អាជ្ញាធរគ្រោងដាក់ភ្លើងបំភ្លឺនៅប្រាសាទអង្គរវត្តដើម្បីឱ្យភ្ញៀវចូលទស្សនាពេលរាត្រី
ឆ្លើយតបនឹងការធ្លាក់ចុះចំនួនភ្ញៀវទេសចរ ក្រសួងទេសចរណ៍ គ្រោងនឹងបំពាក់ភ្លើងបំភ្លឺនៅតាមប្រាសាទអង្គរវត្ត និងប្រាសាទមួយចំនួនទៀត ដើម្បីឱ្យភ្ញៀវទេសចរអាចចូលទៅទស្សនានៅពេលរាត្រី។ នេះជាគម្រោងមួយនៅក្នុងគម្រោងជាច្រើនទៀត ដែលគណៈកម្មការអន្តរក្រសួង បានលើកឡើងក្នុងកិច្ចមួយនៅខេត្តសៀមរាប ថ្ងៃទី១៦ កញ្ញា ដើម្បីស្រោចស្រង់កំណើនភ្ញៀវទេសចរបរទេសឡើងវិញ ក្រោយមានការធ្លាក់ចុះក្នុងរយៈពេល៨ខែ ជាប់ៗគ្នាក្នុងឆ្នាំ២០១៩នេះ។
ចុះផ្សាយនៅថ្ងៃ៖
ស្តាប់ - ០២:០៥
គម្រោង Angkor Night គឺជាគំនិតផ្តួចផ្តើមមួយក្នុងចំណោមគំនិតផ្តួចផ្តើមចំនួន៤ សម្រាប់ដាក់បញ្ចូលក្នុងផែនការចំពោះមុខ ដើម្បីដោះស្រាយបន្ទាន់នូវបញ្ហាធ្លាក់ចុះនៃចំនួនភ្ញៀវទេសចរមកលេងខេត្តសៀមរាប។ ក្រសួងទេសចរណ៍ បានកត់សំគាល់ថា នៅពេលរាត្រី ភ្ញៀវទេសចរភាគច្រើនមានសកម្មភាពតែនៅក្នុងក្រុងសៀមរាប ដោយឡែក តំបន់ប្រាសាទគឺស្ងាត់ ទើបភាគីពាក់ព័ន្ធស្នើឱ្យមានការសិក្សា ធ្វើយ៉ាងណាឱ្យភ្ញៀវទេសចរអាចទៅទស្សនានៅក្នុងតំបន់ប្រាសាទមួយចំនួននៅពេលរាត្រី។
គេនៅចាំបានថា គម្រោងដាក់បញ្ចាំងអំពូលភ្លើងហ្វាតាមប្រាសាទអង្គរវត្តនេះ ត្រូវបានផ្អាកទៅវិញកាលពីខែឧសភា ឆ្នាំ២០០៩ បន្ទាប់ពីមានការរិះគន់ថាធ្វើឲ្យប៉ះពាល់ដល់ប្រាសាទ។ តែបើតាមក្រសួងទេសចរណ៍ ការសិក្សា ដាក់ឱ្យដំណើរការគម្រោងទស្សនាប្រាសាទអង្គរពេលរាត្រីតាមរយៈការបញ្ចាំងភ្លើង និងការទស្សនាក្រៅប្រាសាទនោះ គឺត្រូវតែការពារសុវត្ថិភាពប្រាសាទ និងវត្ថុបុរាណ ព្រមទាំងសុវត្ថិភាពរបស់ភ្ញៀងទេសចរផងដែរ។
លោក ថោង ខុន រដ្ឋមន្រ្តីក្រសួងទេសចរណ៍បានអះអាងថាចំនួនភ្ញៀវទេសចរទៅលេងខេត្តសៀមរាបបានធ្លាក់ចុះរង្វង់៩%និយាយជារួម។ និយាយដោយឡែកចំនួនអ្នកទេសចរចិនក៏ធ្លាក់ចុះ៨% ខណៈភ្ញៀវទេសចរជនជាតិកូរ៉េក៏ធ្លាក់ចុះពី២០%ទៅ៣០%។ ប៉ុន្តែចំនួនភ្ញៀវទេសចរមកទស្សនាកម្ពុជានៅទូទាំងប្រទេសបែរជាមានការកើនឡើងជាពិសេសនៅទីក្រុងភ្នំពេញតែម្តង។
ចំពោះការធ្លាក់ចុះចំនួនភ្ញៀវទេសចរណ៍ចិនមកខេត្តសៀមរាបនៅពេលនេះ ត្រូវបានលោក ថោង ខុន បន្ទោសថា វាជាផ្នែកមួយនៃឥទ្ធិពលសង្គ្រាមពាណិជ្ជកម្មរវាងចិន-អាមេរិក ដែលប៉ះពាល់ដល់ចំណូលរបស់ប្រជាជនចិន។ ចិនដែលជាប្រភពទេសចរដ៏ធំរបស់កម្ពុជា។ ប៉ុន្តែជាមួយគ្នានោះ ការលក់ផលិតផលអនុស្សាវរីយ៍ក្លែងក្លាយឲ្យភ្ញៀវទេសចរក៏ជាបញ្ហាមួយដែលនាំឲ្យភ្ញៀវទេសចរទៅលេងអង្គរវត្តធ្លាក់ចុះដែរ ដែលរដ្ឋមន្រ្តីក្រសួងទេសចរណ៍ព្រមានថា វាប៉ះពាល់ធ្ងន់ធ្ងរណាស់ដល់គោលដៅទេសចរណ៍ និងកិត្យានុភាពជាតិ ហើយបើអាជីវករណានៅបន្តធ្វើបែបនេះ នឹងប្រឈមមុខផ្លូវច្បាប់ដែលបង្កើតថ្មី ដើម្បីការពារអ្នកប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ