លោក យន្ត មីន សុខចិត្តលាចេញពីតំណែង ខណៈលោក ញឹម វណ្ណដា ត្រូវបានដកចេញទាក់ទងរឿងបាក់អាគារនៅកំពង់សោម
នៅទីបំផុត លោក យន្ត មីន អភិបាលខេត្តព្រះសីហនុ បានសុខចិត្តចុះចេញពីតំណែងហើយ បន្ទាប់ពីមានករណីរលំបាក់អាគារកម្ពស់៧ជាន់ ក្នុងខេត្តជាប់មាត់សមុទ្រមួយនេះ។ ជាមួយគ្នានោះ លោក ញឹម វណ្ណដា អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ ក៏ត្រូវបានប្រមុខរដ្ឋាភិបាលដកចេញពីតំណែងផងដែរ បន្ទាប់ពីមានហេតុការណ៍រលំបាក់អាគារដែលសម្លាប់មនុស្សយ៉ាងហោចណាស់២៨នាក់ និងរបួស២៦នាក់កាលពីថ្ងៃសៅរ៍។
ចុះផ្សាយនៅថ្ងៃ៖ កែប្រែថ្ងៃទី៖
«លោក យន្ត មីន អភិបាលខេត្តព្រះសីហនុបានទទួលស្គាល់កំហុសលើការគ្រប់គ្រងក្នុងដែនសមត្ថកិច្ចរបស់ខ្លួនដែលបណ្តាលអោយមានរឿងឈឺចាប់កើតឡើង។ គាត់បានស្នើមកខ្ញុំដើម្បីលាលែងចេញពីអភិបាលខេត្តព្រះសីហនុ»។ នេះជាការគូសបញ្ជាក់របស់លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ ពោលតែពីរថ្ងៃក្រោយរលំបាក់អាគារនៅខេត្តជាប់សមុទ្រដែលសំបូរជនជាតិរស់នៅនោះ។
ជាមួយគ្នានោះ លោកប្រមុខរដ្ឋាភិបាលក៏បានសម្រេចដក លោក ញឹម វណ្ណដា ចេញពីអនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយផងដែរ ដែលបើតាម លោក ហ៊ុន សែន គឺមកពីលោក ញឹម វណ្ណដា ខ្វះការទទួលខុសត្រូវនិងភូតភរ។
ជាការកត់សំគាល់ នេះជាលើកទី១ហើយដែលមន្រ្តីរដ្ឋាភិបាលត្រូវបានដកចេញ ឬសុខចិត្តលាឈប់ដោយខ្លួនឯងដោយសារតែមានករណីមនុស្សស្លាប់និងរបួសរាប់សិបនាក់ដោយឧបទ្វហេតុ។
បើតាមប្រមុខរដ្ឋាភិបាល លោក គួច ចំរើន អភិបាលខេត្តកំពង់ចាម នឹងត្រូវប្តូរមកធ្វើជាអភិបាលខេត្តព្រះសីហនុវិញ តែនៅពេលនេះ លោក យន្ត មីន នៅបន្តដឹកនាំយុទ្ធនាការរុករកនិងសង្រ្គោះតទៅទៀតរហូតចប់កិច្ចការនិងអភិបាលខេត្តថ្មីចូលកាន់តំណែង។
ចំណែក លោក គន់ គីម អតីតនាយសេនាធិការចម្រុះនៃកងយុទ្ធពលខេមរៈភូមិន្ទ ដែលបច្ចុប្បន្នជាទេសរដ្ឋមន្រ្តីទទួលបន្ទុកបេសកកម្មពិសេស ត្រូវបានតែងតាំង ជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ជំនួស លោក ញឹម វណ្ណដា។ ប៉ុន្តែ លោក ញឹម វណ្ណដា ក៏ត្រូវបានតែងតាំងជាទីប្រឹក្សារដ្ឋាភិបាលឋានៈស្មើទេសរដ្ឋមន្រ្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ