រដ្ឋសភាខ្មែរអនុម័តច្បាប់រឹតបន្តឹងបក្សនយោបាយ ចំពេលការបោះឆ្នោតជិតមកដល់
តាមការគ្រោងទុកនៅថ្ងៃទី២០ កុម្ភៈ២០១៧នេះ រដ្ឋសភាជាតិដែលមានតែគណបក្សប្រជាជនកម្ពុជា បានសម្រេចអនុម័តច្បាប់ស្តីពីគណបក្សនយោបាយដោយសំឡេង ៦៦។ ច្បាប់នេះ មាន១១ជំពូក និង៥០មាត្រា។រដ្ឋសភាប្រើប្រាស់ពេលវេលា៥ថ្ងៃតែប៉ុណ្ណោះដើម្បីអនុម័តច្បាប់ដែលចម្រូងចម្រាស់នេះ។ សាធារណៈមតិជាតិ និងអន្តរជាតិបានលើកឡើងថាច្បាប់នេះមានចេតនាគំរាមគំហែងដល់គណបក្សនយោបាយខណៈដែលការបោះឆ្នោតខិតជិតចូលមកដល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
ច្បាប់ដែលនឹងរឹតត្បិតគណបក្សនយោបាយនៅកម្ពុជាត្រូវបានរដ្ឋសភាសម្រេចអនុម័តយ៉ាងឆាប់រហ័សខណៈដែលការបោះឆ្នោតខិតជិតចូលមកដល់ និងនៅចំពេលដែលជម្លោះគណបក្សប្រជាជនកម្ពុជា និងគណបក្សសង្គ្រោះជាតិកំពុងតែតានតឹងខ្លាំងនាពេលបច្ចុប្បន្ន។
ច្បាប់ដែលទើបតែវិសោធនកម្មនេះ នឹងរឹតបន្តឹងគ្រប់គណបក្សនយោបាយទាំងអស់ប្រសិនបើបក្សនោះ ប្រព្រឹត្តិឱ្យប៉ះពាល់ដល់សន្តិសុខជាតិ ញុះញង់ដែលអាចនាំឱ្យការបែកបាក់ជាតិជាដើម។ ហើយច្បាប់នេះ ក៏បានហាមឃាត់មិនឱ្យបុគ្គលដែលមានទោសទណ្ឌធ្វើជាប្រធាន និងអនុប្រធានគណបក្សនយោបាយថែមទៀតផង។
បន្ថែមពីនេះ មាត្រានៃច្បាប់ក៏បានអនុញ្ញាតិឱ្យក្រសួងមហាផ្ទៃប្តឹងគណបក្សនយោបាយណាមួយដើម្បីឈានដល់ការរំលាយគណបក្សនោះចោលតែម្តង តាមរយៈយន្តការរបស់តុលាការកំពូល។ បន្ទាប់ពីរំលាយបក្សហើយថ្នាក់ដឹកនាំគណបក្សនយោបាយនោះនឹងត្រូវបានហាមឃាត់មិនឱ្យធ្វើសកម្មភាពនយោបាយរយៈពេល៥ឆ្នាំផងដែរ។ អ្វីដែលជាការគួរឱ្យសំគាល់មួយទៀត ច្បាប់ដែលវិសោធនកម្មនេះ បានហាមប្រាមមិនឱ្យគណបក្សនយោបាយទទួលវិភាគទានពីអង្គការក្រៅរដ្ឋាភិបាល សហគ្រាសសាធារណៈ និងស្ថាប័នបរទេសនោះទេ។ គួរកត់សំគាល់ថា ការធ្វើវិសោធនកម្មច្បាប់នេះ គឺធ្វើឡើងត្រឹមតែ៥ថ្ងៃប៉ុណ្ណោះ ក្រោយសេចក្តីស្នើច្បាប់នេះ ចូលដល់ដៃសភា និងបន្ទាប់ពីការស្នើរបស់លោកនាយករដ្ឋមន្ត្រីហ៊ុន សែនដែលជាប្រធានគណបក្សប្រជាជនកម្ពុជាដែលយកគំរូតាមច្បាប់តឹងរឹងរបស់ប្រទេសថៃ។
សាធារណៈមតិជាតិ និងអន្តរជាតិបានរិះគន់យ៉ាងខ្លាំងលើច្បាប់ដែលធ្វើឡើងដោយគណបក្សកាន់អំណាចនេះព្រោះថាច្បាប់នេះ មានចេតនាត្រង់ៗដាក់សម្ពាធលើគណបក្សសង្គ្រោះជាតិរបស់លោក សម រង្ស៊ី។ លោកសម រង្ស៊ីដែលមានទោសជាប់ខ្លួន និងទើបតែលាលែងតំណែងចេញពីប្រធានបក្សសង្គ្រោះជាតិមុនពេលដែលសេចក្តីស្នើច្បាប់ត្រូវបានវិសោធនកម្ម។
គណបក្សសង្គ្រោះជាតិ បានអះអាងថា ច្បាប់នេះនឹងបង្កឱ្យមានការបែកបាក់ឯកភាពជាតិធ្ងន់ធ្ងរ ហើយជាច្បាប់ដែលយកមកប្រើដើម្បីគាបសង្កត់ និងបំផ្លាញគណបក្សប្រជែង។
ក្រៅពីការរិះគន់នៅក្នុងស្រុក សភាអាស៊ានសម្រាប់សិទ្ធិមនុស្ស ក៏បានរិះគន់ការធ្វើវិសោធនកម្មច្បាប់ដែលស្នើដោយគណបក្សប្រជាជនកម្ពុជាយ៉ាងចាស់ដៃ។ អង្គការនេះ បានចេញសេចក្តីថ្លែងការណ៍ថ្កោលទោស ហើយថាច្បាប់នេះ មានគោលបំណងចង់សំដៅទៅកាន់បក្សប្រឆាំង។ បន្ថែមពីនេះ ប្រធានអង្គការសមាជិកសភាអាស៊ាន លោក Charles Santiago បានអះអាងថាច្បាប់នេះ គឺជាសូចនាករនៃការវាយប្រហារចំពោះលិទ្ធិប្រជាធិបតេយ្យនៅតំបន់អាស៊ានទាំងមូល។
ប៉ុន្តែសភាកម្ពុជាបានអះអាងថា ការវិសោធនកម្មនេះ គឺមិនមានរំលោភបំពានលទ្ធិប្រជាធិបតេយ្យនោះទេព្រោះការធ្វើវិសោធនកម្មនេះ ធ្វើឡើងតាមនីតិវិធីច្បាប់ដែលបានចែង ហើយក៏មិនបានធ្វើឡើងដើម្បីសំដៅបុគ្គលណាមួយ ឬបក្សណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ