ក្រសួងពាណិជ្ជកម្មនឹងប្រើប្រាស់វិធានការ “ក្ដៅ” ចំពោះការផ្សាយពាណិជ្ជកម្មគ្រឿងស្រវឹងជាសាធារណៈ
លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានប្រកាសមិនគាំទ្រការផ្សាយពាណិជ្ជកម្មស្រាបៀរ ឬគ្រឿងស្រវឹងដទៃទៀតជាសាធារណៈនោះទេ។ លោកប្រកាសដូច្នេះនៅក្នុងជំនួបជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់កាលពីថ្ងៃព្រហស្បតិ៍។ ជាមួយគ្នានេះ លោករដ្ឋមន្រ្តីក៏គ្រោងប្រើប្រាស់វិធានការ“ក្តៅ”ចំពោះការផ្សាយពាណិជ្ជកម្មគ្រឿងស្រវឹងជាសាធារណៈនេះផងដែរ។
ចុះផ្សាយនៅថ្ងៃ៖
ស្តាប់ - ០២:២០
វិធានការ“ក្ដៅ”របស់រដ្ឋមន្រ្តីក្រសួងពាណិជ្ជកម្មកម្ពុជាចំពោះការផ្សាយពាណិជ្ជកម្មគ្រឿងស្រវឹងជាសាធារណៈនៅពេលនេះមានពីរ គឺទីមួយ លោកគ្រោងនឹងរៀបចំសេចក្តីព្រាងអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលគ្រឿងស្រវឹង ដើម្បីដាក់ជូនលោកនាយករដ្ឋមន្រ្តី ហ៊ុន សែន ពិនិត្យ និងសម្រេច។ ទីពីរ គឺលោកនឹងរៀបចំប្រកាសអន្តរក្រសួង ស្តីពីការគ្រប់គ្រងការផ្សាយពាណិជ្ជកម្ម ដោយអនុលោមតាមច្បាប់ស្តីពីការគ្រប់គ្រងគុណភាព និងសុវត្ថិភាពផលិតផលទំនិញ និងសេវា។
តាមលោករដ្ឋមន្រ្តីប៉ាន សូរស័ក្តិ ការគ្រោងចាត់វិធានការទាំងពីរនេះ គឺដើម្បីចូលរួមកាត់បន្ថយផលប៉ះពាល់អវិជ្ជមាន ដែលកើតចេញពីការផ្សាយពាណិជ្ជកម្មគ្រឿងស្រវឹងមកលើសង្គមកម្ពុជា ជាពិសេស លើយុវជន-យុវនារី ដែលជាសសរទ្រូងរបស់ប្រទេសជាតិ។ លោកក៏បញ្ជាក់ឱ្យដឹងពីជំហររបស់ក្រសួងពាណិជ្ជកម្មដែលមិនទទួលយកការឧបត្ថម្ភពីក្រុមហ៊ុនស្រាបៀរណាមួយសម្រាប់ព្រឹត្តិការណ៍ពិព័រណ៍ផលិតផលខ្មែរនោះដែរ។
ចំណាត់ការរបស់រដ្ឋមន្រ្តីក្រសួងពាណិជ្ជកម្មនេះ ធ្វើឱ្យលោកពេជ្រ ស្រស់ ដែលជាប្រធានគណបក្សយុវជនកម្ពុជា និង ជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់សម្តែងនូវការកោតសរសើរ។ សម្រាប់លោកពេជ្រ ស្រស់ នេះ គឺជាទង្វើមិនគេចវេសពីបញ្ហា តែជាការបង្កើននូវភាពទទួលខុសត្រូវចំពោះបញ្ហា ព្រមទាំងប្តេជ្ញាដោះស្រាយបញ្ហានៅក្នុងស្មារតីទទួលខុសត្រូវខ្ពស់ថែមទៀត។
ជាការកត់សម្គាល់ វិធានការរបស់ក្រសួងពាណិជ្ជកម្មនៅពេលនេះ ធ្វើឡើងក្រោយពីការផ្សាយពាណិជ្ជកម្មគ្រឿងស្រវឹងកើតឡើងព្រោងព្រាធនៅក្នុងប្រទេសកម្ពុជា។ ខ្លះផ្សាយពាណិជ្ជកម្មតាមរយៈប្រព័ន្ធផ្សព្វផ្សាយមានទូរទស្សន៍ វិទ្យុ កាសែត និងវេបសាយជាដើម។ រីឯខ្លះទៀត ផ្សាយពាណិជ្ជកម្មតាមបដារធំៗនៅតាមទីសាធារណៈ និងតាមរយៈការចែកចាយនូវខិតបណ្ណផ្សេងៗ។ គ្រឿងស្រវឹងខ្លះក៏ធ្វើការផ្សព្វផ្សាយដោយភ្ជាប់ជាមួយការឈ្នះរង្វាន់នានាដែលជាការរួមចំណែកលើកទឹកចិត្តដល់ការផឹកគ្រឿងស្រវឹង។
ចំពោះបញ្ហានេះ លោកប៉ាន សូរស័ក្តិ បានបញ្ជាក់ថា ក្រសួងពាណិជ្ជកម្មបានខិតខំប្រឹងប្រែងក្នុងការចុះអប់រំច្បាប់ និងផ្សព្វផ្សាយជូនប្រជាពលរដ្ឋអំពីការផ្សាយពាណិជ្ជកម្មដែលមានលក្ខណៈភូតកុហក ឬឆបោក ព្រមទាំងផលប៉ះពាល់នៃការសេពគ្រឿងស្រវឹង ក៏ដូចជាដំណើរការចងក្រងច្បាប់ និងលិខិតបទដ្ឋានគតិយុត្តិសំខាន់ៗ សម្រាប់បម្រើការអភិវឌ្ឍវិស័យពាណិជ្ជកម្ម ជាពិសេស ការពារអត្ថប្រយោជន៍ប្រជាពលរដ្ឋ ដែលជាអ្នកប្រើប្រាស់ទំនិញ និងវិស័យឯកជននៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ