សម រង្ស៊ី-ស ខេង ជួបគ្នានៅថ្ងៃស្អែកពិភាក្សាពីបញ្ហាសេសសល់
អគ្គលេខាធិការដ្ឋានរដ្ឋសភា នៅរសៀលថ្ងៃសុក្រទី ២៧ កុម្ភៈនេះ បានឱ្យដឹងថា ថ្នាក់ដឹកនាំតំណាងរាស្ត្រនៃគណបក្សប្រជាជនកម្ពុជាលោកស ខេង និងលោកសម រង្ស៊ី ប្រធានគណបក្សសង្គ្រោះជាតិនឹងជួបពិភាក្សាគ្នាជាលើកទី២នៅរសៀលថ្ងៃសៅរ៍ទី២៨ កុម្ភៈស្អែកនេះ។ បក្សទាំងពីរបញ្ជាក់បញ្ហាសេសសល់ស្តីពីវិសោធនកម្មច្បាប់តំណាងរាស្ត្រដែលបក្សទាំងពីរបានពិភាក្សាជិតបីខែមកហើយ នឹងត្រូវយកមកដាក់លើតុ។
ចុះផ្សាយនៅថ្ងៃ៖
ស្តាប់ - ០២:៣០
បើគ្មានអ្វីប្រែប្រួលទេ របៀបវារៈស្តីពីចំណុចខ្វែងគំនិតលើវិសោធនកម្មច្បាប់តំណាងរាស្ត្រដែលបក្សទាំងពីរបានបន្សល់ទុកទាំងអស់ នឹងត្រូវលើកឡើងក្នុងកិច្ចប្រជុំទល់មុខគ្នារវាងលោក ស ខេង និងលោក សម រង្ស៊ី។ ជំនួបរវាងប្រធានក្រុមតំណាងរាស្ត្រភាគច្រើន និងភាគតិចនៅក្នុងសភានេះជាលើកទី២នឹងធ្វើឡើងនៅថ្ងៃសៅរទី២៨ កុម្ភៈនេះ នៅវិមានរដ្ឋសភា។ អ្នកនាំពាក្យគណបក្សជាប់ឆ្នោតទាំងពីរបានប្រាប់វិទ្យុបារាំងអន្តរជាតិថា មេដឹកនាំនៃបក្សទាំងពីរនឹងស្វែងរកគន្លឹះចេញពីការខ្វែងគំនិតគ្នាដែលក្រុមការងារបក្សទាំងពីរបានពិភាក្សាតាំងពីខែធ្នូឆ្នាំ២០១៤មក។ កិច្ចពិភាក្សាចុងក្រោយបានធ្វើឡើងនៅល្ងាចថ្ងៃសុក្រទី ២៧ កុម្ភៈនេះ ដោយសម្រចបន្ថែមចំណុចខ្វែងគ្នាចំនួន៥ទៀតដែលធ្វើឱ្យចំណុចខ្វែងគ្នាឡើងដល់ ១៥ចំណុច។ ចំណុចដែលខ្វែងគំនិតគ្នាសេសសល់មានដូចជា ការទាមទារដាក់បញ្ចូល ឬដកចេញនូវមន្ត្រីតុលាការ និងកងកម្លាំងប្រដាប់អាវុធគ្រប់ប្រភេទអាចធ្វើសកម្មភាពនយោបាយ និងការបង្កើនអាសនៈក្នុងរដ្ឋសភា ជាដើម។
គណបក្សសង្គ្រោះជាតិតាមរយៈលោក យឹម សុវណ្ណ បានបញ្ជាក់ថា គណបក្សប្រឆាំងនៅតែប្រកាន់ជំហរទាមទារដកចេញនូវមន្ត្រីតុលាការ យោធា និងកម្លាំងប្រដាប់អាវុធគ្រប់ប្រភេទ ពីសកម្មភាពនយោបាយ។ ដកចេញព្រោះតែអ្នកទាំងនោះគឺជាអ្នកអនុវន្តច្បាប់ និងភារៈកិច្ចឥតលម្អៀង ព្រមទាំងអព្យាក្រឹត ដូចនេះមិនត្រូវប្រកាន់និន្នាការគណបក្សនយោបាយនោះទេ។
ផ្ទុយពីនេះ គណបក្សប្រជាជនកម្ពុជាតាមរយៈលោក ឈឹម ផលវរុន អ្នកនាំពាក្យបានគូសបញ្ជាក់ថាការធ្វើនយោបាយគឺជាសិទ្ធរបស់ពលរដ្ឋខ្មែរដែលមានចែងក្នុងច្បាប់។ អ្នកនាំពាក្យរូបនេះ បានស្នើឱ្យគណបក្សប្រឆាំង និងក្រុមសង្គមស៊ីវិលត្រូវមើលច្បាប់រដ្ឋធម្មនុញ្ញ និងមិនត្រូវចង្អៀតចង្អល់នោះទេ។ មិនចង្អៀតព្រោះថា ការអព្យាក្រឹត ឬមិនអព្យាក្រឹតគឺមើលលើការអនុវត្តច្បាប់តែប៉ុណ្ណោះ។ ត្រង់ចំណុចនេះ លោកនាយករដ្ឋមន្ត្រីក៏ធ្លាប់បានគូសបញ្ជាក់ខ្លាំងៗដែរថា បើមិនដាក់ចំណុចស្តីពីការចូលរួមរបស់កងកម្លាំងប្រដាប់អាវុធ និងមន្ត្រីតុលាកានេះ ក៏លោក មិនព្រមនោះដែរ។
សូមបញ្ជាក់ថា សង្គមស៊ីវិល បានរិះគន់ខ្លាំងៗលើគណបក្សប្រជាជនកម្ពុជាដែលទាមទារដាក់បញ្ចូលមន្ត្រីកងកម្លាំងប្រដាប់អាវុធ និងមន្ត្រីតុលាការឱ្យធ្វើសកម្មភាពនយោបាយផងដែរ។ សូមរំលឹកថា ការជួបប្រជុំគ្នារវាងលោក ស ខេង និងលោក សមរង្ស៊ីនេះ គឺជាលើកទី២ហើយក្រោយរដ្ឋសផាបង្កើតប្រធានក្រុមតំណាងរាស្ត្រនៃបក្សភាគច្រើននិងបក្សភាគតិច។ ហើយក្រុមទាំងពីរគឺនឹងជួបប្រជុំគ្នាសម្រាប់ដោះស្រាយបញ្ហានយោបាយ និងជាការបង្កើតវប្បធម៌សន្ទនា។
គួរកត់សម្គាល់ថា ជំនួបរវាងលោក ស ខេង និងលោក សម រង្ស៊ីនេះ នៅថ្ងៃសៅរ៍ទី២៨កុម្ភៈនេះ ទំណងជាជំនួបតឹងតែងព្រោះថានៅចំណុចធំៗជាច្រើនដែលបក្សទាំងពីរប្រកាន់គោលជំហរដាច់ខាតដាក់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ