រដ្ឋមន្ត្រីសង្គមកិច្ចត្រូវបានអ្នកតំណាងរាស្ត្រកោះហៅឱ្យទៅបំភ្លឺរឿងជនពិការ
គណៈកម្មការសង្គមកិច្ចនៃរដ្ឋសភា ដែលដឹកនាំដោយអ្នកស្រី កែ សុវណ្ណរតន៍ បានកោះហៅលោក វង សូត្រ រដ្ឋមន្ត្រីក្រសួងសង្គមកិច្ច ឱ្យទៅបំភ្លឺនៅរសៀលថ្ងៃព្រហស្បតិ៍នេះ អំពីបញ្ហាជនពិការ។ អ្នកស្រី កែ សុវណ្ណរតន៍ បានអះអាងអំពីចំណុចលម្អិតនានា ដែលសមាជិកគណៈកម្មការទី៨នៃរដ្ឋសភាចង់ស្តាប់ ព្រមទាំងបានបង្ហាញសេចក្តីសង្ឃឹមថា ជនពិការនៅតាមមណ្ឌលនឹងទទួលបានការយកចិត្តទុកដាក់ពីរដ្ឋាភិបាលប្រសើរជាងបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ជនពិការនៅកម្ពុជាអាចសប្បាយចិត្ត ប្រសិនបើការកោះហៅរដ្ឋមន្ត្រីសង្គមកិច្ច អតីតយុទ្ធជន និងយុវនីតិសម្បទា ឱ្យទៅបំភ្លឺនៅចំពោះមុខគណៈកម្មការរដ្ឋសភាជាតិ នឹងធ្វើឱ្យលក្ខខណ្ឌជីវិតរបស់ខ្លួនបានប្រសើរ។
អ្នកស្រី កែ សុវណ្ណរតន៍ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្ដុះបណ្ដាលវិជ្ជាជីវៈ និងកិច្ចការនារី បានប្រាប់ឱ្យដឹងថា ការអញ្ជើញលោក វង សូត្រ ឱ្យចូលបំភ្លឺអ្នកតំណាងរាស្ត្រ មានគោលបំណងបីធំ។ គណៈកម្មការទី៨នៃរដ្ឋសភានេះ ចង់ស្តាប់ជាពិសេសអំពីការអនុវត្តច្បាប់ឆ្នាំ២០០៩ ស្តីអំពីកិច្ចការពារ និងលើកកម្ពស់សិទ្ធិជនពិការ បន្ទាប់មកគឺអំពីកញ្ចប់ថវិការបស់រដ្ឋសម្រាប់ទ្រទ្រង់ជនពិការ ហើយចុងក្រោយគឺដើម្បីស្នើឱ្យរដ្ឋមន្ត្រីសង្គមកិច្ចកែទម្រង់ការគ្រប់គ្រងមណ្ឌលសម្រាប់ជនអនាថា និងជនពិការ នៅទូទាំងប្រទេសកម្ពុជា។
អ្នកតំណាងរាស្ត្រ កែ សុវណ្ណរតន៍ ដែលមកពីគណបក្សសង្គ្រោះជាតិ សង្ឃឹមថា លោក វង សូត្រ «នឹងត្រូវតែពិចារណា»រាល់អនុសាសន៍របស់គណៈកម្មការជំនាញរបស់អ្នកស្រី បន្ទាប់ពីកិច្ចប្រជុំនោះ ព្រោះអ្នកស្រីបញ្ជាក់៖ «វាជាដំណាក់កាលនៃការអភិវឌ្ឍន៍ប្រទេសទាំងអស់គ្នា»។
ការកោះហៅរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា គឺធ្វើឡើងបន្ទាប់ពីអ្នកតំណាងរាស្ត្របានធ្វើអង្កេតលើមជ្ឈមណ្ឌលព្រៃស្ពឺ នៅជាយរាជធានីភ្នំពេញ ដែលបានប្រមូលជនអនាថាឱ្យទៅស្នាក់នៅទីនោះ។ នេះបើតាមការឱ្យដឹងរបស់អ្នកស្រី កែ សុវណ្ណរតន៍ ដែលបានបញ្ជាក់បន្ថែមថា នៅទីនោះ របបអាហារសម្រាប់ជនពិការម្នាក់គឺតែ១៥០០រៀលប៉ុណ្ណោះក្នុងមួយថ្ងៃ ហើយជនពិការខ្វះការថែទាំសុខភាព និងការបណ្ដុះបណ្តាលវិជ្ជាជីវៈ។ ទន្ទឹមនឹងនេះដែរ អ្នកតំណារាស្ត្ររូបនេះក៏បានសង្កេតឃើញផងដែរថា ការអនុវត្តច្បាប់ស្តីពីកិច្ចគាំពារ និងលើកកម្ពស់សិទ្ធិជនពិការបច្ចប្បន្នគឺមិនទាន់ពេញលេញ ជាពិសេសខ្វះការបង្កើតផ្លូវសម្រាប់សម្រួលការធ្វើដំណើររបស់ជនពិការ ខ្វះការលើកទឹកចិត្តឱ្យជនពិការទទួលបានការងារធ្វើនៅក្នុងក្រុមហ៊ុនឯកជន ព្រមទាំងខ្វះការគោរពសិទ្ធិជនពិការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ