អាជ្ញាធរអប្សរា រកឃើញថា ស្ត្រីថតរូបភាពអាក្រាតពាក់កណ្តាលខ្លួន នៅប្រាសាទបុរាណ ជាជនជាតិចិន
អាជ្ញាធរជាតិអប្សរា បានធ្វើការថ្កោលទោស ចំពោះរូបភាពអាក្រាតពាក់កណ្តាលខ្លួន របស់ស្ត្រីម្នាក់ នៅប្រាសាទបុរាណ ក្នុងខេត្តសៀមរាប។ រូបភាពស្ត្រីនោះ បានបង្ហោះនៅក្នុងហ្វេសប៊ុក ធ្វើឲ្យមានការភ្ញាក់ផ្អើលយ៉ាងខ្លាំង។ រហូតដល់រសៀលថ្ងៃអាទិត្យនេះ អាជ្ញាធរជាតិអប្សរា បានរកឃើញថា ស្រ្តីថតរូបភាពអាក្រាតនោះ ជាជនជាតិចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ការថតបង្ហាញកាយអាក្រាត មួយកំណាត់ខ្លួនឡើងលើ របស់ស្ត្រីម្នាក់ នៅប្រាសាទបុរាណ ជាអំពើប្រាសចាក ផ្ទុយទាំងស្រុងពីសីលធម៌ និងវប្បធម៌ខ្មែរ ព្រមទាំងអោយមានការអាប់ឱនយ៉ាងធ្ងន់ធ្ងរ ដល់បេតិកភណ្ឌជាតិ និងកិត្តិយសនារីភេទ។ នេះបើតាមសេចក្តីប្រកាសព័ត៌មានរបស់អាជ្ញាធរជាតិអប្សរា។
សេចក្តីប្រកាស ដែលបានផ្សព្វផ្សាយ កាលពីយប់ថ្ងៃទី២៤ ខែមករា បង្ហាញថា អាជ្ញាធរជាតិអប្សរា នឹងធ្វើការស្រាវជ្រាវរកការពិត ព្រមទាំងប្តេជ្ញាអនុវត្តនីតិវិធីច្បាប់ តាមគ្រប់រូបភាព ដើម្បីធ្វើការផ្តន្ទាទោស ចំពោះការប្រព្រឹត្តបែបអាសអាភាស និងខ្វះការពិចារណាបែបនេះ។
ជាមួយគ្នានោះ អាជ្ញាធរជាតិអប្សរា ក៏បានធ្វើការអំពាវនាវដល់ប្រជាពលរដ្ឋទាំងអស់ សូមចូលរួមក្នុងការផ្តល់ព័ត៌មានជាតម្រុយ ដែលអាចនាំអោយរកឃើញការពិតក្នុងករណីរូបភាពអាក្រាតនោះ។ សេចក្តីប្រកាស បានអំពាវនាវដល់ប្រជាពលរដ្ឋចូលរួមសហការជាមួយអាជ្ញាធរជាតិអប្សរា ដើម្បីលើកកំពស់កិត្យានុភាព នៃវប្បធម៌ខ្មែរដ៏រុងរឿង។
រូបភាពស្ត្រីម្នាក់ ថតដោះអាវ នៅក្នុងប្រាសាទ ស្លៀកតែសំពត់ និងជូតក្បាល ថតតាមបែបបង្ហាញម៉ូតចំនួន ៤ ប៉ុស្តិ៍។ រូបថតទាំងនោះ មានសរសេរអក្សរឡាតាំង ដាក់ថា WANIMAL។
លោកស្រី ចៅ ស៊ុនកិរិយា អ្នកនាំពាក្យអាជ្ញាធរជាតិអប្សរា បានឲ្យដឹងថា រហូតដល់ថ្ងៃអាទិត្យនេះ អាជ្ញាធរជាតិអប្សរា បានស្រាវជ្រាវរកឃើញរូបថតនោះ ថតនៅប្រាសាទណា ហើយស្ត្រីអ្នកថតរូបអាក្រាតពាក់កណ្តាលខ្លួន នៅប្រាសាទបុរាណខ្មែរនោះ ជាជនជាតិចិន ដោយមានក្រុមហ៊ុន មកពីប្រទេសចិន ជាអ្នកផលិត។ នៅពេលដឹងឈ្មោះក្រុមហ៊ុនចិន ផលិតរូបភាពអាក្រាតនោះ អាជ្ញាធរជាតិអប្សរា នឹងរៀបចំឯកសារ ប្តឹងទៅកាន់ស្ថានទូតចិន។
ជាការកត់សម្គាល់ កាលពីឆ្នាំ២០១៣ ក៏មានស្ត្រីរុស្ស៊ីម្នាក់ មកថតរូបអាក្រាត នៅប្រាសាទបុរាណខ្មែរ ហើយទទួលបានពានរង្វាន់លេខ១ ក្នុងទស្សនាវដ្តី Play Boy៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ