អ្នកកាសែតគ្មានព្រំដែនអំពាវនាវឲ្យតុលាការទម្លាក់ចោលរាល់ការចោទប្រកាន់លើលោក រ៉ាត់ រត្នមុនី
អង្គការអ្នកកាសែតគ្មានព្រំដែននៅថ្ងៃទី១៩ ខែមិថុនា ម្សិលមិញ អំពាវនាវឲ្យតុលាការទម្លាក់ចោលរាល់ការចោទប្រកាន់ប្រឆាំងនឹងអ្នកបកប្រែឲ្យបណ្តាញព័ត៌មានរុស្ស៊ី RT ដែលបានផលិតភាពយន្តឯកសារមានចំណងជើងថា «ម្តាយខ្ញុំលក់ខ្ញុំ»។ ក្រោយពីជាប់ឃុំរយៈពេល៦ខែមក តុលាការនឹងប្រកាសសាលក្រមប្រឆាំងលើរូបលោក រ៉ាត់ រត្នមុនី នៅថ្ងៃទី២៦ ខែមិថុនាខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោក Daniel Bastard ជាប្រធានការិយាល័យអាស៊ី-ប៉ាស៊ីហ្វិករបស់អង្គការអ្នកកាសែតគ្មានព្រំដែនបានលើកឡើងថា"ការសម្រេចចិត្តរបស់លោកចៅក្រម កូយ សៅ លើករណីលោករ៉ាត់ រត្នមុនីនឹងធ្វើឲ្យមានផលប៉ះពាល់ខ្លាំងចំពោះប្រព័ន្ធយុត្តិធម៌កម្ពុជា"។
លោកបន្តថា“ជាមួយនឹងការរៀបចំសាក្សីដោយប៉ូលីស, ការមិនយកចិត្តទុកដាក់លើភ័ស្តុតាង និងអំណះអំណាងដែលបានដាក់ជូនដោយមេធាវី, ភាពលម្អៀងរបស់ចៅក្រម, វាដល់ពេលហើយ ដែលត្រូវបញ្ចប់នូវការកាត់ក្តីដ៏អាម៉ាស់នេះ ហើយដោះលែង លោក រ៉ាត់ រត្នមុនី”។ គិតរហូតមកដល់ពេលនេះលោក រ៉ាត់ រត្នមុនី វ័យ៤៧ឆ្នាំបានជាប់ឃុំរយៈពេល៦ខែមកហើយៗ តុលាការនឹងប្រកាសសាលក្រមប្រឆាំងលើរូបលោកនៅថ្ងៃទី២៦ ខែមិថុនាខាងមុខនេះ។
ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី ត្រូវបានតុលាការចោទប្រកាន់លោកពីបទ “ញុះញង់ឱ្យមានការរើសអើង” តាមរយៈការជួយបណ្តាញសារព័ត៌មានរុស្ស៊ី កំឡុងពេលថតខ្សែភាពយន្ត "ម្តាយខ្ញុំលក់ខ្ញុំ" ដែលជាភាពយន្តឯកសារ ចាក់ផ្សាយ កាលពីខែតុលាឆ្នាំ២០១៨។
លោក ឡោ ជុនធី ជាមេធាវីការពារក្តីឲ្យលោក រ៉ាត់ រត្នមុនី បានថ្លែងប្រាប់វិទ្យុបារាំងអន្តរជាតិថាលោកកំពុងរងចាំមើលការប្រកាសរបស់តុលាការថាតើតុលាការបន្តការចោទប្រកាន់ ឬលើកលែងការចោទប្រកាន់។ លោកស្នើឲ្យមានការលើកលែងការចោទប្រកាន់មកលើកូនក្តីរបស់លោក ដោយសារតែសំណុំរឿងនេះមិនមានភស្តុតាងគ្រប់គ្រាន់ ដែលអាចដាក់បន្ទុកលើលោក រ៉ាត់ រត្នមុនី។
ក្នុងអំឡុងពេលលោក រ៉ាត់ រត្នមុនី ជាប់ឃុំ, ភរិយារបស់លោក គឺ លោកស្រី ឡុង គីមហ៊ាង និងសកម្មជនដីធ្លីមួយចំនួនតែងតែធ្វើការតវ៉ានៅខាងមុខស្ថានទូតរុស្ស៊ីប្រចាំក្រុងភ្នំពេញ ដោយទាមទារឲ្យមានការអន្តរាគមន៍ពីស្ថានទូតនេះ។ លោកស្រីក៏ធ្លាប់បានអំពាវនាវឲ្យអាជ្ញាធរកម្ពុជាកោះហៅសារព័ត៌មានរុស្ស៊ី RT មកសាកសួរ ព្រោះសារព័ត៌មានរុស្ស៊ីជាអ្នកផ្សព្វផ្សាយ និងផលិតខ្សែភាពយន្តឯកសារ ដែលមានចំណងជើងថា «ម្តាយខ្ញុំលក់ខ្ញុំ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ