ព្រះមហាក្សត្រនិងនាយករដ្ឋមន្ត្រីគឺជាក្តីសង្ឃឹមចុងក្រោយនៃការដោះលែងសកម្មជនសិទ្ធិមនុស្ស
ក្រុមគ្រួសាររួមមានភរិយា និងកូនរបស់សកម្មជនសិទ្ធិមនុស្សនៃអង្គការការពារសិទ្ធិមនុស្សអាដហុកទាំង៤រូប និងអគ្គលេខាធិការរង គ.ជ.ប មួយរូប បាននាំគ្នាធ្វើលិខិតមួយច្បាប់ថ្វាយព្រះមហាក្សត្រ និងនាយករដ្ឋមន្ត្រី ដើម្បីស្នើសុំកិច្ចអន្តរាគមន៍ឲ្យមានការដោះលែងស្វាមី និងឪពុករបស់ពួកគេ ដែលកំពុងជាប់ឃុំ។ ការសុំកិច្ចអន្តរាគមន៍នេះ បានធ្វើឡើងបន្ទាប់ពីសកម្មជនការពារសិទ្ធិមនុស្ស និងអគ្គលេខាធិការរង គ.ជ.ប ត្រូវបានឃុំឃាំងអស់រយៈពេលជិត ៩ខែកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លិខិតរបស់ក្រុមគួ្រសារមន្ត្រីសមាគមអាដហុកចំនួន ៤រូប និងមន្ត្រីអគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) មួយរូប ដែលចុះកាលបរិច្ឆេទ និងស្នាមមេដៃចំនួន ៥កាលពីថ្ងៃចន្ទម្សិលមិញ ត្រូវបានគេបញ្ជូនទៅដល់ខុទ្ទកាល័យលោកនាយករដ្ឋមន្ត្រីហ៊ុន សែន នៅព្រឹកថ្ងៃអង្គារទី ២៤ ខែមករានេះ។ នេះបើតាមការបញ្ជាក់ពីមន្ត្រីសមាគមអាដហុក។
ខ្លឹមសារនៅក្នុងលិខិតនោះបានលើកឡើងពីការរៀបរាប់ទៅកាន់លោក ហ៊ុន សែន ពីប្រវត្តិការងារ និងការអប់រំប្រជាពលរដ្ឋរបស់ប្តី និងម្តាយពួកគេ ដែលបានចាប់ផ្តើមកាលពីដើមទសវត្សឆ្នាំ៩០ ឲ្យយល់ដឹងពីសិទ្ធិ និងកាតព្វកិច្ច និងបញ្ហាជាច្រើនទៀត។ ក៏ប៉ុន្តែបន្ទាប់ពីពួកគេត្រូវបានឃាត់ខ្លួន និងឃុំខ្លួនមក ក្រុមគ្រួសារបានជួបប្រទះបញ្ហាលំបាកជាច្រើន ដូចជាកូនៗបាក់ទឹកចិត្តរៀនសូត្រ ជីវភាពនៅក្នុងគ្រួសារមានការធ្លាក់ចុះដោយបាត់បង់សសរទ្រូងក្នុងការរកចំណូល សមាជិកគ្រួសារខ្លះធ្លាក់ខ្លួនឈឺ និងខ្វះភាពសុខដុមរមនានៅក្នុងគ្រួសារទាំងមូល។
លោក ស៊ុំ ចាន់គា អ្នកនាំពាក្យសមាគមការពារសិទ្ធិមនុស្សអាដហុក ប្រាប់វិទ្យុបារាំងនៅថ្ងៃនេះថា លោកមានការសង្ឃឹមខ្ពស់ថាអ្នកជាប់ឃុំទាំង ៥នាក់ នឹងមានសេរីភាពដោយសារលោកនាយករដ្ឋមន្ត្រីមានឥទ្ធិពលខ្លាំងនៅក្នុងសំណុំរឿងនេះ ដោយកន្លងមកលោកហ៊ុន សែន បានអន្តរាគមន៍ជាច្រើនករណីមកហើយ។
ដោយឡែកចំពោះលិខិតថ្វាយព្រះមហាក្សត្រ ដើម្បីសុំឲ្យព្រះអង្គជួយអន្តរាគមលើរឿងដូចគ្នានេះដែរ ត្រូវបានមន្ត្រីអាដហុកបញ្ជាក់ថានឹងបញ្ជូនទៅកាន់ព្រះបរមរាជវាំងនៅរសៀលថ្ងៃអង្គារនេះផងដែរ។
សូមបញ្ជាក់ថា ក្រុមគ្រួសាររបស់មន្ត្រីសិទ្ធិមនុស្សទាំង ៤នាក់ គឺលោក នី សុខា លោក យី សុខសាន្ត លោកណៃ វ៉ង់ដា លោកស្រី លឹម មុនី និងលោក នី ចរិយាអគ្គលេខាធិការរងគ.ជ.ប ម្នាក់ ធ្លាប់បានដាក់ពាក្យទៅតុលាការ ដើម្បីស្នើសុំឲ្យប្តី និងម្តាយរបស់ពួកគេបាននៅក្រៅឃុំចំនួន ៦ដងរួចមកហើយ ក៏ប៉ុន្តែតុលាការគ្រប់ជាន់ថ្នាក់បានច្រានចោល ជាហេតុធ្វើឲ្យក្រុមគ្រួសារមានការព្រួយបារម្ភកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ