សមាគមអ្នកចិញ្ចឹមសត្វកម្ពុជា នៅតែព្រួយបារម្ភពីតម្លៃសាច់សត្វធ្លាក់ចុះ
ជាថ្មីម្តងទៀត សមាគមអ្នកចិញ្ចឹមសត្វកម្ពុជា បានសម្តែងក្តីព្រួយបារម្ភពីការធ្លាក់ថ្លៃនៃតម្លៃសាច់ក្នុងស្រុក។ ការព្រួយបារម្ភនេះបាន លើកឡើងក្នុង ជំនួបរវាង រដ្ឋមន្ត្រីក្រសួងកសិកម្ម លោក វេង សាខុន និង សមាគម អ្នកចិញ្ចឹមសត្វកម្ពុជា នៅថ្ងៃទី១០ ម្សិលមិញនេះ។
ចុះផ្សាយនៅថ្ងៃ៖
ស្តាប់ - ០១:៥៣
អត្ថបទដោយ៖ ជក់ សុភា
ជាដំណោះស្រាយនៃកង្វល់នេះ លោក តាន់ មុនីវណ្ណ អនុប្រធានសភាពាណិជ្ជកម្មកម្ពុជានិងជាសហប្រធានទទួលបន្ទុកផ្នែកកសិកម្មបានស្នើសុំឲ្យក្រសួងជួយសហការផ្តល់លទ្ធភាពឲ្យសមាគមនៅតាមបណ្តារាជធានីខេត្តចូលរួមក្នុងសកម្មភាពទប់ស្កាត់នូវរាល់ការនាំចូលសត្វដែលគ្មានច្បាប់អនុញ្ញាត។ លោកក៏បានប្រាប់ ពីកិច្ចការថ្មីៗដែលសមាគមបានពិភាក្សាជាមួយអគ្គនាយកពន្ធដារ ដើម្បីធ្វើការបន្ធូរបន្ថយ ឬលុបបំបាត់ការយកពន្ធពីអ្នកចិញ្ចឹមជ្រូក។ លើសពីនេះ លោកបន្តថា សមាគមរៀបចំ ផែនការក្នុងការចិញ្ចឹមសត្វច្បាស់លាស់ ដើម្បីបំពេញតម្រូវការទីផ្សារ និង ពិភាក្សា ជាមួយអ្នកនាំចូល នូវបរិមាណ និងតម្លៃ ដើម្បីបញ្ចៀសការប៉ះទង្គិចគ្នារវាងអ្នកចិញ្ចឹមក្នុងស្រុក និងអ្នកនាំចូល។
ក្នុងឱកាសនោះដែរ លោក វេង សាខុន រដ្ឋមន្ត្រីក្រសួងកសិកម្ម បានលើកទឹកចិត្តឲ្យសមាគម ពង្រឹងគុណភាព និងសុវត្ថិភាពនៃការចិញ្ចឹម ដើម្បីធានាដល់សុខមាលភាពសង្គម និងផ្តល់ភាពជឿទុកចិត្តដល់ប្រជាពលរដ្ឋដែលទទួលទានប្រចាំថ្ងៃ។ លោកក៏បានគូសបញ្ជាក់ថា កម្ពុជាអនុវត្តគោលនយោបាយទីផ្សារសេរី មិនអាចបិទការនាំចូលទាំងស្រុងបានទេ។ រដ្ឋាភិបាលនឹងរៀបចំកិច្ចប្រជុំពិភាក្សាអន្តរក្រសួង ដើម្បីពិនិត្យមើល ការបង្កើនកំរៃលើសាច់នាំចូល ដើម្បីធានាតុល្យភាពរវាងតំលៃនៃការចិញ្ចឹមក្នុងស្រុក និងការនាំចូល។
តបនឹងសំណើនេះ លោក វេង សាខុន បានឲ្យសមាគម ចាត់តាំងតំណាងតាមបណ្តារាជធានីខេត្ត និងស្នើមកក្រសួង នោះក្រសួងនឹងបញ្ជូនទៅតាមរាជធានីខេត្តដើម្បីបង្កើតជាគណៈកម្មការទប់ស្កាត់ការនាំចូលសត្វខុសច្បាប់ និងអាណាធិបតេយ្យ។
គួររឭកផងថា ក្រសួងកសិកម្មបានផ្តល់អាជ្ញាបណ្ណដល់ក្រុមហ៊ុននាំចូលជ្រូកចូលស្របច្បាប់ចំនួន៧ក្រុមហ៊ុនសរុប ១២៥០ក្បាលក្នុងមួយថ្ងៃ។ ស្របតាមស្តង់ដាអនាម័យនិងមានការត្រួតពិនិត្យសុខភាព ដោយអនុវត្តតាមវិធានបច្ចេកទេស រួមចំណែកធានា ដល់សុខភាពសាធារណៈ និងគ្រប់គ្រងដល់ស្ថិរភាពតម្លៃសាច់ សត្វ និងផលិតផល មានដើមកំណើតពីសត្វ នៅតាមទីផ្សារក្នុងប្រទេសកម្ពុជា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ