អន្សមយក្សខ្មែរបំបែកកំណត់ត្រាពិភពលោក
នៅថ្ងៃទី១៣មេសានេះ នំអន្សមយក្សខ្មែរបានបំបែកកំណត់ត្រាពិភពលោក Guinness World។ គឺជាមោទនភាពរបស់ពលរដ្ឋខ្មែរគ្រប់រូប និងជាប្រវត្តិសាស្ត្ររបស់កម្ពុជា ដែលត្រូវគណៈកម្មាធិការឯតទគ្គកម្មពិភពលោក កត់ត្រាចុះក្នុងបញ្ជី។ បន្ទាប់ពីបានពិនិត្យនិងវាយតម្លៃយ៉ាងល្អិតល្អន់ទាំងលើផ្នែកបច្ចេកទេស រសជាតិ និងពិសេសគឺ ទម្ងន់ គណៈកម្មាធិការ Guinness World បានសម្រេចផ្តល់ប័ណ្ណដល់កម្ពុជា ដែលបញ្ជាក់ថា អន្សមយក្សខ្មែរបំបែកកំណត់ត្រាពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ជាព្រឹត្តិការណ៍ប្រវត្តិសាស្ត្រសម្រាប់កម្ពុជា ដែលអាចឈានដល់សម្រេចបានការបំបែកឯតទគ្គកម្មពិភពលោក តាមរយៈនំអន្សមដ៏ធំមិនធ្លាប់មាននៅលើលោក។ តាំងពីថ្ងៃទី១២មេសា អ្នកស្រី Seyda Subasi Gemici ជាជនជាតិអាល្លឺម៉ង ដែលតំណាងឲ្យក្រុមការងារ Guinness World Records បានមកអញ្ជើញទៅដល់ខេត្តសៀមរាបដោយផ្ទាល់ ដើម្បីពិនិត្យនំអន្សមយក្សរបស់ខ្មែរ។
អ្នកនាំពាក្យព្រឹត្តិការណ៍អង្គរសង្គ្រាន្ត លោក សោម រតនា បានប្រាប់វិទ្យុបារាំងថា គណៈកម្មាធិការឯតទគ្គកម្មពិភពលោក បានពិនិត្យវិនិច្ឆ័យយ៉ាងហ្មត់ចត់ ទៅលើបច្ចេកទេសចម្អិន រសជាតិ និងជាពិសេសគឺទម្ងន់របស់អន្សមតែម្តង។
គួរបញ្ជាក់ថា អន្សមនេះ មានទម្ងន់ ៣ ២០០គីឡូក្រាមពេលនៅឆៅ ហើយពេលចម្អិនរួច គឺមានទម្ងន់រហូតដល់ទៅ៤តោនឯណោះ។ ដើម្បីអាចចម្អិនអន្សមនេះឲ្យឆ្អិតបាន គេត្រូវប្រើពេលចម្អិនជិត៥០ម៉ោង។ នំអន្សមយក្សនេះ មានកម្ពស់មួយម៉ែត្រ និងមានប្រវែងរហូតទៅដល់ប្រាំម៉ែត្រ។ យោងតាមសមាគមចុងភៅកម្ពុជាក្នុងការវេចខ្ចប់និងចម្អិនអន្សមយក្សនេះ គេត្រូវការក្រុមមេចុងភៅ និងកូនកាំបិតចំនួន១០០នាក់ ហើយនំអន្សមដ៏ធំមិនធ្លាប់មាននេះ គឺជាស្នាដៃរបស់ចុងភៅខ្មែរ និងកូនខ្មែរពិតៗ។
លោក សោម រតនា អ្នកនាំពាក្យព្រឹត្តិការណ៍អង្គរសង្គ្រាន្ត បានថ្លែងដោយរំភើបថា នេះគឺជាមោទនភាពជាតិខ្មែរ ហើយនេះគឺបង្ហាញពីអត្តសញ្ញាណខ្មែរកាន់តែច្បាស់ទៅកាន់ពិភពលោក។
សូមរម្លឹកជូនថា កម្ពុជាធ្លាប់ជាប់កំណត់ត្រាពិភពលោក ចំនួនបួនដងមកហើយ។ កាលពីឆ្នាំ២០១២ គឺការរាំចង្វាក់ម៉ាឌីហ្សុន ដែលមានអ្នកចូលរួមជិត១ ០០០ នាក់។ កំណត់ត្រាមួយទៀត គឺកម្ពុជាមានអណ្តើកទឹកសាបដ៏ធំជាងនៅទន្លេមេគង្គ។ ភាសាខ្មែរជាភាសាដែលមានអក្សរច្រើនជាងគេ និងកំណត់ត្រាមួយទៀត គឺ អ្នកនយោបាយដែលកាន់ការក្នុងតំណែងផ្សេងៗច្រើនប្រភេទជាងគេក្នុងលោក ដែលកំណត់ត្រានេះ ថ្វាយដល់ព្រះបាទ នរោត្តម សីហនុ ។
នៅឆ្នាំ២០១៥នេះ គ្រប់គ្នាក៏កំពុងសម្លឹងមើលកំណត់ត្រាមួយបន្ថែមទៀត គឺការរាំចង្វាក់ម៉ាឌីហ្សុន ដែលមានអ្នករាំចំនួន២០១៥នាក់ ក្នុងព្រឹត្តិការណ៍អង្គរសង្គ្រាន្ត នៅខេត្តសៀមរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ