អង្គការACT រកឃើញថាសារព័ត៌មានបែបហិង្សាផ្សាយពីការបោះឆ្នោតឃុំ សង្កាត់មាន៣៨%
អង្គការក្រុមការងារដើម្បីដោះស្រាយទំនាស់ហៅកាត់ ACT បានរកឃើញថា សារព័ត៌មានឯករាជ្យមានតែ១៦%ប៉ុណ្ណោះដែលបានចុះផ្សាយព័ត៌មានមុន និងក្រោយការបោះឆ្នោត។ ចំណែកសារព័ត៌មានបែបសន្តិភាពមាន៤៦ភាគរយ និង សារព័ត៌មានបែបហិង្សាមានដល់ទៅ៣៨ភាគរយឯណោះ។ នេះបើតាមរបាយការណ៍ស្តីពីស្ថានភាពអ្នកសារព័ត៌មាននៅក្នុងអំឡុងពេលនិងក្រោយការបោះឆ្នោតឃុំ សង្កាត់របស់អង្គការនេះដែលបានចេញនៅថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:១៤
បើតាមអង្គការក្រុមការងារដើម្បីដោះស្រាយទំនាស់ហៅកាត់ ACT សារព័ត៌មានបែបហិង្សា គឺជាសារព័ត៌មានដែលបង្ហាញយ៉ាងច្បាស់ឫដែលបង្កប់នូវសារដែលបង្កជម្លោះ បំផ្លាញអ្នកដទៃ ការឃោសនាលើកតម្កើងព័ត៌មានបង្ហាញតែវីរជន និងសំដៅលើតែជ័យជំនះតែភាគីដែលខ្លួនគាំទ្រ។ រីឯសារព័ត៌មានបែបសន្តិភាពវិញ ជាសារព័ត៌មានដែលសរសរអត្ថបទព័ត៌មានបង្ហាញស្វែងយល់ទៅលើទំនាស់ ស្វែងរកការពិតពីគ្រប់ភាគី មិនត្រូវលើកយកតែបុគ្គលសំខាន់ ត្រូវមានការផ្តោតទៅរកអ្នកដែលគ្មានសំឡេង ស្វែងរកដំណោះស្រាយ និងការដោះស្រាយទំនាស់នៅក្នុងប្រព័ន្ធផ្សព្វផ្សាយ។
ចំពោះទិន្នន័យដែលអង្គការក្រុមការងារដើម្បីដោះស្រាយទំនាស់ហៅកាត់ ACT លើកបង្ហាញនេះ គឺយោងទៅតាមការសិក្សាស្រាវជ្រាវទៅលើសារព័ត៌មានដែលទាក់ទងនឹងដំណើរនៃការបោះឆ្នោតឃុំ សង្កាត់ចំនួន១០ស្ថាប័នដែលមានវិទ្យុជាតិ អន្តរជាតិ៥ស្ថាប័ន និងវេបសាយរបស់កាសែតជាតិ និងអន្តរជាតិចំនួន៥ ស្ថាប័នទៀត។ ការសិក្សាស្រាវជ្រាវនេះ បានធ្វើឡើងចន្លោះថ្ងៃទី២០ ឧសភាដល់ថ្ងៃទី២០ មិថុនា ឆ្នាំ២០១៧។ តាមរយៈការសិក្សាស្រាវជ្រាវនេះ គឺសារព័ត៌មានបែបហិង្សានៅតែមានឥទ្ធិពល និងបានចាក់ឫសយ៉ាងជ្រៅនៅក្នុងប្រព័ន្ធផ្សព្វផ្សាយកម្ពុជា ពិសេសប្រព័ន្ធផ្សព្វផ្សាយក្នុងស្រុក។
លោកផុស សុវណ្ណ តំណាងក្រសួងព័ត៌មានកម្ពុជា បានលើកឡើងថា របាយការណ៍របស់អង្គការក្រុមការងារដើម្បីដោះស្រាយទំនាស់ហៅកាត់ ACTនេះ គឺអាចទទួលយកបានជាលក្ខណៈបឋមសិនដោយលោកមិនទាន់ឯកភាពទាំងស្រុងនោះទេ។ មិនទាន់ឯកភាពទាំងស្រុង ព្រោះថា ក្រសួងត្រូវការសិក្សាស្រាវជ្រាវបន្ថែមទៀតចំពោះរបាយការណ៍នេះ។
ចំណែកលោកហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប)វិញ បានកត់សម្គាល់ស្រដៀងគ្នានឹងអង្គការក្រុមការងារដើម្បីដោះស្រាយទំនាស់ហៅកាត់ ACTដែរថា ក្នុងដំណើរការបោះឆ្នោតឃុំ សង្កាត់កន្លងទៅនេះ សារព័ត៌មានខ្លះបានផ្តល់ព័ត៌មានមានលក្ខណៈអព្យាក្រិត និងខ្លះមានលក្ខណៈលម្អៀង តែលោកមិនបានបង្ហាញឲ្យចំតែម្តងទេ ថាតើសារព័ត៌មានទាំងនោះជាសារព័ត៌មានអ្វីខ្លះឡើយ។ បើទោះជាបែបនេះក្តី លោកហង្ស ពុទ្ធា នៅតែវាយតម្លៃខ្ពស់ដោយគូសបញ្ជាក់ថា សម្រាប់ការបោះឆ្នោតអាណត្តិនេះ សារព័ត៌មានបានផ្តល់ព័ត៌មានលក្ខណៈវិជ្ជមានច្រើនដល់ពលរដ្ឋដែលជាម្ចាស់ឆ្នោត។ បើតាមលោកហង្ស ពុទ្ធាដដែល នេះគឺដោយសារតែគ.ជ.ប បានរឹតបន្តឹងច្បាប់បន្ថែមទៀតចំពោះការផ្តល់ព័ត៌មានពីការបោះឆ្នោតដល់ពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ