បុគ្គលិកព្រលានយន្តហោះ ទាំង៣នៅកម្ពុជា គ្រោងធ្វើកូដកម្ម ក្នុងពេលឆាប់ៗ!
សហព័ន្ធសហជីពកម្មករវិស័យដឹកជញ្ជូនកម្ពុជា ដែលមានសមាជិក ប្រមាណជិត១ពាន់នាក់ គ្រោងនឹងធ្វើកូដកម្ម ទាមទារលក្ខខណ្ឌការងារ, ស្នើសុំផ្តល់សំណងចំពោះការបញ្ឈប់បុគ្គលិក និងអនុញ្ញាតឲ្យបុគ្គលិកចូលធ្វើការវិញ។ សូមបញ្ជាក់ថា កាលពីថ្ងៃទី១៩ សីហា២០១៦ សហជីពនេះបានជូនដំណឹងពីការធ្វើកូដកម្មម្តងហើយ តែបានផ្អាកទៅវិញ ដោយសារតែមានការសម្របសម្រួលពីអាជ្ញាធរអាកាសចរណ៍ស៊ីវិល ប៉ុន្តែពេលនេះ គឺគ្មានទាន់ឃើញលទ្ធផលនៃការដោះស្រាយយ៉ាងណានៅឡើយទេ ទើបពួកគេត្រៀមធ្វើកូដកម្មជាថ្មីទៀត។
ចុះផ្សាយនៅថ្ងៃ៖
ស្តាប់ - ០២:៥៥
ជាបឋម គួររម្លឹកជូនថា កាលពីខែសីហាកន្លងទៅ សមាជិកសហព័ន្ធសហជីពកម្មករវិស័យដឹកជញ្ជូនកម្ពុជា ដែលធ្វើការនៅព្រលានទាំងបីនៅក្នុងស្រុក បានដាក់សេចក្តីជូនដំណឹងពីការតវ៉ា និងស្នើសុំទាមទារ ចំនួន១៥ចំណុច រួមមាន ស្នើសុំបញ្ឈប់ការអើសអើងចំពោះសមាជិកសហជីពដែលធ្វើការនៅកន្លែងព្រលានយន្តហោះ, ផ្តល់សំណងសមរម្យដល់បុគ្គលិកដែលបានបញ្ឈប់, អនុញ្ញាតឲ្យបុគ្គលិកដែលបានបញ្ឈប់ដោយខុសច្បាប់ ចូលធ្វើការវិញ, បង្កើតអាហារដ្ឋាន និងទារកដ្ឋាន , ព្រមទាំងកែសម្រួលលក្ខខណ្ឌការងារផ្សេងៗទៀត ដែលសមាជិកសហជីពមិនពេញចិត្ត និងយល់ថា ជាការរំលោភសិទ្ធិការងាររបស់ពួកគេ។
ជាមួយគ្នានេះ នៅអាកាសយានដ្ឋាន, មានបញ្ហាពីរចម្បង ដែលជាការព្រួយបារម្ភរបស់អ្នកសហជីព។ នោះគឺការធ្វើការងារពហុជំនាញ ពោលគឺបុគ្គលិកម្នាក់ធ្វើការច្រើនមុខ ហើយនិងការអើសអើង ថែមទាំងការធ្វើទុក្ខបុកម្និញដល់សមាជិកសហជីព។
លោក អៀង គឹមហ៊ុន អគ្គលេខាធិការសហជីពសហព័ន្ធសហជីពកម្មករវិស័យដឹកជញ្ជូនកម្ពុជា បានប្រាប់ឲ្យដឹងទៀតថា មានសមាជិករបស់ខ្លួន ត្រូវបានបញ្ឈប់ដោយមិនសមហេតុផល ចំនួន៥, ៦នាក់ ដែលអ្នកខ្លះ គឺមានតួនាទីជាសកម្មជន និងជាអនុប្រធានសហជីពផង។ លោកបានបញ្ជាក់ថា ជិតពីរខែមកហើយ ដំណោះស្រាយពីអាជ្ញាធរអាកាសចរណ៍ស៊ីវិល គឺនៅតែស្ងាត់ដំណឹងសូន្យ។ ដូច្នេះ ខាងសហជីពរបស់លោក នឹងកោះប្រជុំគ្នាទាំងបីសាខា ហើយកំណត់ថ្ងៃធ្វើកូដកម្មជាថ្មីទៀត ក្នុងពេលឆាប់ៗ ដើម្បីឲ្យមានការដោះស្រាយ។
ជុំវិញរឿងទាំងនេះ មន្ត្រីនាំពាក្យរបស់អាជ្ញាធរអាកាសចរណ៍ស៊ីវិល លោក ស៊ិន ចន្ទសិរីវុត្ថា បានឆ្លើយតបថា ចំពោះការស្នើសុំទាំង១៥ចំណុចនោះ គឺត្រូវដោះស្រាយជាពីរ ថ្នាក់បច្ចេកទេស និងថ្នាក់នយោបាយ។ ក៏ប៉ុន្តែលោកថាសំណើទាំងនោះ គឺដោះស្រាយបានជិតអស់ហើយ នៅតែ៤, ៥ចំណុចទេ ហើយត្រង់ចំណុចពាក់ព័ន្ធនឹង ពហុជំនាញ Multi Tache ដែលតម្រូវឲ្យកម្មករធ្វើការច្រើនមុខនោះ គឺក្រុមហ៊ុនបារាំងដែលគ្រប់គ្រងព្រលានយន្តហោះ បានដាក់ក្នុងកិច្ចសន្យាការងារហើយ គឺបញ្ហា អាចមកពីកម្មករយល់មិនច្បាស់។ ចំណែកអ្នកនាំពាក្យអាកាសដ្ឋានអន្តរជាតិកម្ពុជា មិនមានសេចក្តីពន្យល់យ៉ាងណាទេ។
យ៉ាងណាក៏ដោយចុះ ប្រសិនបើ សហព័ន្ធសហជីពកម្មករវិស័យដឹកជញ្ជូនកម្ពុជា ធ្វើកូដកម្មមែននោះ គឺប្រហែលអាចមានបុគ្គលិកព្រលានយន្តជិតពាក់កណ្តាល នឹងអត់ទៅធ្វើការ ព្រោះសហជីពនេះ មានសមាជិក ប្រមាណជិត១ពាន់នាក់ ក្នុងនោះធ្វើការនៅព្រលានយន្តហោះអន្តរជាតិភ្នំពេញ ចំនួនជាង៥៣០នាក់ នៅព្រលានខេត្តសៀមរាម ចំនួនជាង៣១០នាក់ ហើយនៅព្រលានយន្តហោះ ក្រុងព្រះសីហនុ ចំនួន ជិត៤០នាក់។ ចំនួនទាំងនេះ គឺប្រមាណជាងពាក់កណ្តាលនៃបុគ្គលិកសរុប ដែលធ្វើការនៅព្រលានយន្តហោះទាំង៣ នៅស្រុកខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ