សម្តេចក្រុមព្រះ៖“សម្តេចនាយករដ្ឋមន្ត្រីហ៊ុន សែនចង់ធ្វើអី ខ្ញុំគាំទ្រលោកទាំងអស់”
គណបក្សហ្វ៊ុនស៊ិនប៉ិចនៅព្រឹកនេះ បានរៀបចំសមាជវិសាមញ្ញរបស់ខ្លួនដើម្បីផ្លាស់ប្តូររូបសញ្ញាថ្មីរបស់គណបក្ស និងកែសម្រួលលក្ខន្តិកៈមួយចំនួនដើម្បីឲ្យស្របទៅតាមច្បាប់ស្តីពីគណបក្សនយោបាយ។ សមាជវិសាមញ្ញនេះ ធ្វើឡើងក្រោមវត្តមានរបស់សម្តេចក្រុមព្រះ នរោត្តម រណឬទ្ធិ ព្រះប្រធានគណបក្សហ្វ៊ុនស៊ិនប៉ិច។ ក្រោយបញ្ចប់សមាជដ៏កម្រនេះ សម្តេចក្រុមព្រះបានមានព្រះបន្ទូលប្រាប់អ្នកកាសែតថា សម្តេចគាំទ្រលោកនាយករដ្ឋមន្ត្រីហ៊ុន សែន ទាំងអស់ បើទោះបីលោកចង់ធ្វើអ្វីក៏ដោយ។
ចុះផ្សាយនៅថ្ងៃ៖
ស្តាប់ - ០២:១៩
ព្រះបន្ទូលរបស់សម្តេចក្រុមព្រះនរោត្តម រណឬទ្ធិ ព្រះប្រធានគណបក្សហ្វ៊ុនស៊ិនប៉ិចនេះ គឺជាការឆ្លើយតបទៅនឹងសំណួររបស់អ្នកកាសែតដែលចោទសួរអំពីការយល់ឃើញរបស់ព្រះអង្គចំពោះស្ថានភាពនយោបាយបច្ចុប្បន្ន។ ស្ថានភាពនយោបាយបច្ចុប្បន្ន ដែលគណបក្សធំៗទាំងពីរ គឺគណបក្សប្រជាជនកម្ពុជាដែលមានលោកនាយករដ្ឋមន្ត្រីហ៊ុន សែន ជាប្រធាន និងគណបក្សសង្គ្រោះជាតិដែលដឹកនាំដោយលោកកឹម សុខា កំពុងមើលមុខគ្នាមិនចំ។ មិនចំ គឺដោយសាររដ្ឋាភិបាលកម្ពុជារបស់គណបក្សប្រជាជនកម្ពុជាបានចោទលោកកឹម សុខាថា បានឃុបឃិតជាមួយបរទេសធ្វើសកម្មភាពក្បត់ជាតិហើយបានចាប់ឃុំខ្លួននៅក្នុងពន្ធនាគារភ្លាមៗតែម្តង។
ចំពោះការចាប់ខ្លួនលោកកឹម សុខានេះ សម្តេចក្រុមព្រះក៏បានចំអកដាក់លោកកឹម សុខា ផងដែរដោយបានព្រលយពាក្យថា មនុស្សដែលស្នេហាជាតិពិតប្រាកដមែននោះ គេមិនដែលទៅពឹងបរទេសឲ្យមកជួយនោះទេ។ គឺបន្ទាប់ពីបានលើកឡើងដូច្នេះ សម្តេចក្រុមព្រះទ្រង់ក៏បានប្រកាសថា ព្រះអង្គគាំទ្រចំពោះការសម្រេចទាំងអស់របស់លោកនាយករដ្ឋមន្ត្រីហ៊ុន សែនចំពោះចំណាត់ការលើប្រធានគណបក្សប្រឆាំងនេះ។
សម្តេចក្រុមព្រះបានប្រកាសជំហរបែបនេះ នៅក្នុងពេលដែលគណបក្សរាជានិយមហ្វ៊ុនស៊ិនប៉ិច បានធ្វើសមាជវិសាមញ្ញ ដើម្បីកែប្រែនូវចំណុចនានារបស់បក្សឲ្យស្របនឹងច្បាប់ស្តីពីគណបក្សនយោបាយ។ នៅក្នុងសមាជនេះ គណបក្សហ្វ៊ុនស៊ិនប៉ិចបានសម្រេចដករូបភាពសម្តេចក្រុមព្រះចេញពីរូបសញ្ញាគណបក្ស និងប្រើប្រាស់ទង់គណបក្សថ្មីផងដែរ។
សូមបញ្ជាក់ថា សមាជរបស់គណបក្សហ្វ៊ុនស៊ិនប៉ិចនេះ ធ្វើឡើងបន្ទាប់ពីក្រសួងមហាផ្ទៃបានតម្រូវឲ្យគណបក្សរាជានិយមមួយនេះ ផ្លាស់ប្តូររូបសញ្ញាសម្គាល់គណបក្សដែលមានរូបភាពសម្តេចក្រុមព្រះដែលផ្ទុយនឹងខ្លឹមសារនៃច្បាប់ស្តីពីគណបក្សនយោបាយ។ ច្បាប់ស្តីពីគណបក្សនយោបាយដែលបានធ្វើវិសោធនកម្មដល់ពីដងជាបន្តបន្ទាប់នេះ មិនអនុញ្ញាតឱ្យគណបក្សនយោបាយណាមួយនៅក្នុងប្រទេសកម្ពុជាប្រើប្រាស់ឈ្មោះ ឬរូបរបស់រូបវ័ន្តបុគ្គល នៅក្នុងឈ្មោះឬរូបសញ្ញាគណបក្សនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ