ផ្អាកសមយុទ្ធយោធាជាមួយអាមេរិក កម្ពុជាថាមិនពាក់ព័ន្ធនឹងឥទ្ធិពលចិនទេ
រដ្ឋាភិបាលកម្ពុជា កាលពីថ្ងៃចន្ទដើមសប្ដាហ៍នេះ បានឲ្យដឹងពីការលុបចោលសមយុទ្ធយោធាជាមួយសហរដ្ឋអាមេរិក។ ជាលំហាត់សមយុទ្ធយោធា ឆ្មាំអង្គរ ដែលត្រូវបានរៀបចំធ្វើជារៀងរាល់ឆ្នាំរួមគ្នា ៧ឆ្នាំកន្លងមកហើយ។ ក្រសួងការពារជាតិកម្ពុជាបានអះអាងប្រាប់សារព័ត៌មានថា ការផ្អាកសមយុទ្ធឆ្មាំអង្គរនាឆ្នាំនេះ មិនស្ថិតក្រោមឥទ្ធិពលរបស់ចិនទេ បើទោះបីជាចិនទើបតែធ្វើសមយុទ្ធជាមួយកម្ពុជាកាលពីខែមុនក៏ដោយ។
ចុះផ្សាយនៅថ្ងៃ៖
ស្តាប់ - ០២:០៧
ការផ្អាកសមយុទ្ធយោធាឆ្មាំអង្គរ ដែលកម្ពុជាបានធ្វើរួមគ្នាជាមួយអាមេរិក៧ឆ្នាំកន្លងមកហើយ គឺដោយសារតែកម្ពុជាកំពុងជាប់រវល់នៅក្នុងប្រតិបត្តិការបង្ក្រាបគ្រឿងញៀនខុសច្បាប់ និងត្រូវត្រៀមខ្លួនការពារសន្តិសុខនិងសណ្ដាប់ធ្នាប់ សម្រាប់ការបោះឆ្នោតឃុំសង្កាត់នៅក្នុងខែមិថុនាខាងមុខ។ នេះគឺជាការអះអាងរបស់លោក ឈុំ សុជាតិ អ្នកនាំពាក្យក្រសួងការពារជាតិកម្ពុជា។
ជាការកត់សម្គាល់ ការសម្រេចលុបចោលសមយុទ្ធយោធាជាមួយអាមេរិកនេះ ធ្វើឡើងតែមួយខែប៉ុណ្ណោះ បន្ទាប់ពីកម្ពុជាបើកសមយុទ្ធនាគមាសជាមួយចិន រយៈពេល៩ថ្ងៃ កាលពីខែធ្នូឆ្នាំ២០១៦កន្លងទៅ នៅខេត្តកំពង់ស្ពឺ។ ជាសមយុទ្ធរួមគ្នាដ៏ធំមិនធ្លាប់មាន រវាងកងយោធពលខេមរភូមិន្ទកម្ពុជា និងកងទ័ពរំដោះប្រជាជនចិន ដោយមានការចូលរួមពីនាយទាហាននៃប្រទេសទាំងពីរប្រមាណជិត៤រយនាក់ ក្នុងគោលដៅផ្លាស់ប្ដូរបទពិសោធន៍លើកិច្ចការមនុស្សធម៌ ជួយសង្គ្រោះមហន្តរាយ និងប្រឆាំងភេរវកម្ម។
យ៉ាងណាក៏ដោយ អ្នកនាំពាក្យក្រសួងការពារជាតិកម្ពុជាបានបញ្ជាក់ច្បាស់ៗថា ការសម្រេចនេះមិនពាក់ព័ន្ធជាមួយឥទ្ធិពលរបស់ចិនលើកម្ពុជាទេ។ និងថា នៅក្នុងវិស័យយោធា កម្ពុជាមានកិច្ចសហប្រតិបត្តិការជិតស្និទ្ធទាំងជាមួយអាមេរិកនិងចិន ព្រមទាំងប្រទេសផ្សេងទៀតផងដែរ។
គួររំឭកជូនថា អស់រយៈពេល៧ឆ្នាំមកហើយ កម្ពុជានិងសហរដ្ឋអាមេរិក បានរៀបចំលំហាត់សមយុទ្ធយោធារួមគ្នា ឲ្យឈ្មោះថា សមយុទ្ធឆ្មាំអង្គរ។ ជាសមយុទ្ធដែលជាទូទៅប្រព្រឹត្តធ្វើនៅក្នុងអំឡុងខែមីនានិងមេសា ក្នុងខេត្តកំពង់ស្ពឺ ដែលផ្ដោតសំខាន់ទៅលើការហ្វឹកហ្វឺនកងកម្លាំងកម្ពុជាក្នុងប្រតិបត្តិការរក្សាសន្តិភាពនិងមនុស្សធម៌។ កាលពីឆ្នាំ២០១៦កន្លងទៅ នៅក្នុងពិធីបិទលំហាត់សមយុទ្ធ លោកឯកអគ្គរដ្ឋទូតអាមេរិកប្រចាំនៅកម្ពុជា បានចាត់ទុកសមយុទ្ធឆ្មាំអង្គរជាសមយុទ្ធមួយក្នុងចំណោមសមយុទ្ធប្រចាំឆ្នាំសំខាន់ៗក្នុងទំនាក់ទំនងយោធារវាងអាមេរិកនិងកម្ពុជា។ លោកថែមទាំងសង្ឃឹមថា សមយុទ្ធដ៏សំខាន់នេះ នឹងបន្តពង្រឹងកិច្ចសហប្រតិបត្តិការយោធារវាងប្រទេសទាំងពីរឲ្យកាន់តែរឹងមាំថែមទៀតនាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ