ទេសចរណ៍ និងវប្បធម៌ ក្លាយជារបៀបវារៈនៃការអភិវឌ្ឍន៍ក្រោយឆ្នាំ២០១៥
សន្និសីទពិភពលោកស្តីពីទេសចរណ៍ និងវប្បធម៌ បានបិទបញ្ចប់ជាផ្លូវការម្សិលមិញហើយ ប៉ុន្តែបើតាមកម្មវិធីនៃព្រឹត្តិការណ៍លើទឹកដីអង្គរនោះ ថ្ងៃសុក្រនេះទើបជាថ្ងៃបង្ហើយ ត្បិតដំណើរទស្សនកិច្ចបច្ចេកទេសគឺជាសកម្មភាពដែលត្រូវធ្វើពេញមួយព្រឹកនេះ។ រដ្ឋមន្ត្រីទេសចរណ៍កម្ពុជា ថោង ខុន បានបង្ហាញលទ្ធផលសំខាន់ៗនៃសន្និសីទរយៈពេល៣ថ្ងៃនោះ កាលពីថ្ងៃព្រហស្បតិ៍។ លទ្ធផលដែលបង្ហាញថា វិស័យទេសចរណ៍ និងវប្បធម៌ នឹងក្លាយជារបៀបវារៈនៃការអភិវឌ្ឍន៍ក្រោយឆ្នាំ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
សន្និសីទពិភពលោកស្តីពីទេសចរណ៍ និងវប្បធម៌ ដែលបានប្រព្រឹត្តទៅពីថ្ងៃទី០៤ ដល់ថ្ងៃទី០៦ ខែកុម្ភៈ ឆ្នាំ២០១៥ នៅខេត្តសៀមរាប បានដាក់ចេញនូវ«សេចក្តីថ្លែងការណ៍សៀមរាបស្តីពីទេសចរណ៍ និងវប្បធម៌»។
ក្នុងពិធីបិទព្រឹត្តិការណ៍ដែលសហការផ្តួចផ្តើមដោយអង្គការទេសចរណ៍ពិភពលោក និងអង្គការយូណេស្កូ រដ្ឋមន្ត្រីទេសចរណ៍កម្ពុជាគូសបញ្ជាក់ នៅថ្ងៃព្រហស្បតិ៍ថា សេចក្តីថ្លែងការណ៍សៀមរាបស្តីពីទេសចរណ៍ និងវប្បធម៌នោះ«ជាធាតុចូលដ៏មានសារៈសំខាន់បន្ថែមទៀតសម្រាប់ការរៀបចំការអភិវឌ្ឍវិស័យទេសចរណ៍ និងវប្បធម៌ប្រកបដោយនិរន្តរភាព និងការទទួលខុសត្រូវ ជាពិសេសការធ្វើសមាហរណកម្មវិស័យទេសចរណ៍ និងវប្បធម៌ទៅក្នុងរបៀបវារៈនៃការអភិវឌ្ឍក្រោយឆ្នាំ២០១៥»។
ទន្ទឹមនឹងនេះដែរ បើតាមលោក ថោង ខុន សេចក្តីថ្លែងការណ៍ដដែលនោះ ក៏ចាំបាច់«សម្រាប់ការបង្កើតឱ្យមានយន្តការស្ថាប័ន ដោយរៀបចំរចនាសម្ព័ន្ធថ្នាក់ជាតិ ថ្នាក់តំបន់ និងថ្នាក់មូលដ្ឋាន ក្នុងការជំរុញការអភិវឌ្ឍរួមគ្នានៃវិស័យទេសចរណ៍ និងវប្បធម៌ សំដៅសម្រេចបាននូវការអភិរក្សសម្បត្តិបេតិកភណ្ឌវប្បធម៌ សម្រាប់ជាប្រយោជន៍ដល់ការអភិវឌ្ឍវិស័យទេសចរណ៍ ការបែងចែកផលប្រយោជន៍ប្រកបដោយសមធម៌ ស្របតាមទស្សនាទាន ‘ទេសចរណ៍សម្រាប់ទាំងអស់គ្នា ទាំងអស់គ្នាដើម្បីទេសចរណ៍’»។
សន្និសីទពិភពលោកលើទឹកដីអង្គររយៈពេល៣ថ្ងៃ ដែលមានអ្នកចូលរួម១១០០នាក់ មកពី៩៩ប្រទេស បានឆ្លងកាត់កិច្ចសន្ទនាថ្នាក់រដ្ឋមន្ត្រី៣៨ប្រទេសស្តីពីការកសាងភាពជាដៃគូថ្មីមួយ និងកិច្ចពិភាក្សាថ្នាក់បច្ចេកទេសក្រោមប្រធានបទ៤ផ្សេងទៀត ជាក់ស្តែងគឺ៖ ១) ការលើកស្ទួយ និងការការពារវប្បធម៌ ២) ភាពគង់វង្សនៃវប្បធម៌ និងឧស្សាហកម្មសិល្បៈច្នៃប្រឌិត ៣) ការផ្សារភ្ជាប់ប្រជាពលរដ្ឋ និងការលើកកម្ពស់ការអភិវឌ្ឍតាមរយៈវប្បធម៌ និង៤) ទេសចរណ៍វប្បធម៌ និងការអភិវឌ្ឍទីក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ