ល្បែងនៅលើទូរសព្ទឈ្មោះ Pokémon Go បង្ហាញវត្តមាននៅកម្ពុជា និងប្រទេសនៅអាស៊ីអាគ្នេយ៍ដទៃទៀត បានពីរសប្ដាហ៍ហើយ។ នៅស្រុកគេ ពេលដែលល្បែងនេះដាក់ឲ្យដំណើរការ រដ្ឋអាជ្ញាបារម្ភណាស់ ហើយបានចេញសេចក្ដីណែនាំនិងដាស់តឿនដល់យុវជនឲ្យលេងល្បែងទូរសព្ទដ៏ទំនើបនេះ ប្រកបដោយការទទួលខុសត្រូវ ដើម្បីចៀសផុតពីគ្រោះភ័យ។ ប៉ុន្តែអាជ្ញាធរនៅស្រុកខ្មែរ ហាក់ពុំទាន់បានដាក់ចេញនូវវិធានការបង្ការណាមួយនៅឡើយទេ រហូតមកទល់ពេលនេះ។
Pokémon Go គឺជាល្បែងនៅលើទូរសព្ទដ៏ទំនើប ប្រើប្រាស់ប្រព័ន្ធ Augmented Reality ឬ AR ដែលភ្ជាប់តុក្កតានៅក្នុងកម្មវិធីទូរសព្ទ ទៅក្នុងទីកន្លែងពិតៗរបស់អ្នកលេង។ ដើម្បីលេងល្បែងនេះបាន អ្នកលេងត្រូវអនុញ្ញាតឲ្យល្បែងនេះ ស្គាល់ពីទីតាំងភូមិសាស្ត្រពិតប្រាកដរបស់ខ្លួន មិនថានៅតាមផ្លូវ នៅផ្ទះ នៅហាង នៅតាមសួនសាធារណៈ ឬនៅក្នុងវត្តអារាមជាដើម។ ពេលលេងល្បែង Pokémon Go នេះ អ្នកលេងនឹងបានឃើញរូបតុក្កតាលោតឡើងនៅលើអេក្រង់ទូរសព្ទ។ គេត្រូវតាមចាប់តុក្កតានេះសន្សំទុក ហើយបង្ហាត់វា ដើម្បីទៅវាយដណ្ដើមតំណែងអ្នកឈ្នះនៅលើសង្វៀនប្រកួត។
មែនទែនទៅ បើតាមក្រុមហ៊ុន Niantic ដែលជាអ្នកបង្កើតល្បែងនេះ Pokémon Go មានគោលដៅជំរុញឲ្យមនុស្សសម័យថ្មីដែលនៅតែក្នុងផ្ទះវក់ជាមួយកុំព្យូទ័រ ទូរទស្សន៍ និងទូរសព្ទ ចេញពីផ្ទះ ធ្វើលំហាត់ប្រាណ តាមរយៈការដើរតាមចាប់តុក្កតា Pokémon។ ប៉ុន្តែក្រុមហ៊ុននេះមិននឹកស្មានសោះឡើយថា ល្បែងដែលខ្លួនបង្កើត បានទទួលការគាំទ្រច្រើនដល់ម្ល៉ឹង។ ទើបតែដាក់ឲ្យដំណើរការនៅខែកក្កដា ប៉ុន្តែវាបានក្លាយជាកម្មវិធីទូរសព្ទដែលមានអ្នកប្រើប្រាស់ច្រើនបំផុត ដោយមានអ្នកប្រើប្រាស់ចំនួនជាង១រយលាននាក់ហើយ គិតត្រឹមពាក់កណ្ដាលខែសីហានេះ។
មានអ្នកប្រើប្រាស់ច្រើន បញ្ហាក៏ច្រើន! តាំងពីល្បែងនេះដាក់ឲ្យដំណើរការមក គេឃើញយុវជននិងកុមារកាន់តែច្រើនឡើងៗ ចុះផ្លូវជាក្រុមៗដើម្បីតាមចាប់តុក្កតា Pokémon។ នៅអាមេរិក ទីដែលល្បែង Pokémon Go ដាក់ឲ្យដំណើរការមុនគេតាំងពីខែកក្កដា អាជ្ញាធរត្រូវឈឺក្បាលវិលមុខជាមួយបញ្ហាសុវត្ថិភាពរបស់អ្នកលេងល្បែងនេះ។ នៅរដ្ឋ Missouri ប៉ូលីសឃាត់ខ្លួនបានជនល្មើស៤នាក់ ដែលប្រើប្រាស់ល្បែងនេះ បញ្ឆោតឲ្យអ្នកលេង Pokémon Go ទៅជាមួយពួកគេដើម្បីចាប់តុក្កតា។ នៅពេលទៅដល់កន្លែងស្ងាត់ ជនល្មើសទាំង៤នាក់នោះ បានចាត់ការប្លន់អ្នកលេងល្បែង Pokémon Go តែម្ដង។ នៅអាមេរិកដែរ យុវជនកាណាដាពីរនាក់ត្រូវប៉ូលីសអាមេរិកឃាត់ខ្លួន ព្រោះបានឆ្លងចូលទៅក្នុងទឹកដីអាមេរិកដើម្បីតាមចាប់តុក្កតា Pokémon។ នេះគេនៅមិនទាន់និយាយដល់ករណីគ្រោះថ្នាក់ចរាចរណ៍ជាច្រើនករណី ដែលកើតឡើងព្រោះតែអ្នកបើកបររវល់ចាប់តុក្កតា Pokémon ភ្លេចមើលផ្លូវផងទេ។
ដោយសារតែបានឃើញបញ្ហាកើតឡើងនៅបណ្ដាប្រទេសលោកខាងលិចដូច្នេះហើយ ទើបអាជ្ញាធរនៃប្រទេសនៅអាស៊ី ជាអាថិ៍ប្រទេសសិង្ហបុរី និងថៃ បានដាក់ចេញនូវបម្រាម និងការណែនាំមួយចំនួន នៅពេលល្បែង Pokémon Go ដាក់ឲ្យដំណើរការនៅអាស៊ីអាគ្នេយ៍កាលពីដើមខែសីហានេះ។
អាជ្ញាធរសិង្ហបុរី បានណែនាំឲ្យអ្នកលេងល្បែង Pokémon Go ដើរចាប់តុក្កតាជាក្រុមៗ ចៀសវាងដើរតែម្នាក់ឯង។ ហើយត្រូវរក្សានូវស្មារតីប្រុងប្រយ័ត្នខ្ពស់ ចៀសវាងលេងល្បែងនេះក្នុងពេលបើកបរ ដែលអាចបង្កគ្រោះថ្នាក់ដល់ខ្លួនឯងនិងអ្នកដទៃ។ នៅប្រទេសថៃ អាជ្ញាធរនៃរបបសឹកអះអាងថា ខ្លួនបានទាក់ទងទៅកាន់ក្រុមហ៊ុនបង្កើតល្បែងនេះ ដើម្បីដាក់កម្រិតទីកន្លែងតាមចាប់តុក្កតា Pokémon និងចង់ឈានទៅកំណត់ពេលវេលាលេងទៀតផង ព្រោះមិនចង់ឲ្យកុមារនិងយុវជន វក់លេងល្បែងនេះភ្លេចរៀនភ្លេចសូត្រ។
ត្រឡប់មកកម្ពុជាវិញ។ តាំងពីល្បែងនេះដាក់ឲ្យដំណើរការនៅថ្ងៃទី០៦សីហា អាជ្ញាធរនៅស្រុកខ្មែរ ហាក់ពុំទាន់បានដាក់ចេញនូវវិធានការបង្ការណាមួយនៅឡើយទេ រហូតមកទល់ពេលនេះ។ ជារៀងរាល់ថ្ងៃ ជាពិសេសនៅពេលល្ងាចនិងយប់ យុវជននិងកុមារទាំងក្រុមៗ នាំគ្នាតាមចាប់តុក្កតា Pokémon នៅតាមសួនច្បារនានាក្នុងទីក្រុងភ្នំពេញ ទាំងនៅសួនច្បារកោះពេជ្រ សួនច្បារវិមានឯករាជ្យ សួនច្បារមុខព្រះបរមរាជវាំង និងសារមន្ទីរផ្សេងៗ រាប់បញ្ចូលទាំងសារមន្ទីរប្រល័យពូជសាសន៍ទួលស្លែងផង ដែលបានធ្វើឲ្យមានការបារម្ភពីសុវត្ថិភាពនិងសីលធម៌។
បញ្ហាសុវត្ថិភាព៖ អ្នកលេងល្បែងតាមចាប់តុក្កតា Pokémon ត្រូវប្រឈមនឹងគ្រោះថ្នាក់ចរាចរណ៍ នៅពេលរវល់ឈ្ងោកលេងល្បែងនេះភ្លេចមើលផ្លូវ ឬត្រូវចោរឆក់ទូរសព្ទទៅបាត់ក៏ថាបាន។ ដោយឡែក បញ្ហាសីលធម៌ចោទឡើងនៅពេលដែលអ្នកលេងល្បែងនេះមួយចំនួន បានចូលឈ្លានពានដល់សារមន្ទីរប្រល័យពូជសាសន៍ទួលស្លែងដើម្បីតាមចាប់តុក្កតា Pokémon ជាទង្វើមាក់ងាយយ៉ាងធ្ងន់ធ្ងរដល់វិញ្ញាណក្ខន្ធជនរងគ្រោះ។
ខណៈដែលមិនទាន់មានរបាយការណ៍ពីគ្រោះថ្នាក់កើតឡើងដោយសារល្បែងទូរសព្ទ Pokémon Go នៅកម្ពុជា អាជ្ញាធរមានសមត្ថកិច្ចនៅកម្ពុជាគួរពិនិត្យមើលល្បែងនេះ និងដាក់ចេញនូវវិធានការសមស្របដើម្បីដាស់តឿនអ្នកលេងនិងបង្កាគ្រោះថ្នាក់ ចៀសវាងមានបញ្ហារួចទើបដោះស្រាយតាមក្រោយ ដូចពាក្យចាស់ថា គោបាត់ទើបធ្វើរបង។ ចំណែកការតាមចាប់តុក្កតា Pokémon នៅក្នុងសារមន្ទីរប្រល័យពូជសាសន៍ទួលស្លែង ក៏គួរស្នើឲ្យក្រុមហ៊ុនផលិតល្បែងនេះដកចេញផងដែរ។ អាជ្ញាធរកម្ពុជាមិនគួរមើលរំលងលទ្ធភាពនៃគ្រោះអាសន្នដែលអាចកើតមានដោយសារល្បែងនេះទេ ខណៈមានឧទាហរណ៍រួចស្រេចពីបរទេសឲ្យឃើញហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ