ACU បញ្ជូនមន្រ្តី អាដហុក ៤ រូប និងមន្រ្តី គជប ១ រូប ទៅតុលាការ ជាថ្មីម្តងទៀត
ជាថ្មីម្តងទៀត អង្គភាពប្រឆាំងអំពើពុករលួយ (ACU) នៅថ្ងៃអាទិត្យនេះ បានបញ្ជូន មន្រី្តអង្គការអាដហុកចំនួន ៤ រូប និង មន្រ្តី ជាន់ខ្ពស់នៃគណៈកម្មាធិការជាតិរៀបចំការបោះឆ្នោត ១ រូប ទៅកាន់សាលាដំបូងរាជធានីភ្នំពេញ។ សូមបញ្ជាក់ថា កាលពីថ្ងៃទី ៣០ ខែ មេសា ACU បានបញ្ជូន ម ន្ត្រីទាំង ៥ រូប ឲ្យទៅបង្ហាញខ្លួននៅអយ្យការសាលាដំបូងរាជធានីភ្នំពេញ រយៈពេលជាង ១៥ នាទី ដើម្បីបំពេញបែបបទ និង កសាងសំណុំរឿង រួចក៏បញ្ជូនទៅកាន់ ACU វិញ។
ចុះផ្សាយនៅថ្ងៃ៖
ស្តាប់ - ០២:១៧
បន្ទាប់ពីសំណុំរឿងរបស់មន្រ្តីជាន់ខ្ពស់ផ្នែកស៊ើបអង្កេតអង្គការអាដហុក បួន រូប និង មន្រ្តីជាន់ខ្ពស់នៃគណៈកម្មាធិការជាតិរៀបចំការបោះឆ្នោត បានទៅដល់ដៃតុលាការក្រុងភ្នំពេញ កាលពីល្ងាចថ្ងៃទី ៣០ មេសា អង្គភាពប្រឆាំងអំពើពុកលួយ ជាថ្មីម្តងទៀត នៅថ្ងៃអាទិត្យនេះ បានបញ្ជូនមន្រ្តីទាំង ៥ ទៅតុលាការក្រុងភ្នំពេញ ដើម្បីឲ្យតំណាងអយ្យការបន្តនិតិវិធី។
កាលពីថ្ងៃទី ៣០ មេសា អង្គភាពប្រឆាំងអំពើពុករលួយ ក៏បានបញ្ជូន មន្រ្តីទាំង ៥ រូប ទៅកាន់សាលាដំបូងរាជធានីភ្នំពេញ ដើម្បីឲ្យតំណាងអយ្យការបន្តនិតិវិធីផងដែរ ប៉ុន្តែត្រូវបានរួចបញ្ជូនទៅកាន់អង្គភាពប្រឆាំងអំពើពុករលួយវិញ ក្នុងរយៈពេលប្រមាណជា ១៥ នាទី ។
បុគ្គលទាំង៥រូបដែលត្រូវបានឃាត់ខ្លួនទុក និង បញ្ជូនទៅកាន់តុលាការនេះ រួមមានលោក នី ចរិយា អគ្គលេខាធិការរង គជប និងមន្ដ្រី៤រូបមកពីសមាគមអាដហុក មានជាអាថិ៍៖ លោក នី សុខា លោក យី សុខសាន្ត លោក ណៃ វ៉ង ដា និងលោកស្រី លឹម មុនី។
ជាការកត់សម្គាល់ នៅខាងក្រៅបរិវេណនៃសាលាដំបូងរាជធានីភ្នំពេញ នៅព្រឹកថ្ងៃទី ១ ឧសភា នេះ មានប្រជាពលរដ្ឋមួយចំនួន បានស្រែកថា ការចោទប្រកាន់មន្រ្តីសង្គមស៊ីវិលគឺជាអំពើអយុត្តិធម៌ និង ស្នើសុំឲ្យតុលាការទម្លាក់ការចោទប្រកាន់ ព្រមទាំង ទាមទារឲ្យមានការដោះលែងមន្រ្តីទាំងនោះឲ្យមានសេរីភាពវិញ។
សូមបញ្ជាក់ថា អង្គភាពប្រឆាំងអំពើពុករលួយ កាលពីថ្ងៃទី ២៨ ខែ មេសា ដឹកនាំដោយលោក ឱម យ៉ិនទៀង បានឃាត់ខ្លួនមន្រ្តីអង្គការអាដហុក និង លោក នី ចរិយា។ ការឈានទៅដល់ការឃាត់ខ្លួននេះ ក្រោយពីមានការឆ្លើយដាក់បន្ទុករបស់កញ្ញា ខុម ចាន់តារ៉ាទី ហៅស្រីមុំ ដែលបានចោទអ្នកទាំប្រាំរូបខាងលើថាបានរួមគំនិតលួងលោមឱ្យនាងនិយាយបដិសេធ ចំពោះមុខសមត្ថកិច្ចពាក់ព័ន្ធចំណងស្នេហាជាមួយនឹងលោក កឹម សុខា។
មិនមែនមានតែបុគ្គលប្រាំរូបខាងលើនោះទេ ក៏មានផងដែរ បុគ្គលបីរូបផ្សេងទៀតដែលពាក់ព័ន្ធនឹងករណីនេះ ក្នុងនោះរួមមាន អ្នកស្រី ធីតា ឃឹះ ប្រធានអង្គការសិទ្ធិស្រីសីលការ អ្នកស្រីមេធាវី ទ្រី ឈួន និងមន្រ្តីសិទ្ធិមនុស្សរបស់អង្គការសហប្រជាជាតិ លោក ស៊ឺន សាលី ។
យ៉ាងណាក៏ដោយ លោក ឱម យិនទៀង ប្រធានអង្គភាពប្រឆាំងអំពើពុករលួយ បានបញ្ជាក់ថា បានរួចផុតពីការឃាត់ខ្លួន និងចោទប្រកាន់ជាមួយនឹងចម្លើយដ៏ច្បាស់លាស់ និងត្រឹមត្រូវតាមវិជ្ជាជីវៈរបស់ពួកគេ។
ចំពោះករណីមន្ត្រី UN លោក ស៊ឺន សាលី ដែលមិនទាន់បានចូលខ្លួនបំភ្លឺនោះ លោក ឱម យ៉ិនទៀង បានលើកឡើងថា អង្គភាពនឹងបន្តធ្វើតាមច្បាប់ គឺត្រូវនាំខ្លួន លោក ស៊ឺន សាលី ដើម្បីសាកសួរតែម្ដង។ យ៉ាងណាក៏ដោយ ប្រធាន ACU រូបនេះពុំបានបញ្ជាក់កាលបរិច្ឆេទជាក់លាក់ទេ៕
អត្ថបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ