កម្ពុជា

ក្រសួងព័ត៌មាន បញ្ជាឲ្យបិទកម្មវិធីចម្រុះ ABC 3 Spring របស់អាចារ្យ A

នៅថ្ងៃនេះ ក្រសួងព័ត៌មាន បានបញ្ជាឲ្យបិទកម្មវិធីចម្រុះ ABC 3 Spring របស់អាចារ្យ A។ ជាការចេញបញ្ជា ក្រោយពីមានសង្គ្រាមពាក្យសម្តីជាច្រើនជុំវិញឥរិយាបថរបស់ពិធីការិនី ម្នាក់ ឡើងអង្គុយលើតុ និងដើររំលងតុវេទិកា ខណៈពេលដែលកំពុងតែផ្សាយបន្តផ្ទាល់តាមកញ្ចក់ទូរទស្សន៍។ ក្រសួងព័ត៌មាន យល់ឃើញថា នេះជាអាកប្បកិរិយាពុំគប្បី ហើយបង្កឲ្យខូចកិត្តិយសពិធិករ-ពិធីការិនីផ្សេងៗទៀត។

ចុះផ្សាយនៅថ្ងៃ៖ 24/01/2017 - 12:41កែប្រែថ្ងៃទី៖ 24/01/2017 - 12:43

ដោយ៖ ហេង ឧត្តម

ផ្សាយពាណិជ្ជកម្ម

ការបញ្ជាក់របស់ក្រសួងព័ត៌មានយ៉ាងដូច្នេះ គឺតាមសេចក្តីជូនដំណឹង ផ្ញើទៅម្ចាស់ស្ថានីយវិទ្យុ-ទូរទស្សន៍ប៉ុស្តិ៍លេខ៣ ដែលសហការផលិតកម្មវិធី ជាមួយស្ថានីយវិទ្យុ ABC កម្ពុជា FM 107.50 MHZ ។

គួររម្លឹកជូនថា កម្មវិធីចម្រុះ ABC 3 Spring ផ្សាយលើកញ្ចក់ទូរទស្សន៍ប៉ុស្តិ៍លេខ៣ រាជធានីភ្នំពេញ រយៈពេល៣ម៉ោងក្នុងមួយថ្ងៃ ពីម៉ោង៦ដល់ម៉ោង៩ព្រឹក។ ហើយកាលពីពេលថ្មីៗនេះ មានពិធីការិនី បានរំកិលខ្លួនលើតុវេទិកា លោតរត់ទៅដណ្តើមក្បាលមេក្រូគេនិយាយ ខណៈពេលដែលទូរទស្សន៍កំពុងផ្សាយផ្ទាល់។ កាយវិការបែបនេះ ធ្វើឲ្យមានសង្គ្រាមពាក្យសម្តី រិះគន់ពីមហាជនមួយចំនួន ថាជាការមិនសមរម្យ ហើយខ្វះសីលធម៌វិជ្ជាជីវៈ។

ភ្លាមៗ ក្រុមពិធិករ-ពិធិការិនី បានបកស្រាយបំភ្លឺក្នុងកម្មវិធីរបស់ខ្លួនវិញថា កម្មវិធីចម្រុះ ABC 3 Spring នេះ គឺមិនមែនជាកម្មវិធីព័ត៌មានដូចស្ថាប័នផ្សព្វផ្សាយព័ត៌មានទូទៅនោះទេ។ គឺមិនគ្រាន់តែអង្គុយធ្មឹង អានព័ត៌មានឡើយ។ ដ្បិត កម្មវិធីចម្រុះ ABC 3 Spring មានបាវចនារបស់ខ្លួន ចំនួនបី។ ពោល គឺការកម្សាន្ត កម្សត់ និង ខ្លឹម។ ដូច្នេះ ការកម្សាន្តត្រូវមានការកំប្លែងខ្លះៗ ហើយវាលាយឡំការយំសោក នៅគ្រាកម្សត់។ ចំណែកឯព័ត៌មានរបស់ABC ទៀតសោត គឺមានខ្លឹម ដែលមិនដូចព័ត៌មានរបស់ស្ថានីយដទៃ។ នេះបើតាមការបកស្រាយរបស់ក្រុមការងារកម្មវិធីចម្រុះ ABC 3 Spring។

ទោះបីជាយ៉ាងនេះក្តី ក្រសួងព័ត៌មានកម្ពុជា តាមរយៈលោករដ្ឋមន្ត្រី ខៀវ កាញ្ញារិទ្ធ គឺពុំយល់ដូច្នោះឡើយ។ ក្រសួងគិតថា ការប្រព្រឹត្តរបស់ក្រុមពិធិករ-ពិធិការិនីកម្មវិធី ABC 3 Spring គឺជាទង្វើពុំគួរគប្បី ដោយសម្តែងកាយវិការមិនសមរម្យ ការប្រើពាក្យសម្តីខ្វះសីលធម៌វិជ្ជាជីវៈសារព័ត៌មាន និងបានប្រមាថមើលងាយអ្នកស្តាប់និងទស្សនិកជនក្នុងពេលបំពេញភារៈកិច្ច។ តាមក្រសួងដដែល ទង្វើបែបនេះ គឺវាធ្វើឲ្យប៉ះពាល់ដល់កិត្តិយសនិងសេចក្តីថ្លៃថ្នូររបស់ពិធិករ-ពិធិការិនីដទៃផ្សេងទៀត។

ចំពោះសេចក្តីសម្រេចឲ្យបញ្ឈប់ការផ្សាយកម្មវិធីខាងលើនេះ ម្ចាស់ស្ថានីយវិទ្យុABC គឺលោក សេង ប៊ុនវេង ឬលោកអាចារ្យ A គឺគ្មានប្រតិកម្មឆ្លើយតបយ៉ាងណានៅឡើយទេ នៅពេលនេះ។

ចំណែកពិធីការិនីរូបនោះ បានសុំទោសក្នុងកម្មវិធីរបស់ខ្លួន ហើយសុំឈប់សម្រាកពីការងារមួយរយៈពេលខ្លី។ នាងនិយាយថា «ខឹងអ្នកដែលមកជាន់ពន្លិចថែម! ខ្ញុំដឹងខ្លួន សុំទោសទស្សនជន! អត់មានបំណងចង់ឌឺជាមួយទស្សនជននោះទេ។ ខ្ញុំធ្វើការ៧ឆ្នាំហើយ ខ្ញុំរស់នៅ ABC។ មានរឿងអីធ្ងន់ធ្ងរ សម្រាប់ការផ្លោះតុនោះ។ យើងមិនមែនជាអ្នកសារព័ត៌មានផង។ គ្រាន់តែជាអ្នកសម្តែងប៉ុណ្ណោះ មិនបានតាំងខ្លួនជាពិធីករ ពិធីការនីអីទេ តាំងពីដើមមក»។

ជាការកត់សម្គាល់ ការសម្រេចឲ្យឈប់ផ្សាយកម្មវិធីចម្រុះ ABC 3 Spring គឺធ្វើឡើងបន្ទាប់ពីមានភាពចម្រូងចម្រាស់ចំពោះឥរិយាបថរបស់អ្នកនិយាយកម្មវិធី ហើយក៏ធ្វើឡើយក្រោយពីក្រុមការងាររបស់វិទ្យុ ABC បានចុះផ្លូវតវ៉ាប្រឆាំងនឹងវិទ្យុអាស៊ីសេរី ដែលពួកគេបានចោទថាជាវិទ្យុប្រឆាំងរដ្ឋាភិបាល និងគាំទ្របក្សសង្គ្រោះជាតិ៕