនាយករដ្ឋមន្ត្រី ហ៊ុន សែន នៅក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យបៀលប្រាយ នៅមជ្ឈមណ្ឌលកោះពេជ្រនាព្រឹកថ្ងៃអង្គារនេះ បានប្រកាសដកហូតសិទ្ធិប្រមូលសម្រាមពីក្រុមហ៊ុន ស៊ីនទ្រីជាបណ្ណោះអាសន្នសិន ដើម្បីឲ្យរដ្ឋគ្រប់គ្រង។ ការសម្រេច របស់លោក ហ៊ុន សែន ដូច្នេះធ្វើឡើងខណៈបញ្ហាសំរាមនៅក្នុងទីក្រុងភ្នំពេញបានកើនកាន់តែច្រើន ហើយក្រុមហ៊ុនស៊ីនទ្រីតែមួយ មិនអាចរ៉ាប់រងបានឡើយ។
ចុះផ្សាយនៅថ្ងៃ៖
ស្តាប់ - ០២:០៩
នៅចំពោះមុខនិស្សិតជាង៤ពាន់នាក់ លោកនាយកយករដ្ឋមន្ត្រី ហ៊ុន សែន បានថ្លែងថាទីក្រុងភ្នំពេញត្រូវតែមានក្រុមហ៊ុនប្រមូលសម្រាមពី៣ទៅ៤ក្រុមហ៊ុនដែរ ដើម្បីធ្វើប្រតិបត្តិការប្រមូល និងសម្អាតទីក្រុង ដោយមិនអាចពឹងផ្អែកតែទៅលើក្រុមហ៊ុនប្រមូលសម្រាម ស៊ីនទ្រី តែមួយបានទេ។
ការលើកឡើងរបស់លោកនាយករដ្ឋមន្ត្រីដូច្នេះ គឺផ្អែកទៅលើកំណើនសម្រាម និងវិសាលភាពនៃទីក្រុងភ្នំពេញ ពោលគឺក្រុមហ៊ុនស៊ីនទ្រី បានចាប់ផ្តើមចុះហត្ថលេខាប្រមូលសម្រាមក្នុងក្រុងភ្នំពេញតាំងពីមានសម្រាម ពី៣០០ទៅ៥០០តោន ក្នុងមួយថ្ងៃ។ ក៏ប៉ុន្តែបច្ចុប្បន្ននេះ សម្រាមបានកើនឡើងរហូតដល់ជាង៣ពាន់តោន ក្នុងមួយថ្ងៃ ខណៈទំហំទីក្រុងបានកើនឡើងពីរដងលើសពីមុន គឺរហូតដល់ជាង៦០០គីឡូម៉ែត្រការ៉េ។
តាមលោក ហ៊ុន សែន នៅពេលអន្តរកាលខាងមុខនេះ រដ្ឋត្រូវយកក្រុមហ៊ុនស៊ីនទ្រី មកកាន់កាប់វិញ គឺកាន់កាប់ទាំងរថយន្តដឹកសម្រាម សម្ភារៈក្រុមហ៊ុន និងបុគ្គលិក ដោយមានការទូទាត់ ដល់ក្រុមហ៊ុន មិនឲ្យមានការខាតបង់ឡើយ។ ជាជំហានបន្ត រដ្ឋត្រូវរៀបចំជា៤តំបន់នៅលើខណ្ឌទាំង១៤ នៃក្រុងភ្នំពេញ ដោយដាក់ឲ្យធ្វើការដេញថ្លៃពីក្រុមហ៊ុននានា រាប់ទាំងក្រុមហ៊ុនស៊ីនទ្រីផងដែរ។ នេះបើតាមលោក ហ៊ុន សែន។
សូមបញ្ជាក់ថាក្រុមហ៊ុនស៊ីនទ្រី គឺជាក្រុមហ៊ុនប្រមូលសម្រាមមួយ ដែលបានធ្វើប្រតិបត្តិការប្រមូលសម្រាម និងសម្អាតទីក្រុងភ្នំពេញចាប់តាំងពីទសវត្សរ៍ឆ្នាំ៩០មកម៉្លេះ ខណៈដែលក្រុមហ៊ុនប្រមូលសម្រាមជាច្រើនបានបរាជ័យជាបន្តបន្ទាប់ ក្នុងការប្រមូលសម្រាមនៅក្នុងទីក្រុង ដែលប្រជាពលរដ្ឋនៅមិនទាន់យល់ដឹងច្បាស់លាស់ពីបញ្ហាអនាម័យនិងបរិស្ថាន។
ក្រុមហ៊ុន ស៊ីនទ្រី តែងរងនូវការរិះគន់ មិនលោះថ្ងៃពីការយឺតយ៉ាវនៃការប្រមូលសម្រាម តាមលំនៅដ្ឋាន ជាពិសេសនៅពេលមានបុណ្យទានម្តងៗ ដោយបុគ្គលិកប្រមូលសម្រាមមួយចំនួនបានឈប់សម្រាក ធ្វើឲ្យស្ទះនិរន្តរភាពការងារ។ ក៏ប៉ុន្តែការសម្រេចរបស់ប្រមុខរដ្ឋាភិបាលនៅពេលនេះ ដែលតម្រូវឲ្យមានក្រុមហ៊ុនច្រើន ចូលរួមធ្វើការងារនេះ ត្រូវគេមើលឃើញថាជាដំណោះស្រាយថ្មីមួយ ដែលសង្ឃឹមថា នឹងអាចជួយដោះស្រាយបញ្ហាសម្រាមនៅក្នុងទីក្រុងភ្នំពេញបានយ៉ាងមានប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ