អាជ្ញាធរជាតិអប្សរា ហាមមិនឲ្យយានយន្តឆ្លងកាត់មុខប្រាសាទអង្គរវត្ត
អាជ្ញាធរជាតិអប្សរា បានបញ្ជាក់ថា ចាប់តាំងពីដើមខែឧសភានេះតទៅ មុខប្រាសាទអង្គរវត្ត នឹងលែងឲ្យមានការចរាចរយានយន្ត ដូចជា រថយន្ត ឬម៉ូតូ ទៀតឡើយ។ យ៉ាងណាក៏ដោយ ការថ្មើរជើង ឬការជិះកង់ ឬ ក្នុងករណីចាំបាច់ សម្រាប់រថយន្តពន្លត់អគ្គីភ័យ ឬរថយន្តសង្គ្រោះបន្ទាន់ជាដើម អាចធ្វើដំណើរត្រង់ទៅមុខប្រាសាទអង្គរវត្តបាន។ អាជ្ញាធរជាតិអប្សរា អះអាងថា ការធ្វើបែបនេះ គឺដើម្បីរក្សា ការពារ សោភ័ណភាព និងសណ្តាប់ធ្នាប់ នៅមុខប្រាសាទដែលជាបេះដូងនៃសម្បត្តិបេតិកភណ្ឌកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
អាជ្ញាធរជាតិអប្សរា និងអ្នកជំនាញ បានពិនិត្យឃើញហេតុផល ៣យ៉ាង ទើបសម្រេចចិត្ត ដាក់សញ្ញាបិទមិនឲ្យមានការចរាចរយានយន្តប្រើដោយម៉ាស៊ីន ឆ្លងកាត់មុខប្រាសាទអង្គរវត្ត។ ហេតុផលទាំង ៣យ៉ាង ដែលលោកឡុង កុសល អ្នកនាំពាក្យអាជ្ញាធរជាតិអប្សរា បញ្ជាក់ថា ដោយសារចំនួនអ្នកទេសចរមានច្រើន ដូច្នេះបានបង្កឲ្យមានការកកស្ទះចរាចរណ៍ ប្រសិនបើមានការបើកបរឆ្លងកាត់។ មួយវិញទៀត រថយន្តដឹកអ្នកទេសចរភាគច្រើន បានចតគ្មានសណ្តាប់ធ្នាប់ ធ្វើឲ្យខូចសោភ័ណភាពអ្នកទស្សនា។ លើសពីនេះ រថយន្តដឹកអ្នកទេសចរខ្លះ បានចតដាក់ភ្ញៀវ នៅជិតប្រាសាទពេក ដែលជាហេតុធ្វើឲ្យរំញ័រ ដល់ប្រាង្គប្រាសាទអង្គរវត្ត។
លោកឡុង កុសល អះអាងថា នេះគ្រាន់តែជាការសម្រួលចរាចរណ៍ដើម្បីថែរក្សា សោភ័ណភាព និងសណ្តាប់ធ្នាប់ សុវត្ថិភាព មុខប្រាសាទអង្គរវត្តតែប៉ុណ្ណោះ។ ហើយតំណាងឲ្យអាជ្ញាធរជាតិអប្សរា លោកសំណូមពរ ឲ្យពលរដ្ឋ ជាពិសេសអ្នកទេសចរ យោគយល់ និងគោរពនៅលក្ខខណ្ឌនេះ ដើម្បីសម្បត្តិបេតិកភណ្ឌរបស់កម្ពុជា។
យ៉ាងណាក៏ដោយ អ្នកដំណើរ ឬអ្នកទេសចរ ដែលចង់ប្រើមធ្យោបាយ ដូចជាឡាន ម៉ូតូ ទៅកាន់ប្រាសាទបាយ័ន ឬប្រាសាទផ្សេងៗទៀត ដែលនៅជិតប្រាសាទអង្គរវត្ត អាចធ្វើដំណើរតាមផ្លូវវាង ដែលអាជ្ញាធរជាតិអប្សរា បានដាក់គំនូសសញ្ញាបង្ហាញ។ ហើយរថយន្តដឹកអ្នកទេសចរ ក៏ទទួលបានចំណតដ៏សមរម្យមួយ ដែលមានចម្ងាយប្រមាណតែ ៥០ម៉ែត្រ ពីមុខប្រាសាទអង្គរវត្ត។
សូមបញ្ជាក់ថា ដើម្បីរក្សាសោភ័ណភាពរមណីយដ្ឋានអង្គរ កន្លងមកអាជ្ញាធរជាតិអប្សរា ក៏បានចេញបំរាមមិនឲ្យ ដាក់តាំងផ្ទាំងផ្សព្វផ្សាយពាណិជ្ជកម្មគ្រប់ប្រភេទ នៅតាមហាង ឬតូបលក់ដូរ និងបានដាក់សំណើមួយទៀត ទៅដល់ក្រុមហ៊ុនស្រាបៀរ និងភេសជ្ជៈទាំងឡាយ ដែលមានផ្ទាំងផ្សព្វផ្សាយពាណិជ្ជកម្ម នៅតំបន់អង្គរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ