លោកសម រង្ស៊ី៖ លោកហ៊ុន សែន កំពុងប្រើវិធីសាស្ត្រហិង្សារក្សាអំណាច
បន្ទាប់ពីតំណាងរាស្ត្រពីររូបរបស់ខ្លួនរងការវាយដំយ៉ាងធ្ងន់ធ្ងរពីមនុស្សមួយក្រុមនៅក្នុងអំឡុងពេលបាតុកម្មទាមទាទម្លាក់លោកកឹម សុខា កាលពីព្រឹកថ្ងៃចន្ទម្សិលមិញ លោកសម រង្ស៊ី បានចាត់ទុកបាតុកម្មហិង្សានោះថា គឺជាការឆ្លើយតបពីសំណាក់គណបក្សកាន់អំណាចទៅនឹងបាតុកម្មប្រឆាំងលោក ហ៊ុន សែន នៅក្នុងទីក្រុងប៉ារីស ប្រទេសបារាំង។ ជាងនេះទៀតនោះ ប្រមុខបក្សប្រឆាំង ថែមទាំងចោទលោកហ៊ុន សែនថា កំពុងប្រើវិធីសាស្ត្រស្រដៀងនឹងពួកហ្វាស៊ីស្ត (fascit) នៅប្រទេសអ៊ីតាលី ដើម្បីរក្សាអំណាច។ ប៉ុន្តែអ្នកនាំពាក្យគណបក្សប្រជាជនកម្ពុជា បានប្រតិកម្មថា ការលើកឡើងរបស់លោកសម រង្ស៊ី នេះ គឺខុសសម័យកាល។
ចុះផ្សាយនៅថ្ងៃ៖
ស្តាប់ - ០២:២៦
តាមរយៈទំព័រហ្វេសប៊ុកផ្លូវការរបស់ខ្លួន លោកសម រង្ស៊ី ប្រមុខគណបក្សប្រឆាំងកម្ពុជាដែលកំពុងស្ថិតនៅឯប្រទេសបារាំង កាលពីយប់ថ្ងៃចន្ទបានបរិហារថា បាតុកម្មរបស់ក្រុមអ្នកគាំទ្រលោក ហ៊ុន សែន នៅក្នុងប្រទេសកម្ពុជាតែងតែប្រើអំពើហិង្សា ដើម្បីបំភិតបំភ័យដូចអ្វីដែលលោក ហ៊ុន សែន ខ្លួនឯងបានបំភិតបំភ័យប្រជាពលរដ្ឋក្នុងពេលថ្មីៗនេះ ដោយប្រកាសថា នឹងមានសង្គ្រាមបើសិនណាគណបក្សប្រឆាំងឈ្នះឆ្នោតនោះ។
បើតាមលោកសម រង្ស៊ី លោក ហ៊ុន សែន ហាក់ដូចជាចង់រកលេសប្រើអំពើហិង្សាកាន់តែច្រើន ដើម្បីបង្កើតព្រឹត្តិការណ៍អវិជ្ជមាននិងអធម្មនុញ្ញ ក្នុងគោលបំណងជៀសវាងការបោះឆ្នោតខាងមុខ។ ការបោះឆ្នោត ដែលប្រធានគណបក្សសង្គ្រោះជាតិ ជឿថា លោកហ៊ុន សែន ប្រធានគណបក្សប្រជាជនកម្ពុជាមិនអាចឈ្នះបាននោះទេនៅក្នុងឆ្នាំ ២០១៧ និង ឆ្នាំ ២០១។ លោកសម រង្ស៊ី ថែមទាំងចោទ លោកហ៊ុន សែន ថា ដើម្បីរក្សាអំណាចបានច្រើនឆ្នាំទៅមុខទៀត ប្រមុខរដ្ឋាភិបាលកម្ពុជាបច្ចុប្បន្នកំពុងប្រើវិធីសាស្ត្រស្រដៀងពួកហ្វាស៊ីស្ត (fascit) នៅប្រទេសអ៊ីតាលី ដែលចូលចិត្តប្រើអំពើហិង្សាទៅលើអ្នកតំណាងរាស្ត្រនិងអ្នកដទៃទៀតកាលពីចន្លោះឆ្នាំ ១៩២២ ដល់ឆ្នាំ ១៩៤៥។
លោកសុខ ឥសាន អ្នកនាំពាក្យគណបក្សប្រជាជនកម្ពុជា បានច្រានចោលការចោទប្រកាន់នេះ ដោយប្រតិកម្មថា លោកសម រង្ស៊ី ហាក់ដូចជាមិនបានយល់ដឹងជ្រៅជ្រះពីប្រវត្តិសាស្ត្រនោះទេ ព្រោះថាមកដល់ពេលនេះទៅហើយ ប្រមុខបក្សប្រឆាំង បែរជានិយាយពីពួកហ្វាស៊ីស្តនោះទៅវិញ។ បើតាមអ្នកនាំពាក្យរូបនេះ បាតុកម្មទាមទារទម្លាក់លោកកឹម សុខា ពីតំណែងអនុប្រធានទី១នៃរដ្ឋសភា និង អំពើហិង្សាលើអ្នកតំណាងរាស្ត្រពីរនាក់របស់គណបក្សសង្គ្រោះជាតិកាលពីថ្ងៃចន្ទ គឺជារឿងពីរផ្សេងពីគ្នា ។ ផ្សេងពីគ្នា ព្រោះថា អំពើហិង្សាបានកើតឡើង បន្ទាប់ពីបាតុកម្មបានបញ្ចប់។ ជាមួយគ្នានេះ លោកសុខ ឥសាន បានគូសបញ្ជាក់ថា បាតុកម្មនោះ គឺមិនមែនគណបក្សប្រជាជនកម្ពុជា ជាអ្នករៀបចំឡើងនោះឡើយ។
សូមបញ្ជាក់ថា កាលពីព្រឹកថ្ងៃទី២៦ តុលាម្សិលមិញ ប្រជាពលរដ្ឋប្រមាណជាង២ពាន់នាក់ បានប្រមូលផ្តុំគ្នានៅខាងមុខរដ្ឋសភាជាតិ ដើម្បីទាមទារឲ្យលោកកឹម សុខា ចុះចេញពីតំណែង។ ក៏ប៉ុន្តែនៅម៉ោងប្រមាណ១២ និង ៣០ នាទី គឺមានបាតុភាពមួយបានកើតឡើង នោះ គឺអ្នកតំណាងគណបក្សប្រឆាំងពីររូប គឺលោក ញ៉យ ចំរើន និង លោកគង់ សុភា ត្រូវបានមនុស្សមួយក្រុមព្រួតគ្នាវាយដំយ៉ាងធ្ងន់ធ្ងរ។
គណបក្សសង្គ្រោះជាតិ អង្គការសិទ្ធិមនុស្ស ស្ថានទូតអាមេរិក រួមទាំងតំណាងរាស្ត្រគណបក្សប្រជាជនកម្ពុជា បានថ្កោលទោស និង បានអំពាវនាវឲ្យអាជ្ញាធរ ស្វែងរកជនដៃដល់ ដើម្បីចាត់ការទៅតាមផ្លូវច្បាប់។ ចំណែកតំណាងរាស្ត្រទាំងពីរនៅពេលនេះ ត្រូវបានបញ្ជូនទៅព្យាបាលនៅក្នុងប្រទេសថៃ ហើយរាល់ការចំណាយទាំងអស់ គឺជាបន្ទុករបស់រដ្ឋសភា។ នេះបើតាមការបញ្ជាក់របស់លោកឈាង វន់ អ្នកនាំពាក្យរបស់រដ្ឋសភាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ