អាជ្ញាធរជាតិអប្សរាព្រមានរុះរើសំណង់ខុសច្បាប់នៅតំបន់អង្គរដោយគ្មានការលើកលែង
អាជ្ញាជាតិអប្សារាបានថ្លែងថា សំណង់ខុសច្បាប់ទាំងអស់ដែលបានសាងសង់នៅតំបន់អង្គរនឹងត្រូវរុះរើដោយគ្មានការលើកលែង។ សេចក្តីថ្លែងនេះធ្វើឡើងនៅព្រឹកថ្ងៃទី១២ខែកក្កដា ឆ្នាំ២០១៧ក្នុងសន្និសីទសារព័ត៌មានមួយនៅទីស្នាក់ការអាជ្ញាធរជាតិអប្សរា។ សន្និសីទកាសែតនេះ ជាសារដាស់តឿន និងជាព័ត៌មានដើម្បីជួយជំរុញឲ្យម្ចាស់សំណង់ខុសច្បាប់ និងសាធារណជនទាំងអស់ យល់ដឹងកាន់តែច្បាស់អំពីផលប៉ះពាល់នៃសំណង់ចំពោះបេតិកភណ្ឌអង្គរ និងចូលរួមអភិរក្សឲ្យបានគង់វង្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
អត្ថបទដោយ៖ តាន់ គឹមច័ន្ទវាសនា និងហេង ពុធីរៈ
នៅក្នុងសន្និសីទសារព័ត៌មានស្តីពីគណៈកម្មការចម្រុះដើម្បីរុះរើសំណង់ខុសច្បាប់ក្នុងតំបន់អង្គរ លោក ស៊ុំ ម៉ាប់ អគ្គនាយកអាជ្ញាធរជាតិអប្សរា បានអោយដឹងថា ម្ចាស់សំណង់ខុសច្បាប់នៅក្នុងតំបន់អង្គរតំរូវអោយធ្វើការរុះរើជាបន្ទាន់ ដោយហេតុថាសំណង់ទាំងអស់ បានធ្វើអោយប៉ះពាល់ដល់សម្បត្តិបេតិកភណ្ឌ ទេសភាពវប្បធម៌ និងកំរិតបរិស្ថាន ។ ហើយផលប៉ះពាល់អាក្រក់ធ្ងន់ធ្ងរជាងនេះ គឺអាចបណ្តាលអោយប្រាសាទអង្គរវត្ត ត្រូវអង្គការយូណេស្កូដកចេញពីបញ្ជីសម្បត្តិបេតិកភណ្ឌពិភពលោកថែមទៀត។ មិនត្រឹមតែប៉ុណ្ណោះប្រជាពលរដ្ឋគ្មានហេតុផល និងលិខិតស្នាមផ្លូវច្បាប់គ្រប់គ្រាន់ក្នុងការធ្វើការទាមទារនោះទេ ដោយសារតែពួកគេធ្វើការសាងសង់ដោយគ្មានច្បាប់ទំលាប់។
តាមកិច្ចប្រជុំដែលរៀបចំឡើងដោយអាជ្ញាធរជាតិអប្សរា កាលពីម្សិលមិញ ភាគីពាក់ព័ន្ធបានឯកភាពគ្នាលើការងាររុះរើសំណង់ខុសច្បាប់ក្នុងតំបន់អង្គរ ក្នុងន័យការពារឲ្យបាននូវបេតិកភណ្ឌអង្គរ។ សកម្មភាពនៃការចុះរុះរើ នឹងធ្វើឡើងដោយកម្លាំងកងរាជអាវុធហត្ថ នៅក្នុងសប្តាហ៍ទី ៣ នៃខែកក្កដា នេះ។ យ៉ាងណាមិញអាជ្ញាធរ បានរៀបចំមធ្យោបាយ សម្ភារៈ និងត្រៀមកម្លាំងដើម្បីទប់ស្កាត់បាតុភាពណាមួយដែលអាចនឹងកើតមានឡើងក្នុងអំឡុងពេលអនុវត្តការងារ។
គួរបញ្ជាក់ថា សកម្មភាពសាងសង់ របស់ពលរដ្ឋនៅតំបន់អង្គររួមមាន ផ្ទះ តូបលក់ដូរ និងការចាក់ដីបំពេញសំណង់ ខុសច្បាប់ក្នុង មានជាង ៥០០ករណី ដែលក្នុងនោះ មានការរំលោភសាងសង់កៀកនឹងកំពែងប្រាសាទ។ អាជ្ញាធរជាតិអប្សរា បញ្ជាក់ថា សកម្មភាពរំលោភសាងសង់ទាំងនេះ បានក្លាយជាសកម្មភាពអវិជ្ជមានដ៏ធ្ងន់ធ្ងរ ហើយធ្វើឲ្យអាប់ឱនដល់កិត្យានុភាពរបស់កម្ពុជា ក្នុងការថែរក្សា ការពារ និងអភិរក្សរមណីយដ្ឋានអង្គរ។ អាជ្ញាធរជាតិអប្សរា បានដាក់កំណត់ឲ្យរុះរើ ដែលត្រូវផុតកំណត់នៅថ្ងៃទី១៥មិថុនាមកម្ល៉េះ។ ប៉ុន្តែប្រជាពលរដ្ឋមានការស្ទាក់ស្ទើរក្នុងការរុះរើរហូតមកដល់ថ្ងៃ ដែលអាជ្ញាធរអប្សរាចាប់ផ្តើមចាត់វិធានការ។
គួររំលឹកផងដែរថា តំបន់អង្គរចុះបញ្ជី នៅឆ្នាំ ១៩៩២ ក្នុងបេតិកភណ្ឌពិភពលោក ដែលប្រឈម នឹងគ្រោះថ្នាក់ ក្នុងគោលបំណងគៀរគរធនធានហិរញ្ញវត្ថុ និងបច្ចេកទេស ដើម្បីអភិរក្ស និងអភិវឌ្ឍ។ ដូច្នេះហើយ ប្រទេសចុះបញ្ជី ត្រូវកំណត់តំបន់ការពាររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ