ប្រធានអនុគណៈកម្មាធិការសភាអឺរ៉ុបស្នើឱ្យសហភាពអឺរ៉ុបចាត់វិធានការប្រឆាំងនឹងការរំលោភសិទ្ធិមនុស្សនៅកម្ពុជា
ប្រធានអនុគណៈកម្មាការសិទ្ធិមនុស្សសភាអឺរ៉ុប កាលពីថ្ងៃទី២៩ ខែកក្កដា បានអំពាវនាវដល់គណៈកម្មាការសហភាពអឺរ៉ុប ឱ្យមានវិធានការប្រឆាំងនឹងការរំលោភសិទ្ធិមនុស្ស នៅកម្ពុជា ។ ប្រធានអនុគណៈកម្មការសិទ្ធិមនុស្ស ចាត់ទុក ការបោះឆ្នោតសភារបស់កម្ពុជា នៅថ្ងៃទី ២៩ ខែកក្កដា ត្រូវបានរៀបចំឡើងដោយប្រឆាំងនឹងលំហ សម្រាប់បក្សប្រឆាំង និងជាការបោះឆ្នោតដែលកើតមានឡើងក្នុងបរិយាកាសទូទៅដែលអាក្រក់ ទាក់ទិននឹងគោរពសិទ្ធិមនុស្ស រួមទាំងសិទ្ធិការងារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
លោក ព្យា អាន់តូញូប៉ានហ្សូរី (Pier Antonio Panzeri) ប្រធានអនុគណៈកម្មការសិទ្ធិមនុស្សសភាអឺរ៉ុប តាមរយៈសេចក្តីប្រកាសព័ត៌មាន កាលពីថ្ងៃទី ៣០ កក្កដា បានថ្លែងថា ការវិវត្តថ្មីៗនៅកម្ពុជា រួមមានការប្រើប្រាស់អំពើហិង្សា និងការចាប់ដាក់ពន្ធនាគារនៃលោក កឹម សុខា មេដឹកនាំបក្សប្រឆាំងដ៏ធំ គឺជាភស្តុតាងអំពីនិន្នាការធ្ងន់ធ្ងរឆ្ពោះទៅរកការធ្វើឱ្យចុះខ្សោយនៃលទ្ធិប្រជាធិបតេយ្យ និងសិទ្ធិនយោបាយ និងការបំបិទសម្លេងប្រឆាំងនានា ក្នុងប្រទេសនេះ។ លោក ព្យា អាន់តូញូប៉ានហ្សូរី បានអំពាវនាវឱ្យអាជ្ញាធរកម្ពុជា គោរពគោលការណ៍លទ្ធិប្រជាធិបតេយ្យ និងដោះលែង លោក កឹម សុខា ជាបន្ទាន់។
ប្រធានអនុគណៈកម្មការសិទ្ធិមនុស្សសភាអឺរ៉ុប ក៏បានស្នើដល់គណៈកម្មការអឺរ៉ុប និងសេវាកម្មវិធានការខាងក្រៅអឺរ៉ុប ធ្វើរបាយការណ៍ឱ្យបានឆាប់បំផុត ស្តីពីការវាយតម្លៃរបស់ពួកគេ ទាក់ទិននឹងការប្រតិបត្តិតាមរបស់កម្ពុជា ចំពោះកាតព្វកិច្ចសិទ្ធិមនុស្ស ដូចបានចែងកំណត់ជាមុន នៅក្រោមដំណើរការតាមដានរបស់កម្មវិធី «អ្វីទាំងអស់ លើកលែងតែអាវុធ» ឬ Everything But Arms (EBA)។ និងស្នើឱ្យមានការឆ្លើយតបចំពោះការធ្លាក់ចុះគួរឱ្យព្រួយបារម្ភនៃស្ថានភាពសិទ្ធិមនុស្ស ក្នុងប្រទេសនេះ។
ឆ្លើយតបនឹងទៅការលើកឡើងនេះ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានចាត់ទុកការលើកឡើងរបស់ប្រធានអនុគណៈកម្មការសភាអឺរ៉ុបផ្នែកសិទ្ធិមនុស្សនេះ ថាជាការរំលោភអធិបតេយ្យភាព និងឯករាជ្យភាពនៅកម្ពុជា។ កម្ពុជា ដែលកំពុងតែបោះជំហានឈានទៅមុខតាមរយៈកំណើនសេដ្ឋកិច្ចថេរ ៧% ក្នុងមួយឆ្នាំ ជាពិសេសការរៀបចំការបោះឆ្នោតជាតិ ដែលបានបិទបញ្ចប់ ដោយរលូន នៅថ្ងៃទី ២៩ ខែកក្កដា។
ព្រមជាមួយគ្នានេះ អ្នកនាំពាក្យរដ្ឋាភិបាលដដែល ក៏បានចាត់ទុក ការភ្ជាប់បញ្ហានយោបាយនៅកម្ពុជា ទៅនឹងការផ្តល់ប្រព័ន្ធអនុគ្រោះពន្ធដល់កម្ពុជា ថាជារឿងមិនសមហេតុផល និងអយុត្តិធម៌សម្រាប់កម្ពុជា។
ការស្នើឱ្យមានចំណាត់ការប្រឆាំងនឹងការរំលោភសិទិ្ធមនុស្សរបស់អនុគណៈកម្មការសិទិ្ធមនុស្សសភានាពេលធ្វើ គឺធ្វើឡើងបន្ទាប់ពីសហភាពអឺរ៉ុបនៅថ្ងៃទី៣០ កក្កដា បានចេញមុខមកប្រតិកម្មទៅនឹងការបោះឆ្នោតជាតិនៅកម្ពុជាដែលទើបបញ្ចប់កាលពីថ្ងៃទី២៩ កក្កដា។ តាមរយៈអ្នកនាំពាក្យសម្រាប់កិច្ចការបរទេស និងគោលនយោបាយសន្តិសុខ សហភាពអឺរ៉ុបបានចាត់ទុកការបោះឆ្នោតនៅកម្ពុជាថា មិនតំណាងឲ្យឆន្ទៈប្រជាធិបតេយ្យរបស់អ្នកបោះឆ្នោតទេ ពោលគឺការបោះឆ្នោតនេះខ្វះនូវការជឿជាក់។
ការបោះឆ្នោតជាតិអាណត្តិទី៦របស់កម្ពុជា បានបិទបញ្ចប់ទៅដោយមានភាពចម្រូងចម្រាស់។ ចម្រូងចម្រាស់ គឺដោយសារតែសហភាពអឺរ៉ុប និងប្រទេសប្រជាធិបតេយ្យមួយចំនួនបានចេញមកប្រតិកម្មចំពោះការបោះឆ្នោតនៅកម្ពុជានេះ ដោយខ្លះបានសម្តែងនូវការសោកស្តាយ និងខកចិត្ត។ ប៉ុន្តែផ្ទុយទៅវិញ អ្នកសង្កេតការណ៍អន្តរជាតិដែលបានមកចូលរួមសង្កេតការណ៍ការបោះឆ្នោតនៅកម្ពុជាបានសម្តែងនូវការគាំទ្រ ដោយថា ការបោះឆ្នោតបានប្រព្រឹត្តទៅសេរី និងត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ