អាដហុក ឆ្ងល់ពីចំណាត់ការរបស់ ACU តែបញ្ជាក់ថាមានភស្តុតាងគ្រប់គ្រាន់ដើម្បីបំភ្លឺពីភាពស្អាតស្អំ
សមាគមអាដហុក បានបញ្ជាក់ថា ខ្លួនកំពុងតែវង្វេងនឹងការចោទប្រកាន់របស់កញ្ញាខុម ចាន់ដារ៉ាទី ហៅស្រីមុំ មកលើបុគ្គលិករបស់សមាគមអាដហុក។ លើសពីនេះ អាដហុក ក៏ឆ្ងល់ពីចំណាត់ការរបស់អង្គភាពប្រឆាំងអំពើពុករលួយ (ACU) ដែលកោះហៅបុគ្គលិកខ្លួន ឲ្យចូលបំភ្លឺលើករណីនេះដែរ។ យ៉ាងណាក៏ដោយ ប្រធានសមាគមអាដហុក បានអះអាងថា គេមានភស្តុតាងក្នុងដៃគ្រប់គ្រាន់ ដើម្បីបង្ហាញថា សមាគមធ្វើតាមគោលការណ៍ និងគោរពច្បាប់ជាតិ។ ហើយបុគ្គលិកអាដហុក ៥នាក់ នឹងចូលទៅបំភ្លឺតាមការកោះហៅរបស់ ACU។ ការបញ្ជាក់ទាំងនេះ ត្រូវបានធ្វើឡើង ក្នុងសន្និសីទកាសែត នៅស្នាក់ការអង្គការ CHRAC នាព្រឹកថ្ងៃទី ២៦មេសានេះ។
ចុះផ្សាយនៅថ្ងៃ៖
ស្តាប់ - ០២:០៥
ប្រធានសមាគមអាដហុក លោកធន សារ៉ាយ បានបញ្ជាក់នៅក្នុងសន្និសីទកាសែតថា បុគ្គលិក ៥នាក់របស់អាដហុក នឹងចូលទៅឆ្លើយបំភ្លឺនៅអង្គភាពប្រឆាំងអំពើពុករលួយ(ACU) តាមការកោះហៅ នៅថ្ងៃទី ២៧ និង២៨មេសាខាងមុខ។ បុគ្គលិកទាំង ៥ ដែលរួមមាន លោកស្រីមេធាវី ទ្រី ឈួន -លោកស្រីលឹម មុនី មន្ត្រីអង្កេតជាន់ខ្ពស់ -លោកនី សុខា ប្រធានផ្នែកស៊ើបអង្កេត -លោកយី សុខសាន្ត និងលោកណៃ វ៉ងដា អនុប្រធានផ្នែកស៊ើបអង្កេត។
ទោះបីទៅឆ្លើយបំភ្លឺតែអាដហុក ក៏កំពុងតែឆ្ងល់ពីចំណាត់ការរបស់ ACU។ ឆ្ងល់ព្រោះថា ACU គួរមានសមត្ថកិច្ចធ្វើការអង្កេតតែលើការលួចប្រាក់ជាតិ តែហេតុអ្វីក៏កោះហៅសមាគម ដែលស្ថិតនៅក្រៅរដ្ឋាភិបាលទៅបំភ្លឺរឿងនេះវិញ។ យ៉ាងណាក៏ដោយ លោកធន សារ៉ាយ អះអាងថា អាដហុក មិនភ័យខ្លាចទេ ព្រោះថាខ្លួនមានភស្តុតាងគ្រប់គ្រាន់។ ភស្តុតាង ដែលបញ្ជាក់ថា កញ្ញាស្រីមុំ ដាក់ពាក្យស្នើសុំប្រាក់ឧបត្ថម្ភពីសមាគម ចំនួន ២០៤ដុល្លារ ដើម្បីចំណាយលើការស្នាក់នៅ ហូបចុក និងថ្លៃធ្វើដំណើរទៅមក អំឡុងពេលត្រូវមកស្វែងរកអន្តរាគមផ្នែកច្បាប់នៅសមាគមអាដហុក និងនៅក្រសួងមហាផ្ទៃ។ ហើយការផ្តល់ថវិកាឧបត្ថម្ភនេះ ក៏ជាគោលការណ៍ ដែលអាដហុក ត្រូវជួយដល់ជនរងគ្រោះ ដោយមិនមែនតែករណីកញ្ញាស្រីមុំនេះទេ។
ចំពោះ ការដកមេធាវីឈប់ជួយស្រីមុំវិញ ក៏ត្រូវបានអាដហុក អះអាងដដែលជាដដែលថា ដោយសារនាងលែងមានភាពភ័យខ្លាចដូចពីមុនទៀត ដូច្នេះករណីនេះ វាលែងស្ថិតនៅក្នុងអណត្តិរបស់អាដហុកទៀតហើយ។
គួរជម្រាបជូនថា កញ្ញាស្រីមុំ ដែលជាប់ឈ្មោះថាមានរឿងអាស្រូវស្នេហាជាមួយលោកកឹម សុខា ពីដំបូង បានទៅស្វែងរកជំនួយពីសមាគមអាដហុក ដោយបដិសេធថា ខ្លួនគ្មានរឿងបែបនេះជាមួយអនុប្រធានគណបក្សប្រឆាំងឡើយ។ ប៉ុន្តែស្រាប់តែនៅថ្ងៃទី ១៩មេសា ស្រីមុំ បានប្រាប់តុលាការពីការពិតផ្សេងមួយទៀត ឲ្យតុលាការជួយរកយុត្តិធម៌។ ហើយក្រោយមកបានសរសេរលិខិតដោយដៃ ចោទសមាគមអាដហុក និងមន្ត្រីផ្សេងទៀតរបស់គណបក្សសង្គ្រោះជាតិ រួមនឹងលោកកឹម សុខាផង ថាបានបង្ខំឲ្យនាងផលិតការពិត។ ទោះយ៉ាងនេះក្តី ប្រធានសមាគមអាដហុក ថានឹងមិនប្តឹងបកទៅកញ្ញាស្រីមុំវិញទេ ព្រោះគេយល់ថានាងជាជនរងគ្រោះ ហើយប្រហែលជាអាចរងសម្ពាធណាមួយ។ អាដហុក គ្រាន់តែចង់ឲ្យស្រីមុំ ចេញមកបំភ្លឺការពិត ដើម្បីផ្តល់យុត្តិធម៌ដល់អាដហុកវិញតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ