តុលាការកំពូលនៅតែសម្រេចឲ្យលោកឈូក បណ្ឌិត ជាប់ពន្ធនាគារ
នៅព្រឹកថ្ងៃសុក្រនេះ តុលាការកំពូល បានបើកសវនាការលើបណ្តឹងសារទុក្ខសំណុំរឿងអតីតអភិបាលក្រុងបាវិត លោកឈូក បណ្ឌិតដែលបានបាញ់ប្រហារលើកម្មការិនី៣ រូបកាលពីជាងពីរឆ្នាំមុន។ បន្ទាប់ពីធ្វើការជំនុំជម្រះពេញមួយព្រឹកមក ចៅក្រមតុលាការកំពូលបានប្រកាសសម្រេចតម្កល់សាសក្រមរបស់តុលាការសាលាដំបូងខេត្តស្វាយរៀងដដែល។ ជាសាលក្រមដែលសម្រេចឲ្យលោកឈូក បណ្ឌិត ជាប់ពន្ធនាគារ១ឆ្នាំកន្លះ និងបង់ប្រាក់សំណងដល់ជនរងគ្រោះសរុប៣៨លានរៀល។
ចុះផ្សាយនៅថ្ងៃ៖
ស្តាប់ - ០២:២១
ក៏មិនខុសពីតុលាការសាលាឧទ្ធរណ៍ដែរ ចៅក្រមតុលាការកំពូល បានប្រកាសតម្កល់សេចក្តីសម្រេចរបស់សាលាដំបូងខេត្តស្វាយរៀងលើសំណុំរឿងលោកឈូក បណ្ឌិត អតីតអភិបាលក្រុងបាវិត ដែលបានបាញ់ប្រហារលើកម្មការិនី៣ រូបឲ្យមានរបួសកាលពីជាងពីរឆ្នាំមុន។ សំណុំរឿងលោកឈូក បណ្ឌិតនេះ ត្រូវបានតុលាការកំពូលលើកមកធ្វើការជំនុំជម្រះនៅថ្ងៃសុក្រនេះ តាមបណ្តឹងសារទុក្ខរបស់ក្រុមមេធាវីការពារក្តីទាំងសងខាង។ ក៏ប៉ុន្តែនៅក្នុងសវនាការនោះ មិនមានវត្តមានលោកឈូក បណ្ឌិត នោះទេ គឺមានតែជនរងគ្រោះដែលជាកម្មការិនី និង មេធាវីការពារក្តីទាំងសងខាងប៉ុណ្ណោះ។
សូមជំរាបជូនថា លោកឈូក បណ្ឌិត អតីតអភិបាលក្រុងបាវិតត្រូវបានចៅក្រមសាលាដំបូងខេត្តស្វាយរៀង បានកាត់ទោស ឲ្យជាប់ពន្ធនាគារ រយៈពេល ១ឆ្នាំកន្លះនិង បង់ប្រាក់សំណង ទៅឲ្យជនរងគ្រោះទាំង៣នាក់សរុប ៣៨លានរៀល។ តុលាការបានចោទប្រកាន់លោកឈូក បណ្ឌិត ពីបទបង្ករបួសស្នាមដោយអចេតនាលើកម្មការិនីបីរូបនៅក្នុងបាតុកម្មមួយក្នុង តំបន់សេដ្ឋកិច្ចពិសេស ក្រុងបាវិត កាលពីអំឡុងខែកុម្ភៈ ឆ្នាំ២០១២កន្លងទៅ។ តុលាការកំពូលបានបិទផ្លូវតវ៉ា និងបានកំណត់ឲ្យអនុវត្តតាមសេចក្តីសម្រេចនេះ។
ក៏ប៉ុន្តែលោកអំ សំអាត ប្រធានបច្ចេកទេសឃ្លាំមើលការរំលោភសិទ្ធិមនុស្សរបស់អង្គការលីកាដូដែលបានចូលរួមតាមដានសវនាការនោះ យល់ថា ការសម្រេចនេះមិនទាន់ផ្តល់យុត្តិធម៌ពេញលេញដល់ជនរងគ្រោះទាំងអស់នោះនៅឡើយទេ។ មិនពេញលេញ ព្រោះថា សំណងដល់ពួកគេមិនសមស្របនឹងស្ថានភាពរងគ្រោះ ហើយការកំណត់ឲ្យជាប់ពន្ធនាគារត្រឹមមួយឆ្នាំកន្លះនេះទៀតសោត គឺមិនសមាមាត្រនឹងអ្វីដែលលោកឈូក បណ្ឌិតបានប្រព្រឹត្តិនោះដែរ។
ថ្វីត្បិតតុលាការកំពូលបានសម្រេចបែបនេះក៏ដោយ ប៉ុន្តែចាប់តាំងពីសាលាដំបូងខេត្តស្វាយរៀងបានផ្តន្ទាទោសលោកឈូក បណ្ឌិតមក អតីតអភិបាលក្រុងបាវិតរូបនេះនៅមិនទាន់ត្រូវបានអាជ្ញាធរនាំខ្លួនមកអនុវត្តទោសនៅឡើយទេ។ លោកមឿន តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ដែលបានតាមដានសំណុំរឿងនេះយ៉ាងដិតដល់ បានសម្តែងការខកចិត្តចំពោះអាជ្ញាធរមានសមត្ថកិច្ចដែលលោកយល់ថា មិនមានឆន្ទៈក្នុងការចាត់វិធានការលោកឈូក បណ្ឌិត។ លោកមឿន តុលា សង្កត់ធ្ញន់ថា អាជ្ញាធរមិនមានចេតនាចាប់ខ្លួនលោកឈូក បណ្ឌិតនេះ តាំងពីដើមឡើយមកម្លេះ។
យ៉ាងណាក៏ដោយ លោកខៀវ សុភ័គ អ្នកនាំក្រសួងមហាផ្ទៃ បានថ្លែងប្រាប់វិទ្យុបារាំងអន្តរជាតិថា អាជ្ញាធរមិនមែននៅស្ងៀមនោះទេ ចំពោះករណីលោកឈូក បណ្ឌិតនេះ។ អ្នកនាំពាក្យរូបនេះ បានបញ្ជាក់ថា អាជ្ញាធរនៅតែបន្តការខិតខំស្វែងរកចាប់ខ្លួនលោកឈូក បណ្ឌិត មកអនុវត្តទោសតាមការសម្រេចរបស់តុលាការ ក៏ប៉ុន្តែលោកមិនបានបញ្ជាក់ទេថា នឹងអាចរកឃើញលោកឈូក បណ្ឌិតនៅពេលណានោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ