សំណុំរឿងមន្រ្តីសិទ្ធមនុស្ស៖ អង្គការអន្តរជាតិស្នើឲ្យទម្លាក់ការចោទប្រកាន់ ខណៈតុលាការលើកពេលសវនាការបណ្តឹងសុំនៅក្រៅឃុំ
អង្គការ Front Line Defenders បានស្នើសុំឲ្យអាជ្ញាធរកម្ពុជា ទម្លាក់ការចោទប្រកាន់លើលោក នី សុខា និងមន្រ្តីសិទ្ធិមនុស្សផ្សេងទៀត ដែលត្រូវបានតុលាការចោទប្រកាន់ពីបទចោទសូកប៉ាន់សាក្សី។ សេចក្តីថ្លែងការណ៍របស់អង្គការសិទ្ធមនុស្សអន្តរជាតិមួយនេះ ធ្វើឡើងក្រោយពីទទួលបានព័ត៌មាន ថា លោក នី សុខា បានដួលសន្លប់នៅក្នុងពន្ធនាគារ និងមន្រ្តីសិទ្ធមនុស្សផ្សេងទៀត កំពុងមានជំងឺប្រចាំកាយ។ តាមគម្រោងតុលាការកំពូលព្រឹកនេះ នឹងបើកសវនាការជុំវិញសំណើសុំនៅក្រៅឃុំរបស់មន្រ្តីអាដហុក ប៉ុន្តែសវនាការត្រូវបានលើកពេលទៅថ្ងៃទី ៥ កក្កដា វិញ។
ចុះផ្សាយនៅថ្ងៃ៖
ស្តាប់ - ០១:៣៥
អង្គការ Front Line Defenders ដែលមានមូលដ្ឋាននៅប្រទេសអៀរឡង់ កាលពីពេលថ្មីៗនេះ បានសម្តែងក្តីព្រួយបារម្ភចំពោះស្ថានភាពសុខភាពរបស់មន្រ្តីអាដហុក លោក នី សុខា ថារឹងរឹតតែចុះខ្សោយខ្លាំងពីមួយថ្ងៃទៅមួយថ្ងៃ ក្រោយពីលោកបានដួលសន្លប់នៅក្នុងបន្ទប់ទឹក ក្នុងពន្ធនាគារព្រៃស។ ប្អូនប្រុសលោក នី សុខា ដែលបានទៅជួបសួរសុខទុក្ខនៅពន្ធនាគារ ឃើញលោក នី សុខា មានទឹកមុខស្លេកស្លាំង ញ័រដៃ និងព្យួរសេរ៉ូមផង។
ក្រៅពីស្នើឲ្យទម្លាក់ចោលការចោទប្រកាន់លើលោក នី សុខា អង្គការអន្ដរជាតិដដែល ក៏បានអំពាវនាវឲ្យអាជ្ញាធរ បញ្ចប់ការចោទប្រកាន់ទៅលើមន្រ្តីសិទ្ធមនុស្សទាំងបីរូបទៀត និងលោក នី ចរិយា អគ្គលេខាធិការរងរបស់គ.ជ.ប ផងដែរ ព្រោះថាមន្រ្តីសិទ្ធមនុស្សទាំងនោះ គ្រាន់តែបំពេញការងារជាអ្នកការពារសិទ្ធមនុស្ស។ បន្ថែមលើនេះ ស្ថាប័នអន្តរជាតិមួយនេះ ជម្រុញឲ្យអាជ្ញាធរកម្ពុជា ធានាបានឲ្យការព្យាបាលដ៏យកចិត្តទុកដាក់បំផុតសម្រាប់មន្រ្តីការពារសិទ្ធិមនុស្ស នៅអំឡុងពេលឃុំខ្លួនមុនការកាត់ក្តី ដោយអនុលោមតាមសេចក្តីសម្រេចរបស់អង្គការសហប្រជាជាតិ។
សំណុំរឿងមន្ត្រីអាដហុកនិងមន្ត្រី គ.ជ.ប រហូតមកទល់ពេលនេះ ត្រូវបានបញ្ចប់ក្នុងដំណាក់កាលនៃការស៊ើបសួរហើយ ហើយក៏បានបង្វែរទៅឲ្យព្រះរាជអាជ្ញា ដើម្បីធ្វើសេចក្តីសន្និដ្ឋានស្ថាពរ។
អ្នកទាំង៥ត្រូវបានតុលាការឃុំខ្លួន ដោយសារជាប់ពាក់ព័ន្ធរឿងរ៉ាវក្ដីក្ដាំរវាងលោក កឹម សុខា ប្រធានគណបក្សសង្គ្រោះជាតិ ជាមួយនាង ខុម ចាន់តារ៉ាទី ហៅស្រីមុំ។ បន្ទាប់ពីជាប់ឃុំអស់ពេលជាងមួយឆ្នាំ បច្ចុប្បន្ន មន្ត្រីអង្គការអាដហុកទាំង៤រូបរួមមានលោក យី សុខសាន្ត លោក ណៃ វ៉ង់ដា លោក នី សុខា និងលោកស្រី លឹម មុន្នី កំពុងមានជំងឺប្រចាំកាយ ដែលមេធាវីអះអាងថា ត្រូវការការព្យាបាលជាចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ