លោកស្រីរ៉ូណា ស្មីតបារម្ភរឿងគំរាម“ក្បាលនឹងគល់ឫស្ស៊ី”របស់រដ្ឋមន្ត្រីខ្មែរចំពោះអ្នកតវ៉ាលទ្ធផលបោះឆ្នោត
អ្នករាយការណ៏ពិសេសរបស់អង្គការសហប្រជាជាតិស្តីពីបញ្ហាសិទ្ធិមនុស្សនៅកម្ពុជា លោកស្រីរ៉ូណា ស្មីតបានផ្តើមទស្សនកិច្ចនៅកម្ពុជាជាថ្មីនៅថ្ងៃនេះ ដោយបានជួបពិភាក្សាគ្នាភា្លមតែម្តងជាមួយគណៈកម្មាធិការសិទ្ធិមនុស្សកម្ពុជា។ នៅក្នុងជំនួបប្រមាណ១ម៉ោងកន្លះកាលពីថ្ងៃត្រង់នេះ អ្នកជំនាញផ្នែកសិទ្ធិមនុស្សរបស់អង្គការសហប្រជាជាតិបានសួរនាំ និងបានសម្តែងក្តីព្រួយបារម្ភអំពីរឿងគំរាមវាយក្បាលនឹងគល់ឫស្ស៊ីលើអ្នកតវ៉ាលទ្ធផលបោះឆ្នោតនៅឆ្នាំក្រោយពីសំណាក់លោករដ្ឋមន្ត្រីសង្គមកិច្ចខ្មែរវង សូត។
ចុះផ្សាយនៅថ្ងៃ៖
ស្តាប់ - ០២:០៧
ជាការឆ្លើយតបចំពោះការព្រួយបារម្ភនេះ លោកកែវ រ៉េមី ប្រធានគណៈកម្មាធិការសិទ្ធិកម្ពុជា បានបញ្ជាក់ប្រាប់លោកស្រីរ៉ូណា ស្មីតវិញថា នោះមិនមែនជាការគំរាមកំហែងទេ ប៉ុន្តែជាការអប់រំតាមផ្លូវច្បាប់តែប៉ុណ្ណោះ។ បន្ថែមលើនេះ លោកកែវ រ៉េមី បានចាត់ទុកពាក្យសម្តីព្រមាន “វាយក្បាលនឹងគល់ឫស្ស៊ី”នោះថា ជាការព្រួយបារម្ភរបស់ថ្នាក់ដឹកនាំនៅក្នុងរដ្ឋាភិបាលកម្ពុជា ។ ការព្រួយបារម្ភនៅត្រង់នេះ គឺលោកកែវ រ៉េមី ផ្អែកទៅលើការបោះឆ្នោតមុនៗដែលមានការមិនទទួលស្គាល់នូវលទ្ធផលក្រោយការបោះឆ្នោត។
យ៉ាងណាក៏ដោយ លោកស្រីរ៉ូណា ស្មីតដែលទទួលស្គាល់ថា លោករដ្ឋមន្ត្រីខ្មែរវង សូត ជាមនុស្សស្លូតបូតនោះ បានបញ្ជាក់ទៅកាន់លោកប្រធានសិទ្ធិមនុស្សខ្មែរវិញថា លោករដ្ឋមន្ត្រីរូបនេះ មិនគួរណាប្រើប្រាស់ពាក្យសម្តី ដែលបង្កឲ្យមានព្រួយបារម្ភ និងភ័យខ្លាចដល់បញ្ហាសិទ្ធិមនុស្សឡើយ។ ទោះជាបែបនេះក្តី លោកស្រីរ៉ូណា ស្មីត ក៏បានលើកឡើងដែរថា បញ្ហាសិទ្ធិមនុស្សនៅកម្ពុជាមានការប្រែប្រួល ពោល គឺមិនអាក្រក់ដូចមជ្ឈដ្ឋានខ្លះលើកឡើងនោះទេ។ នេះបើតាមការថ្លែងប្រាប់របស់លោកកែវ រ៉េមី ចំពោះមុខអ្នកកាសែតក្រោយពីជំនួបជាមួយលោកស្រីរ៉ូណា ស្មីត។
សូមបញ្ជាក់ថា នេះ គឺជាលើកទីពីរហើយដែលប្រធានគណៈកម្មាធិការសិទ្ធិមនុស្សកម្ពុជាបានទទួលជួបជាមួយលោកស្រីរ៉ូណា ស្មីត ។ លោកស្រីរ៉ូណា ស្មីត ដែលកំពុងបំពេញទស្សនកិច្ចនៅក្នុងប្រទេសកម្ពុជារយៈពេល១០ថ្ងៃចាប់ពីថ្ងៃទី០៨ ដល់ថ្ងៃទី១៨ ខែសីហា។ ដំណើរទស្សនកិច្ចជាថ្មីនេះ គឺដើម្បីពិនិត្យមើលសិទ្ធិកុមារ និងស្ថានភាពសិទ្ធិមនុស្សទូទៅ។
តាមគម្រោង ក្រៅពីជួបជាមួយគណៈកម្មាធិការសិទ្ធិមនុស្សកម្ពុជា អ្នកជំនាញផ្នែកសិទ្ធិមនុស្សរបស់អង្គការសហប្រជាជាតិនេះ នឹងជួបជាមួយសមាជិកជាន់ខ្ពស់នៃរដ្ឋាភិបាលកម្ពុជាផ្សេងទៀត តំណាងសង្គមស៊ីវិល និងសមាជិកនៃសហគមន៍ការទូតនៅកម្ពុជា។ នៅថ្ងៃទី១៨ សីហា ដែលជាថ្ងៃបញ្ចប់នៃដំណើរទស្សនកិច្ចនៅកម្ពុជាជាថ្មីនេះ លោកស្រីរ៉ូណា ស្មីត នឹងធ្វើសន្និសីទសារព័ត៌មានមួយស្តីពីបេសកម្មរយៈពេល១០ថ្ងៃជាថ្មីនៅកម្ពុជានេះនៅវេលាម៉ោង៣ រសៀលនៅការិយាល័យសិទ្ធិមនុស្សនៃអង្គការសហប្រជាជាតិប្រចាំនៅកម្ពុជាក្នុងរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ