អង្គភាពប្រឆាំងអំពើពុករលួយ កោះហៅមន្រ្តីអប់រំ ៥រូប ពាក់ព័ន្ធភាពមិនប្រក្រតីពេលប្រលងបាក់ឌុប
កាលពីថ្ងៃម្សិលមិញ (៣០ សីហា ២០១៦) មន្រ្តីនគរបាលយុត្តិធម៌ នៃអង្គភាពប្រឆាំងអំពើពុករលួយ បានចេញលិខិត កោះហៅមន្រ្តីអប់រំ ៤រូបបន្ថែមទៀត ដើម្បីស្តាប់ចម្លើយពាក់ព័ន្ធនឹង ភាពមិនប្រក្រតី ក្នុងការអនុវត្តតួនាទី ភារកិច្ច នាសម័យប្រលងបាក់ឌុបកន្លងមក។ ប្រធានអង្គភាពប្រឆាំងអំពើពុករលួយ លោក ឱម យិនទៀង បានថ្លែងថា អ្នកទាំងនោះ មានពាក់ព័ន្ធនឹងការមិនគោរពបទប្បញ្ញតិ្ត របស់ក្រសួងអប់រំ និងការប្រើប្រាស់អំណាចរបស់ខ្លួន មិនត្រឹមត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
យ៉ាងហោចណាស់ បុគ្គលិកអប់រំ ៥រូប ត្រូវបានអង្គភាពប្រឆាំងអំពើពុករលួយ កោះហៅ រៀងៗខ្លួន ដើម្បីស្តាប់ចម្លើយពាក់ព័ន្ធភាពមិនប្រក្រតីក្នុងការអនុវត្តតួនាទីរបស់ខ្លួន នាសម័យប្រលងបាក់ឌុប កាលពីខែសីហា ឆ្នាំ២០១៦។
លោក ឱម យិនទៀង ទេសរដ្ឋមន្រ្តី និងជាប្រធានអង្គភាពប្រឆាំងអំពើពុករលួយ បានប្រាប់វិទ្យុបារាំងអន្តរជាតិ នៅថ្ងៃពុធនេះថាបុគ្គលិកអប់រំ ដែលត្រូវបានកោះហៅទាំងនោះមានពាក់ព័ន្ធនឹងការ មិនគោរពបទបញ្ញតិ្ត របស់ក្រសួងអប់រំ និងការប្រើប្រាស់អំណាចរបស់ខ្លួន មិនត្រឹមត្រូវ ប៉ះពាល់ទៅលើច្បាប់មួយចំនួន។
កាលពីថ្ងៃម្សិលមិញ (ថ្ងៃទី៣០ សីហា) មន្រ្តីអប់រំ ៤រូប ត្រូវអង្គភាពប្រឆាំងអំពើពុករលួយ កោះហៅ ទៅស្តាប់ចម្លើយ នៅថ្ងៃចន្ទ ទី៥ ខែកញ្ញា ខាងមុខ ពាក់ព័ន្ធនឹងភាពមិនប្រក្រតីក្នុងការអនុវត្តតួនាទី ភារកិច្ច នាសម័យបាក់ឌុបឆ្នាំ២០១៦។ មន្រ្តីទាំងនោះ រួមមាន អគ្គនាយករង នៃអគ្គនាយកដ្ឋានយុវជន (ជា ប្រធានមណ្ឌលកំណែ មណ្ឌលវិទ្យាល័យព្រះយុគន្ធរ) ម្នាក់ អនុប្រធាននាយកដ្ឋាននីតិកម្ម នៃក្រសួងអប់រំ យុវជន និងកីឡាម្នាក់ ព្រមទាំងស្រ្តី គ្រូបង្រៀន ម្នាក់បង្រៀននៅវិទ្យាល័យទួលស្វាយព្រៃ និងស្រ្តីម្នាក់ទៀតបង្រៀននៅ វិទ្យាល័យ ហ៊ុនសែន ប៊ុននារី ផ្សារដើមថ្កូវ។
ដោយឡែក ស្រ្តី ជា គ្រូបង្រៀនម្នាក់នៃ វិទ្យាល័យទួលអំពិល ខណ្ឌដង្កោ រាជធានីភ្នំពេញ បានបង្ហាញខ្លួនរួចហើយ នៅ អង្គភាពប្រឆាំងអំពើពុករលួយ កាលពីថ្ងៃចន្ទ ២៩ សីហា កន្លងមក ពាក់ព័ន្ធនឹងការទទួលលុយពីបេក្ខជន នាសម័យប្រលងបាក់ឌុបឆ្នាំ២០១៦។
ប្រតិកម្មតបនឹងបញ្ហានេះ ប្រធានស្តីទីសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី ថ្លែងថា មន្រ្តីអប់រំទាំង៥រូប ដែលត្រូវបានអង្គភាពប្រឆាំងអំពើពុករលួយ កោះហៅ មិនមែនជាសមាជិករបស់សមាគមគ្រូបង្រៀនកម្ពុជាឯករាជ្យនោះទេ។ លោកស្រីបានបន្ថែមថា សមាគមគ្រូបង្រៀនកម្ពុជាឯករាជ្យមិនគាំទ្រលោកគ្រូ អ្នកគ្រូ ណាម្នាក់ដែលប្រព្រឹត្តិខុសវិន័យក្នុងការប្រលងឡើយ ប៉ុន្តែសមាគម ក៏មិនសប្បាយចិត្តដូចគ្នា នៅពេលដែលបុគ្គលិកក្រសួងអប់រំ បែរជា ត្រូវប្រឈមនឹង អង្គភាពប្រឆាំងអំពើពុករលួយ ហើយមិនមែនជាស្វាមីអាណាព្យាបាល ក្រសួងអប់រំជាអ្នកចាត់វិធានការណ៍ពិន័យ។
គួរជម្រាបថា តាមប្រកាសស្តីពី ការកម្រិតវិន័យចំពោះបុគ្គលិកអប់រំ ក្នុងការប្រលងសញ្ញាបត្រទុតិយភូមិ របស់ក្រសួងអប់រំ យុវជន និងកីឡា កាលពីថ្ងៃទី១១ ខែកក្កដា ២០១៦ ប្រសិនបើ បុគ្គលិកអប់រំ បានប្រព្រឹត្តិសកម្មភាពមិនត្រឹមត្រូវ ក្នុងការប្រលងដូចជា ទទួលប្រាក់សំណូកពីបេក្ខជនជាថ្នូរនឹងការចម្លង ឬធ្វើចម្លើយអោយបេក្ខជន ជាដើមពួកគេអាចប្រឈមនឹងទណ្ឌកម្មខាងវិន័យ ចាប់ពីស្តីបន្ទោស រហូតដល់បណ្តេញចេញពីមុខតំណែងរាជការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ