ឆ្នាំថ្មី៖ បក្សកាន់អំណាចថា ខ្លួនជោគជ័យបង្ក្រាបឧបាយកលបដិវត្តន៍ពណ៌ ខណៈអតីតបក្សប្រឆាំងដង្ហោយរកយុត្តិធម៌
មុនពេលពិធីបុណ្យចូលឆ្នាំខ្មែរឈានចូលមកដល់ អ្នកនយោបាយខ្មែរបានចេញសារជូនពររៀងៗខ្លួនទៅដល់ប្រជាជាតិ។ ជាការកត់សម្គាល់ នៅក្នុងខ្លឹមសារនៃសារជូនពរទៅកាន់ពលរដ្ឋខ្មែរនោះ ប្រមុខរដ្ឋាភិបាលបានបង្ហាញពីជោគជ័យរបស់ខ្លួនក្នុងការបង្ក្រាបឧបាយកលបដិវត្តន៍ពណ៌។ ចំណែកអ្នកនយោបាយនៃអតីតគណបក្សប្រឆាំង តាមរយៈទេវតាឆ្នាំថ្មី ពួកគេដង្ហោយរកយុត្តិធម៌សម្រាប់ខ្លួនឯង។
ចុះផ្សាយនៅថ្ងៃ៖
ស្តាប់ - ០២:៤៦
នៅក្នុងឱកាសនៃពិធីបុណ្យចូលឆ្នាំថ្មីប្រពៃណីខ្មែរនេះ លោក កឹម សុខា តាមរយៈសារជូនពរពីពន្ធនាគារ ដែលលោកបន្តហៅខ្លួនឯងថា ជាប្រធានគណបក្សសង្គ្រោះជាតិដដែលនោះ បានអំពាវនាវដល់អ្នកនយោបាយខ្មែរ និងថ្នាក់ដឹកនាំខ្មែរដោះស្រាយបញ្ហាដោយអហឹង្សានិងបានបន្តអះអាងក្នុងសំណេរថា កុំយកខ្មែរគ្នាឯងជាសត្រូវ។ ដូច្នេះអ្នកនយោបាយខ្មែរគ្រប់រូប ត្រូវបោះបង់ចោលនូវការចងអាឃាតនិងឈប់យកប្រជាពលរដ្ឋធ្វើជាសត្រូវ។ សម្រាប់លោក កឹម សុខា គ្មានឡើយនូវពាក្យថា ហួសពេលសម្រាប់ខ្មែរក្នុងការវិលត្រឡប់មកផ្សះផ្សារជាតិឡើងវិញ។ បន្ថែមលើនេះលោក កឹម សុខា បានលើកទឹកចិត្តដល់ពលរដ្ឋខ្មែរកុំអស់សង្ឃឹម និងកុំបោះបង់ចោលការទាមទារដែលនាំមកនូវការផ្លាស់ប្ដូរនោះ។
ដោយឡែក នៅក្នុងសារជូនពរដែលមានកម្រាស៦ទំព័រ លោកនាយករដ្ឋមន្ត្រី ហ៊ុន សែន បានកត់សម្គាល់ថា ការប្រារព្ធពិធីបុណ្យចូលឆ្នាំខ្មែរនៅឆ្នាំ២០១៨នេះ ធ្វើឡើងស្របនឹងពេលវេលានៃការបោះឆ្នោតថ្នាក់ជាតិខិតជិតមកដល់ដែរ ពោលគឺថ្ងៃអាទិត្យទី២៩ខែកក្កដា។ តែទោះជាបែបនេះក៏ដោយ មុនឆ្នាំថ្មីចូលមកដល់នៅថ្ងៃសៅរ៍ខាងមុខនេះ លោកនាយករដ្ឋមន្ត្រី ហ៊ុន សែន បានរម្លឹកថា ក្នុងឆ្នាំកន្លងទៅរដ្ឋាភិបាលបានទប់ស្កាត់ដោយជោគជ័យ នូវឧបាយកលបដិវត្តន៍ពណ៌របស់គណបក្សប្រឆាំងដែលឃុបឃិតជាមួយបរទេស ឲ្យរងការបរាជ័យយ៉ាងធ្ងន់ធ្ងរនៅកម្ពុជា តាមរយៈការអនុវត្តវិធានការណ៍ច្បាប់ដ៏ម៉ឺងម៉ាត់របស់រដ្ឋាភិបាល។ នេះបើតាមលោកនាយករដ្ឋមន្ត្រី ហ៊ុន សែន ។
នៅក្នុងសារជូនពរដដែល លោក ហ៊ុន សែន នាយករដ្ឋមន្ត្រីក៏បានរំលេចនូវស្នាដៃជាច្រើនដែលរដ្ឋាភិបាលសម្រេចបាននៅក្នុងឆ្នាំចាស់ឆ្នាំ២០១៧ដោយរួមមានៈ ការរក្សាបាននូវកំណើនសេដ្ឋកិច្ចក្នុង៦,៩ ភាគរយ និងការផ្ដល់ប្រាក់បៀវត្សជូនមន្ត្រីរាជការនិងកម្មករ កម្មាការិនី ជាដើម។ ទន្ទឹមនេះ លោកនាយករដ្ឋមន្ត្រី ក៏បានប្ដេជ្ញាចិត្តជាថ្មីធ្វើការកែទម្រង់រដ្ឋឲ្យស៊ីជម្រៅតាមរយៈពាក្យស្លោក ឆ្លុះកញ្ចក់ ងូតទឹក ដុះក្អែល ព្យាបាលនិងវះកាត់។
មិននៅស្ងៀមឡើយ លោក សម រង្ស៊ី តាមរយៈសារជូនពរនៅក្នុងបណ្ដាញសង្គមហ្វេសបុកបានចេញមុខអះអាងថា ជាអ្នកតំណាងឲ្យអតីតគណបក្សសង្គ្រោះជាតិ និងជាប្រធានចលនាសង្គ្រោះជាតិ នឹងខំធ្វើយ៉ាងណាឲ្យប្រជាពលរដ្ឋខ្មែរចាប់ផ្ដើមបានឃើញនូវពន្លឺប្រជាធិបតេយ្យយ៉ាងពិតប្រាកដក្នុងឱកាសឆ្នាំថ្មីនេះ។ លោក សម រង្ស៊ី បានបួងសួងឲ្យដំណើរការបោះឆ្នោតជាតិនៅថ្ងៃខាងមុខក្លាយទៅជាដំណើរការបោះឆ្នោតត្រឹមត្រូវវិញក្នុងពេលខាងមុខ ព្រោះលោកបានចាត់ទុកការបោះឆ្នោតនេះជាដំណើរបោះឆ្នោតក្លែងក្លាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ