អាជ្ញាធរខេត្តកំពង់ឆ្នាំង៖ ជនជាតិវៀតណាមជាង២០០០គ្រួសារផ្លាស់ទីឡើងលើគោកជិតអស់ហើយ
អាជ្ញាធរខេត្តកំពង់ឆ្នាំងបានអះអាងនៅថ្ងៃពុធទី១០តុលានេះថា ជនជាតិវៀតណាមដែលរស់នៅផ្ទះបណ្ដែតទឹកក្នុងបឹងទន្លេសាបជាង២០០០គ្រួសារ បានផ្លាស់ទីឡើងមករស់នៅលើគោកស្ទើរតែស្រុងហើយ គិតមកដល់ថ្ងៃនេះ។ គ្រួសារដែលនៅសេសសល់ នឹងចាប់ផ្ដើមឡើងគោកជាបន្តបន្ទាប់ នៅថ្ងៃព្រហស្បតិ៍ស្អែក ពោលគឺក្រោយពិធីបុណ្យភ្ជុំបិណ្ឌបិទបញ្ចប់។
ចុះផ្សាយនៅថ្ងៃ៖
អាជ្ញាធរខេត្តកំពង់ឆ្នាំង ចំណាយពេល១០ថ្ងៃគត់ ពោលគឺចាប់ពីថ្ងៃទី០១ដល់ថ្ងៃទី១០ខែតុលា ដើម្បីផ្លាស់ទីជនជាតិវៀតណាមជាង២០០០គ្រួសារនៅផ្ទះបណ្ដែតទឹកក្នុងបឹងទន្លេសាប ឡើងមករស់នៅលើគោក។ នេះបើតាមលោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង។ បើតាមលោកអភិបាលរងខេត្ត ជនជាតិវៀតណាមជាង២០០០គ្រួសារនេះ ផ្លាស់ទីចេញពីគោលដៅចំនួន៦នៅទូទាំងខេត្តកំពង់ឆ្នាំង រួមមាន៖ ឃុំឆ្នុកទ្រូ ឃុំកំពង់ប្រាសាទ ស្រុកកំពង់លែង និងក្រុងកំពង់ឆ្នាំងជាដើម។
សម្រាប់ក្រុងកំពង់ឆ្នាំង មានជនជាតិវៀតណាម ៩៩៦ គ្រួសាររស់នៅលើផ្ទះបណ្ដែតទឹក ដែលត្រូវផ្លាស់ទៅរស់នៅលើដីទំហំជាង ៤០ ហិកតាក្នុងឃុំស្វាយជ្រុំ ស្រុករលាប្អៀរ ដែលអាជ្ញាធរខេត្តបានសុំធ្វើអនុបយោគពីរាជរដ្ឋាភិបាល ដោយកាត់ចេញពីតំបន់ដីលិចទឹក។ ក្នុងនោះ ជនជាតិវៀតណាមមួយចំនួន សុំស្នាក់នៅបណ្ដោះអាសន្ននៅលើទឹកសិន ទម្រាំដល់អាជ្ញាធររៀបចំរចនាសម្ព័ន្ធនៅលើគោករួចរាល់។
ទាក់ទងរចនាសម្ព័ន្ធ លោក ស៊ុន សុវណ្ណរិទ្ធ គូសបញ្ជាក់ថា អាជ្ញាធរកំពុងសហការរៀបចំបណ្ដើរៗជាមួយសមាគមវៀតណាមនៅកម្ពុជាដោយមាន៖ សាលារៀន មន្ទីរពេទ្យ ប្រព័ន្ធទឹកស្អាត បណ្ដាញអគ្គិសនី និងផ្លូវថ្នល់ជាដើម។
សូមបញ្ជាក់ថា ការផ្លាស់ទីជនជាតិវៀតណាមឡើងមកនៅលើគោកនេះ ស្ថិតនៅក្នុងផែនការការងារ៥ឆ្នាំរបស់ខេត្តកំពង់ឆ្នាំង ចាប់ពីឆ្នាំ២០១៥ដល់ឆ្នាំ២០១៩។ ក្រោយប្រតិបត្តិការផ្លាស់ទីបិទបញ្ចប់ទាំងស្រុង អាជ្ញាធរនឹងចាប់ផ្ដើមសំអាតបរិស្ថានតំបន់បឹងទន្លេសាប មុននឹងកែច្នៃឲ្យក្លាយទៅជាតំបន់ទេសចរណ៍ដ៏ទាក់ទាញ តាមរយៈការចិញ្ចឹមត្រី។
ជាការកត់សម្គាល់ វត្តមានរបស់ជនជាតិវៀតណាមរាប់ពាន់គ្រួសារនៅលើបឹងទន្លេសាប ដែលជាជង្រុកត្រីរបស់ខ្មែររាប់ទសវត្សរ៍មកហើយនោះ ត្រូវបានអង្គការសង្គមស៊ីវិលរិះគន់ថា បានធ្វើឲ្យខូចខាតដល់ផលប្រយោជន៍ធនធានធម្មជាតិរបស់ខ្មែរ តាមរយៈការបោះកាកសំណល់ចោលទៅក្នុងទឹក ការបង្ហៀរប្រេងម៉ាស៊ីនកាណូតជារៀងរាល់ថ្ងៃ និងការបំពុលបរិស្ថានផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ