លោកសុខ អាន៖ រដ្ឋាភិបាលកម្ពុជា គ្មានសមត្ថកិច្ចទៅលូកដៃក្នុងសាលាក្តីខ្មែរក្រហមទេ
តំណាងរដ្ឋាភិបាលកម្ពុជា លោកសុខ អាន បានបញ្ជាក់ជាថ្មីថា រដ្ឋាភិបាលកម្ពុជា គ្មានសមត្ថកិច្ចទៅលូកដៃក្នុងសាលាក្តីខ្មែរក្រហមនោះទេ។ សាលាក្តីខ្មែរក្រហម ដែលរហូតដល់ពេលនេះ បន្តខ្វែងយោបល់គ្នា រវាងភាគីជាតិ និងអន្តរជាតិ លើសំណុំរឿងថ្មីពីរទៀត គឺ០០៣ និង០០៤ ដែលជាការពង្រីកសំណុំរឿង កាត់ទោសលើអតីតមេដឹកនាំខ្មែរក្រហម។ ការខ្វែងយោបល់នោះ ត្រូវបានលោកសុខអាន ចាត់ទុកថា ជាបញ្ហាផ្ទៃក្នុង នៅសាលាក្តីខ្មែរក្រហម ប៉ុន្តែលោកថា រដ្ឋាភិបាលកម្ពុជា នៅតែបន្តសហប្រតិបត្តិការល្អជាមួយអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:៣៦
គឺជាជំហរចុងក្រោយ ដែលមិនខុសពីមុនទេ ដែលបញ្ជាក់ដោយលោកសុខអាន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី និងជាប្រធានក្រុមការងារសាលាក្តីខ្មែរក្រហម តំណាងរដ្ឋាភិបាលកម្ពុជា។
ក្នុងពិធីសម្ពោធបូជនីយដ្ឋាននៃការចងចាំ និងរំឭកវិញ្ញាណក្ខន្ធដល់ជនរងគ្រោះ ក្នុងរបបកម្ពុជាប្រជាធិបតេយ្យ ដែលបានសាងសង់នៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង នាព្រឹកថ្ងៃទី២៦មីនានេះ លោកសុខ អាន បានលើកឡើងថា រដ្ឋាភិបាលកម្ពុជា និងអង្គការសហប្រជាជាតិ បានកំណត់មុខសញ្ញាច្បាស់ហើយថា យើងកាត់ទោសតែមេដឹកនាំកំពូល និងអ្នកដែលទទួលខុសត្រូវខ្ពស់បំផុត។ ដូច្នេះបើឲ្យតែអ្នកខុសទាំងអស់ យើងមកកាត់ទោស នោះវានាំឲ្យមានភាពច្របូកច្របូល។
ពាក់ព័ន្ធនឹងការខ្វែងយោបល់គ្នាលើការពង្រីកវិសាលភាពកាត់ទោសអតីតមេខ្មែរក្រហម បន្ថែមទៀត ក្នុងសំណុំរឿង០០៣ និង ០០៤ ត្រូវបានលោក សុខ អាន ឆ្លើយតបនឹងសំណួរអ្នកកាសែតថា រដ្ឋាភិបាលកម្ពុជា មិនអាចទៅអន្តរាគមន៍អ្វីទេ មានតែរង់ចាំស្តាប់ចៅក្រមជជែកគ្នា ពោលគឺទុកឲ្យតុលាការ ជាអ្នកធ្វើការ។
លោក សុខ អាន បានបញ្ជាក់ថា “យើងនៅតែសហប្រតិបត្តិការល្អជាមួយនឹងអង្គការសហប្រជាជាតិ ហើយខ្ញុំសូមបញ្ជាក់ថា នេះជាបញ្ហាផ្ទៃក្នុងរបស់តុលាការ ECCC ហើយរដ្ឋាភិបាល គ្មានសមត្ថកិច្ចទៅលូកដៃនៅក្នុងការងារផ្ទៃក្នុងរបស់យុត្ថាធិការនេះទេ។ អីចឹង អ្វីដែលកំពុងកើតឡើង ជាការពិគ្រោះពិភាក្សារវាងចៅក្រមស៊ើបអង្កេត ទាំងពីរ ដែលកំពុងធ្វើការងារនេះ ហើយចៅក្រម គាត់មានយោបល់ មិនដូចគ្នា មិនមែនមានន័យថា គាត់ទាស់គ្នា ឈប់សហការទេ។ សហប្រតិបត្តិការគាត់ នៅតែបន្តធម្មតា។
នៅព្រឹកមិញ លោកសុខអាន ក៏បានច្រានចោលរបាយការណ៍របស់អង្គការ Human Rights Watch។ លោកចាត់ទុកថាជាចំរៀងចាស់ ដោយពីមុន អង្គការអន្តរជាតិនេះ រិះគន់ត្រឹមតែរដ្ឋាភិបាល តែពេលនេះ ទិតៀនដល់អង្គការសហប្រជាជាតិ។ Human Rights Watch បានលើកឡើងថា រដ្ឋាភិបាលកម្ពុជា រារាំង មិនឲ្យសំណុំរឿង០០៣ និង០០៤ ចេញរួច ហើយអង្គការសហប្រជាជាតិ គួរតែដកខ្លួន ចេញពីសាលាក្តីចម្រុះ ដែលបង្កើតកាលពីឆ្នាំ២០០។
សំណុំរឿង០០៣ និង០០៤ ពេលនេះ ស្ថិតនៅក្នុងដៃរបស់សហចៅក្រមស៊ើបអង្កេត អន្តរជាតិ ខណៈដែលភាគីជាតិ ទាំងសហព្រះរាជអាជ្ញា និងទាំងសហចៅក្រមស៊ើបអង្កេតជាតិ មិនយល់ព្រមឲ្យដំណើរលើសំណុំរឿងថ្មីទាំងពីរនោះឡើយ។
ចុងក្រោយនេះ កាលពីថ្ងៃទី៣មីនា សហចៅក្រមស៊ើបអង្កេតអន្តរជាតិ បានប្រកាសដាក់ឲ្យលោក មាស មុត និងលោកស្រី អ៊ឹម ចែម ស្ថិតក្រោមការពិនិត្យដោយកំបាំងមុខ ក្នុងសំណុំរឿង០០៣ និងសំណុំរឿង០០៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ