អាមេរិក ចង់ឲ្យកម្ពុជា មានច្បាប់សម្រាប់អង្គការក្រៅរដ្ឋាភិបាលដែលប្រកបដោយតម្លាភាព
បន្ទាប់ពីដំណើរទស្សនកិច្ចរយៈពេលពីរថ្ងៃនៅកម្ពុជា លោក Scott Busby ឧបការីរងក្រសួងការបរទេសអាមេរិក ដែលទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ បានត្រឹមជំរុញឲ្យរដ្ឋាភិបាលកម្ពុជា បង្ហាញ បើកការពិភាក្សាជាចំហរ និងពិចារណាឡើងវិញ ពីសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល។ តាមមន្ត្រីសហរដ្ឋអាមេរិក រូប នេះ អាមេរិកគ្មានអ្វីក្រៅតែពីការសំណូមពរនោះទេ ហើយអាមេរិក ក៏មិនអាចដាក់សម្ពាធអ្វីផ្សេងបានដែរ ប្រសិនបើរដ្ឋាភិបាលកម្ពុជា ប្តេជ្ញា ត្រូវតែអនុម័តសេចក្តីព្រាងច្បាប់នេះ។ ប៉ុន្តែអាមេរិក គ្រាន់តែចង់ឲ្យកម្ពុជា មានច្បាប់មួយ ដែលប្រាកបដោយតម្លាភាពប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៣៥
លោក Scott Busby ឧបការីរងក្រសួងការបរទេសអាមេរិក បានជំរុញឲ្យរដ្ឋាភិបាលកម្ពុជា ពិចារណាឡើងវិញ ចំពោះសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល។ នេះជាការលើកឡើង នៅក្នុងសន្និសីទកាសែត បិទបញ្ចប់ដំណើរទស្សនកិច្ចរយៈពេលពីរថ្ងៃនៅកម្ពុជា នាស្ថានទូតអាមេរិក ក្រុងភ្នំពេញ នៅព្រឹកថ្ងៃទី ០២មិថុនានេះ។
បន្ទាប់ពីបានជួបមន្ត្រីរដ្ឋាភិបាល និងសង្គមស៊ីវិលមួយចំនួន នៅកម្ពុជា លោក Scott Busby បានត្រឹមស្នើឲ្យរដ្ឋាភិបាល គួរតែបង្ហាញជាសាធារណៈ ពីសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាលជាមុនសិន មុននឹងសម្រេចចិត្តថានឹងអនុម័តសេចក្តីព្រាងច្បាប់ដ៏ចម្រូងចម្រាស់នេះ នៅក្នុងខែមិថុនានេះ។ អាមេរិក ក៏ចង់ឲ្យរដ្ឋាភិបាល បើកការពិភាក្សាថ្នាក់ជាតិ ពិនិត្យឡើងវិញ ជាមួយនឹងសង្គមស៊ីវិល និងពលរដ្ឋកម្ពុជាផងដែរ។
លោក Scott Busby បានថ្លែងថា ប្រទេសណាក៏គួរតែមានច្បាប់នេះដែរ ប៉ុន្តែច្បាប់នេះ គួរតែត្រូវបានពិភាក្សា និងមានការព្រមព្រៀងក្នុងលក្ខខណ្ឌល្អមួយជាមុនសិន មុននឹងសម្រេចចិត្តដាក់ឲ្យប្រើប្រាស់។ លោកបានបញ្ជាក់ថា សហរដ្ឋអាមេរិក មិនអាចដាក់សម្ពាធណាមួយដល់កម្ពុជានោះទេ ប្រសិនបើកម្ពុជា បានអនុម័តច្បាប់នេះ។ ប៉ុន្តែអាមេរិក គ្រាន់តែចង់ឲ្យកម្ពុជា មានច្បាប់មួយដែលប្រកបដោយតម្លាភាព គោរពសិទ្ធមនុស្សត្រឹមត្រូវ មិនរឹតត្បិតសិទ្ធិសេរីភាព ជាពិសេសគឺអាចលើកកម្ពស់កិច្ចសហប្រតិបត្តិការក្នុងភាពជាដៃគូដ៏ល្អ រវាងរដ្ឋាភិបាល និងអង្គការសង្គមស៊ីវិលតែប៉ុណ្ណោះ។
សូមបញ្ជាក់ថា មកដល់ឆ្នាំ ២០១៥នេះ មានអង្គការក្រៅរដ្ឋាភិបាល ជាងមួយពាន់អង្គការ បាននឹងកំពុងដំណើរការនៅក្នុងប្រទេសកម្ពុជា។ ដំណើរទស្សនកិច្ចរបស់លោក Scott Busby នៅពេលនេះ នៅមិនទាន់មានឥទ្ធិពល ដល់ការតាំងចិត្តរបស់រដ្ឋាភិបាលខ្មែរ ដែលគ្រោងនឹងបញ្ជូនសេចក្តីព្រាងច្បាប់ស្តីពីអង្គការក្រៅរដ្ឋាភិបាលនេះ ទៅរដ្ឋសភា នៅថ្ងៃសុក្រសប្តាហ៍នេះនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ