អង្គរក្ស លោក សម រង្ស៊ី ៥នាក់ទៀត ត្រូវបានចាប់ខ្លួនម្សិលមិញនៅខេត្តបន្ទាយមានជ័យ
ក្រុមអង្គរក្សរបស់លោក សម រង្ស៊ី ចំនួន៥នាក់បន្ថែមទៀតត្រូវបានសមត្ថកិច្ចនៅក្រុងប៉ោយប៉ែតខេត្តបន្ទាយមានជ័យធ្វើការចាប់ខ្លួន កាលពីម្សិលមិញ ខណៈដែលពួកគេទៅត្រៀមចាំអមដំណើរថ្នាក់ដឹកនាំគណបក្សប្រឆាំងចូលក្នុងប្រទេស។ ការចាប់ខ្លួនក្រុមអង្គរក្ស លោក សម រង្ស៊ី បន្ថែមទៀតនេះ បានធ្វើឲ្យចំនួនសកម្មជនបក្សប្រឆាំងដែលត្រូវបានចាប់ឃុំខ្លួនកើនឡើងដល់៨៨នាក់។
ចុះផ្សាយនៅថ្ងៃ៖ កែប្រែថ្ងៃទី៖
ការចាប់ខ្លួនក្រុមអង្គរក្សលោក សម រង្ស៊ី ចំនួន៥នាក់បន្ថែមទៀតនេះ គឺនៅពេលក្រុមសមត្ថកិច្ចចុះត្រួតពិនិត្យផ្ទះសំណាក់មួយកន្លែងនៅជិតព្រំដែនកម្ពុជា-ថៃ ក្នុងខេត្តបន្ទាយមានជ័យ កាលពីថ្ងៃទី១០ខែវិច្ឆិកា ពោលមួយថ្ងៃក្រោយពីលោក សម រង្ស៊ី មិនបានមកដល់ប្រទេសកម្ពុជាតាមការគ្រោងទុក។
កាលពីថ្ងៃទី៥វិច្ឆិកា អាជ្ញាធរខណ្ឌមានជ័យ ក៏បានដាក់កម្លាំងទៅឡោមព័ទ្ធទីស្នាក់ការគណបក្សសង្គ្រោះជាតិ ដែលមានទីតាំងនៅក្នុងសង្កាត់ចាក់លើ ក្រុងភ្នំពេញ ដោយចាប់ខ្លួនអង្គរក្ស លោក សម រង្ស៊ី ចំនួន១០នាក់ដែលយាមនៅស្នាក់ការនោះ។ ក្នុងចំណោមអង្គរក្សទាំង១០នាក់នេះដែលត្រូវបានចាប់ខ្លួននោះក៏មាន លោក ពួក ចន្ដា ប្រធានអង្គរក្សលោក សម រង្ស៊ី ដែលត្រូវជនមិនស្គាល់មុខវាយឱ្យរងរបួសក្បាលកាលពីថ្ងៃទី២២ ខែកញ្ញាផងដែរ។
គិតត្រឹមថ្ងៃទី១០ វិច្ឆិកានេះ គឺមានសកម្មជនដែលគាំទ្រ លោក សម រង្ស៊ី ចំនួន ៨៨នាក់ហើយត្រូវបាន ចាប់ឃុំខ្លួនក្រោមការចោទប្រកាន់ថា «រួមគំនិតក្បត់» ខណៈ៥៨នាក់ទៀតមានដីកាតាមចាប់ខ្លួនបន្ទាប់ពីពួកគេប្រកាសគាំទ្រ ការវិលត្រឡប់របស់លោក សម រង្ស៊ី។ ក្រៅពីការចាប់ឃុំខ្លួន គឺមានសកម្មជនយ៉ាងតិច១២នាក់ត្រូវបានវាយប្រហារឲ្យរងរបួសនៅក្នុងរូបភាពផ្សេងៗ។ នេះបើតាមមន្រ្តីបក្សប្រឆាំង។
ប៉ុន្តែក្រោយពីការប្រកាសរបស់លោក ហ៊ុន សែន ឲ្យសកម្មជនគាំទ្រ លោក សម រង្ស៊ី ចេញសារភាពដើម្បីរួចទោសនោះ គឺមានសកម្មជនចំនួន១០៤នាក់បានចូលសារភាពដើម្បីបញ្ជៀសការចាប់ឃុំខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ