អ្នកវិភាគ បក្សប្រឆាំង អង្គការសង្គមស៊ីវិល និងស្ថានទូត ស្វាគមន៍ការដោះលែងមន្ត្រីអាដហុក និងមន្ត្រីគជប
នៅថ្ងៃនេះ អ្នកវិភាគនយោបាយ មន្ត្រីជាន់ខ្ពស់គណបក្សប្រឆាំង អង្គការសង្គមស៊ីវិលក្រៅរដ្ឋាភិបាល និងស្ថានទូតអាមេរិក បានស្វាគមន៍ចំពោះការដោះលែងមន្ត្រីអាដហុក និងមន្ត្រីគជប ឲ្យនៅក្រៅឃុំ ហើយលើកឡើងថានេះ គឺជាសញ្ញាវិជ្ជមានមួយសម្រាប់មន្ត្រីការពារសិទ្ធិមនុស្ស។
ចុះផ្សាយនៅថ្ងៃ៖
ស្តាប់ - ០២:២៦
ក្រោយពីតុលាការចេញដីកាដោះលែងឲ្យនៅក្រៅឃុំ ចំពោះមន្ត្រីអាដហុក៤នាក់ និងមន្ត្រីគជបម្នាក់ ស្ថានទូតអាមេរិកតាមរយៈទំព័រហ្វេសប៊ុករបស់ខ្លួននៅថ្ងៃទី៣០ ខែមិថុនា បានហៅការដោះលែងនេះថា ជាការសំរេចចិត្តតាមផ្លូវច្បាប់ ដែលនឹងកាត់បន្ថយបន្ទុក ដែលមានទៅលើចុងចោទ និងគ្រួសាររបស់គេ ក្នុងពេលដែលគេប្រឈមដោះស្រាយចំពោះបណ្តឹងចោទប្រកាន់។
អនុប្រធានគណបក្សសង្រ្គោះជាតិលោកប៉ុល ហំម បានស្វាគមន៍ចំពោះការដោះលែងនេះ។ លោកបញ្ជាក់ថាការដោះលែងអ្នកទាំង៥នេះ នឹងបន្ថយភាពតានតឹងផ្នែកនយោបាយ ជាពិសេសកុំឲ្យមានភាពតានតឹងរវាងរដ្ឋាភិបាល និងសង្គមស៊ីវិល។ លោកប៉ុល ហំមលើកឡើងថាលោកមិនចង់ឃើញ ការយកប្រព័ន្ធតុលាការប្រើប្រាស់ជាឧបករណ៍នយោបាយទេ។
ចំណែកលោក អំ សំអាត ប្រធានគ្រប់គ្រងផ្នែកអង្កេតអង្គការលីកាដូ ក្នុងនាមជាអ្នករួមការងារ និងជាមន្ត្រីការពារសិទ្ធិមនុស្សដូចគ្នាបានឲ្យដឹងថា លោកមានអារម្មណ៍រំភើប និងរីករាយចំពោះការដោះលែងអ្នកទាំង៥ឲ្យនៅក្រៅឃុំជាបណ្តោះអាសន្ន។ លោកបានហៅការដោះលែងនេះថា ជាសញ្ញាវិជ្ជមានមួយសម្រាប់មន្ត្រីការពារសិទ្ធិមនុស្ស និងជាសញ្ញាវិជ្ជមានមួយសម្រាប់ពេលអនាគត។
ចំណែកអ្នកសិក្សាពីការអភិវឌ្ឍសង្គមលោកបណ្ឌិត មាស នី ក្រៅពីស្វាគមន៍ លោកបានសម្តែងការខកចិត្ត។ ខកចិត្តដោយសារតែការដោះលែងនេះ គឺជាការដោះលែងឲ្យនៅក្រៅឃុំបណ្តោះអាសន្នតែប៉ុណ្ណោះ។ លោកក៏បានបង្ហាញការព្រួយបារម្ភដែរ ដោយតែការដោះលែងនេះ អាចជាវិធីបញ្ជូនមាន់ចាស់ចេញ ហើយដាក់មាន់ថ្មីចូល ព្រោះថ្មីៗនេះមានការគម្រាមចំៗមកលើបន្ទប់ស្ថានការណ៍។
សាស្ត្រាចារ្យវិទ្យាសាស្ត្រនយោបាយ លោកសូរ ចន្ថា បានលើកឡើងពីមូលហេតុមួយចំនួនដែលអាចធ្វើឲ្យមានការដោះលែងឲ្យនៅក្រៅឃុំនេះ។ លោកថាមានមូលហេតុដូចជា ការជំរុញឲ្យមានការដោះលែងពីអាជ្ញាធរ ការជំរុញពីសហគមន៍អន្តរជាតិ ការជជែកគ្នារវាងអ្នកនយោបាយ និងអ្នកនយោបាយ រួមទាំងការយោគយល់របស់គណបក្សកាន់អំណាច។
លោកឡាត គី មន្ត្រីសមាគមអាជហុកបានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី៣០ ខែមិថុនាថា មន្ត្រីអាដហុកទាំង៤នាក់ ដែលទើបតែដោះលែងឲ្យនៅក្រៅឃុំ អាចបន្តឈប់សម្រាករយៈពេល១សប្តាហ៍ទៀត មុនពេលពួកគាត់ចូលបំពេញការងារឡើងវិញ។
សូមជម្រាបជូនថាអ្នកទាំង៥រួមមាន៖ លោកនី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រីជាន់ខ្ពស់សមាគមអាដហុក ត្រូវចោទពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ ដោយឡែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ