សាលាក្រុងភ្នំពេញ ផ្តល់ទីតាំងបីកន្លែងសម្រាប់ជនពិការច្រៀង ដើម្បីបញ្ចប់ការច្រៀងរកថវិកាតាមស្តុប
លោកប៉ា សុជាតិវង្ស អភិបាលរាជធានីភ្នំពេញ បានបញ្ជាក់ឲ្យដឹងថា រដ្ឋបាលរាជធានីភ្នំពេញ បានឯកភាពមិនអនុញ្ញាតឲ្យជនពិការច្រៀងតាមទីសាធារណៈនានាក្នុងរាជធានីភ្នំពេញទៀតទេ ដោយជំនួសមកវិញអាជ្ញាធរបានផ្តល់ទីតាំងជាក់លាក់ចំនួន៣កន្លែង ដើម្បីឲ្យពួកគេច្រៀងស្វែងរកថវិកាចិញ្ចើមជីវិត។ ការសម្រេចនេះ បានធ្វើឡើងក្រោយលោកប៉ា សុជាតិវង្សបានជួបប្រជុំជាមួយជនពិការមួយចំនួនកាលពីរសៀលម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥៩
ការបញ្ជាក់ឲ្យដឹងរបស់លោកអភិបាលក្រុងភ្នំពេញ ប៉ា សុជាតិវង្សនេះ គឺធ្វើឡើងតាមរយៈទំព័រហ្វេសប៊ុករបស់លោកកាលពីល្ងាចថ្ងៃសុក្រ។ បើតាមលោកប៉ា សុជាតិវង្ស អង្គប្រជុំដែលមានការចូលរួមពីសំណាក់ជនពិកាដែលច្រៀងរកប្រាក់តាមស្តុបនានាផងនោះ បានសម្រេចឯកភាពបញ្ចប់ការច្រៀងតាមទីសាធារណៈទៀត ដោយជំនួសមកវិញនូវការច្រៀងតាមទីកន្លែងដែលរដ្ឋបាលរាជធានីភ្នំពេញរៀបចំជូនចំនួន៣ទីតាំង។ ទីតាំងទាំងបីនេះ គឺនៅរមណីយដ្ឋានវត្តភ្នំ សួនអតីតទីលានប្រជាធិបតេយ្យ និងសួនច្បារមុខវត្តបទុមវតី។ លោកអភិបាលក្រុងភ្នំពេញ បានបញ្ជាក់បន្ថែមថា រដ្ឋបាលក្រុងភ្នំពេញនឹងរៀបចំឆាកតន្ត្រីជូនជនពិកាថែមទៀតនៅតាមទីតាំងនីមួយៗខាងលើនេះ។
បន្ថែមពីលើនេះ សាលារាជធានីភ្នំពេញ ក៏បានជម្រុញឲ្យមន្ទីរសង្គមកិច្ចរាជធានីត្រូវសហការជាមួយអាជ្ញាធរខណ្ឌ សង្កាត់ ដើម្បីធ្វើបច្ចុប្បន្នភាពជនពិការ និង ត្រូវចុះទៅជួបជាមួយជនពិការទាំងអស់ ដើម្បីស្វែងយល់អំពីសមត្ថភាព ចំណេះ ជំនាញ ដើម្បីមានលទ្ធភាពផ្តល់ការងារដល់ពួកគាត់ផងដែរ។ សូមជំរាបជូនថា បច្ចុប្បន្ននេះ ជនពិការដែលច្រៀងនៅតាមទីសាធារណៈមាន២១ក្រុម ដោយបានបែងចែកជាក្រុមប្រគុំតន្ត្រីចំនួន៥ក្រុមដោយឡែកពីគ្នាដែលមានសមាជិកសរុបចំនួន ១៩៤នាក់។
ចំពោះយន្តការរបស់សាលារាជធានីភ្នំពេញនេះ លោកងិន សៅរ័ត្ននាយកប្រតិបត្តិរបស់អង្គការជនពិការកម្ពុជា បានលើកឡើងថា វាជារឿងល្អ តែមិនល្អណាស់ណានៅឡើយទេ ព្រោះថាជនពិកាមានដល់ទៅ៥ក្រុមតែអាជ្ញាធរផ្តល់កន្លែងច្រៀងជាក់លាក់តែបីកន្លែងប៉ុណ្ណោះ។ លោកថា អាជ្ញាធរគួរតែផ្តល់ទីតាំង៥កន្លែង ដើម្បីឲ្យសមាមាត្រនឹងក្រុមរបស់ពួកគាត់ ។ បើតាមលោកងិន សៅរ័ត្ន ការផ្តល់ទីតាំងតែបីកន្លែង វាមានការលំបាកដល់ក្រុមជនពិការ ដោយសារតែក្រុមនីមួយៗអាចនឹងត្រូវបង្កើនសមាជិកបន្ថែមទៀតជាហេតុនាំឲ្យពិបាកក្នុងការគ្រប់គ្រងនេះម្យ៉ាង។ ម្យ៉ាងមួយទៀត ប្រសិនបើមានគ្នីគ្នាច្រើនពេកក្នុងក្រុម នោះប្រាក់ចំណូលដែលពួកគេទទួលបានពីការច្រៀង ក៏មិនបានច្រើនដូចកាលពួកគេច្រៀងនៅតាមបណ្តាស្តុបនោះដែរ។ ចំណុចនេះ គឺជាក្តីព្រួយបារម្ភរបស់លោកងិន សៅរ័ត្ន ដែលថា ពួកគេអាចនឹងត្រឡប់ទៅច្រៀងនៅតាមស្តុបវិញជាដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ