អ្នកវិភាគថារដ្ឋាភិបាលមិនចង់ចាប់ខ្លួនលោកសម រង្ស៊ី តែក៏មិនចង់ឲ្យលោកចូលស្រុក
ក្រោយពីមានលិខិតមួយ ដែលបង្ហាញពីវិធានការរបស់រដ្ឋាភិបាលទប់ស្កាត់មិនឲ្យលោកសម រង្ស៊ីចូលប្រទេសកម្ពុជា និងត្រូវបានប្រព័ន្ធផ្សព្វផ្សាយជាច្រើនចុះផ្សាយនោះ អ្នកវិភាគនយោបាយបានលើកឡើងថារដ្ឋាភិបាលកំពុងតែរកវិធីមិនឲ្យលោកសម រង្ស៊ី ចូលស្រុក ជាជាងការចាប់ខ្លួនលោកដាក់ពន្ធនាគារ។ លោកថាវត្តមានរបស់លោកសម រង្ស៊ីនឹងធ្វើឲ្យប៉ះពាល់ដល់ប្រជាប្រិយគណបក្សកាន់អំណាច។
ចុះផ្សាយនៅថ្ងៃ៖
ស្តាប់ - ០៣:០២
លោកបណ្ឌិតមាស នី អ្នកវិភាគនយោបាយបានឲ្យដឹងថាវិធានការមួយចំនួនរាប់ទាំងវិធានការពីតុលាការផង គឺជាផ្នែកមួយ ដែលរដ្ឋាភិបាលមិនចង់ឲ្យលោកសម រង្ស៊ីប្រធានគណបក្សសង្រ្គោះជាតិចូលប្រទេសកម្ពុជា ហើយមិនមែនជាការប៉ុនប៉ងចង់ចាប់ខ្លួនលោកសម រង្ស៊ីដាក់ពន្ធនាគារនោះទេ។
អ្នកវិភាគរូបនេះបញ្ជាក់ថាវត្តមានរបស់លោកសម រង្ស៊ី ក្នុងស្រុកគឺគណបក្សកាន់អំណាចអាចនឹងជួបការលំបាកពីររឿង។ ទី១បើរដ្ឋអំណាចចាប់លោកសម រង្ស៊ី ដាក់ពន្ធនាគារ នោះអ្នកគាំទ្រនឹងទាមទារឲ្យដោះលែង ដែលអាចនឹងក្លាយជារឿងធំទៅៗ ហើយប្រជាប្រិយរបស់រដ្ឋាភិបាលនឹងត្រូវខូច ដោយសារតែការបង្ក្រាបទៅលើការទាមទារនោះ។
លោកបន្តថា បើរដ្ឋាភិបាលបន្តឲ្យលោកសម រង្ស៊ីមានសេរីភាពក្នុងការធ្វើនយោបាយក្នុងស្រុក នោះគេនឹងព្រួយបារម្ភថាប្រជាប្រិយភាពរបស់ប្រធានគណបក្សប្រឆាំងរូបនេះនឹងកើនឡើងលឿន ដោយសារគេឆ្លុះបញ្ចាំងលើសកម្មភាពមហាជន ដែលធ្លាប់គាំទ្រលោក ពេលលោកត្រឡប់ពីបរទេសវិញលើកដំបូង។
លោកអេង ឆៃអ៊ាង មន្ត្រីជាន់ខ្ពស់គណបក្សសង្រ្គោះជាតិបានចាត់ទុកលិខិតនោះថាជាការរំលោភរដ្ឋធម្មនុញ្ញកម្ពុជា ព្រោះការហាមប្រាមនេះផ្ទុយនឹងស្មារតីនៃរដ្ឋធម្មនុញ្ញជាច្រើនមាត្រា ដូចជាមាត្រា៣១បានចែងថាប្រជាពលរដ្ឋខ្មែរមិនអាចត្រូវបានដកសញ្ជាតិ ឬនិរទេស ឬចាប់ខ្លួនទៅប្រទេសណាមួយឡើយ។ លោកបន្ថែមថានេះគឺជារឿងនយោបាយច្រើនជាង គឺគណបក្សកាន់អំណាចចង់បង្ហាញប្រាប់ប្រជាពលរដ្ឋខ្មែរថាលោកសម រង្ស៊ីអស់ច្រកចូលស្រុកខ្មែរ អញ្ចឹងគេចង់កាត់បន្ថយឥទ្ធិពលនៃការគាំទ្រគណបក្សសង្រ្គោះជាតិ ដោយសារតែថ្មីៗនេះ លោកសម រង្ស៊ីប្រកាសវិលចូលកម្ពុជាវិញ ទោះស្ថិតក្នុងស្ថានភាពបែបណាក៏ដោយ។
លោកបញ្ជាក់ថាអ្វីៗគឺជារឿងនយោបាយ គេអាចដោះស្រាយបានទាំងអស់ ឲ្យតែអ្នកនយោបាយមានឆន្ទៈដោះស្រាយ។
លិខិតដែលមានត្រារបស់ទីស្តីការគណៈរដ្ឋមន្ត្រីនោះ ត្រូវបានចុះផ្សាយលើទំព័រហ្វេសប៊ុករបស់លោក សម រង្ស៊ី កាលពីថ្ងៃទី២១ ខែតុលា។ លិខិតនោះ បានណែនាំឲ្យអាជ្ញាធរមានសមត្ថកិច្ច ចាត់វិធានការ៤សំខាន់ៗ គឺការតម្រូវឲ្យគ្រប់ក្រុមហ៊ុនអាកាសចរណ៍ទាំងអស់ ដែលធ្វើប្រតិបត្តិការហោះហើរមកកម្ពុជា មិនត្រូវអនុញ្ញាតឲ្យលោកសម រង្ស៊ី ឡើងយន្តហោះមកកម្ពុជាទេ ហើយត្រូវផ្ដល់របាយការណ៍ទៀងទាត់ក្នុងករណីមានការទិញសំបុត្រយន្តហោះធ្វើដំណើរមកកម្ពុជា។
បន្ថែមពីនេះ ករណីធ្វើដំណើរមកកាន់កម្ពុជា តាមរយៈយន្តហោះណាមួយ យន្តហោះនោះនឹងត្រូវបង្វែរឲ្យវិលត្រឡប់ទៅកាន់អាកាសយានដ្ឋានដើមវិញ ដោយមិនអនុញ្ញាតឲ្យចុះចតនៅកម្ពុជាឡើយ។ មិនត្រឹមតែប៉ុណ្ណោះ ក្នុងករណីយន្តហោះណាដែលដឹកប្រធានបក្សប្រឆាំងនេះចុះចតដល់អាកាសយានដ្ឋានណាមួយនៅកម្ពុជា យន្តហោះនោះនឹងមិនត្រូវបានអនុញ្ញាតឲ្យភ្ញៀវចាកចេញពីយន្តហោះឡើយ និងត្រូវបញ្ជាឲ្យត្រឡប់ទៅអាកាសយានដ្ឋានដើមវិញ។ និងចុងក្រោយ គឺក្នុងករណីដែលបុគ្គល សម រង្ស៊ី បានចាកចេញផុតពីយន្តហោះ នគរបាលអន្តោប្រវេសន៍ ត្រូវចាត់វិធានការតាមផ្លូវច្បាប់ ដើម្បីកុំឲ្យបុគ្គលនេះចូលកម្ពុជាបាន និងចាត់វិធានការផ្សេងទៀតតាមការចាំបាច់។
សូមបញ្ជាក់ថាក្នុងលិខិតនោះមានហត្ថលេខាឈ្មោះ តឹករ៉េត សំរេច និងមានត្រារបស់ទីស្តីការគណៈរដ្ឋមន្ត្រី ដែលបានធ្វើនៅថ្ងៃទី១២ ខែតុលា។ យ៉ាងណាមិញរហូតមកដល់ពេលនេះ មិនទាន់មានការបញ្ជាក់ជាផ្លូវការណាមួយពីរដ្ឋាភិបាលកម្ពុជា ឬទីស្តីការគណៈរដ្ឋមន្ត្រីនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ