មេសហជីពចង់ឲ្យEU អន្តរាគមន៍ទៅរដ្ឋាភិបាលទម្លាក់ចោលបណ្តឹងប្រឆាំងនឹងពួកគេ
ក្រុមមេដឹកនាំសហជីពដែលរងបណ្តឹងនៅតុលាការ ត្រូវបានគណៈប្រតិភូសហភាពអឺរ៉ុបហៅជួបពិភាក្សាការងារកាលពីថ្ងៃចន្ទ ដើម្បីចង់ដឹងពីស្ថានភាពរបស់ពួកគេនិងសិទ្ធិការងារនៅកម្ពុជា។ នេះជាការបញ្ជាក់របស់លោក អាត់ ធន់ ជាប្រធានសហជីពម្នាក់ក្នុងចំណោមសហជីពផ្សេងទៀតដែលបានជួបគណៈប្រតិភូសហភាពអឺរ៉ុប ដែលកំពុងបំពេញបេសកកម្មពិសេសដើម្បីស្វែងរកការពិតនៅកម្ពុជា ទាក់ទងសិទ្ធិមនុស្ស និងសិទ្ធិការងារ មុននឹងក្រុមប្លុកលោកសេរីទាំងនេះ សម្រេចថា តើត្រូវបន្តការអនុគ្រោះពន្ធនាំចូលអឺរ៉ុប ឬក៏បញ្ឈប់។
ចុះផ្សាយនៅថ្ងៃ៖
ស្តាប់ - ០២:០២
លោក អាត់ ធន់ ប្រធានសហភាពការងារកម្ពុជា បានប្រាប់វិទ្យុបារាំងអន្តរជាតិRFI នៅថ្ងៃនេះថា មេដឹកនាំសហជីពដែលត្រូវបានគណៈប្រតិភូសហភាពហៅជួបគឺភាគច្រើនជាអ្នកដែលកំពុងជាប់បណ្តឹងនៅតុលាការ។
មេដឹកនាំសហជីពដែលកំពុងជាប់បណ្តឹងនៅតុលាការទាក់ទងទៅនឹងការធ្វើបាតុកម្មកន្លងមកនោះ រួមមាន លោក អាត់ ធន់ លោកស្រី យ៉ាង សុភ័ណ្ឌ និង លោក ប៉ាវ ស៊ីណា ជាដើម។
បើតាមលោក អាត់ ធន់ គណៈប្រតិភូអឺរ៉ុបបានសួរបញ្ជាក់ពួកមេដឹកនាំសហជីពអំពីបណ្តឹងទាំងនេះ ថាតើត្រូវបានទម្លាក់ចោលហើយឬនៅ? ចំណែកឯសិទ្ធិធ្វើកូដកម្មឬបាតុកម្ម អាចអនុវត្តបានដែរឬទេ? ជាការឆ្លើយតបក្រុមសហជីពបានបញ្ជាក់ប្រាប់សហភាពអឺរ៉ុបពីកង្វល់ទាំងនេះ និងកង្វល់ចំពោះច្បាប់សហជីព ដែលពួកគេថាបានរិតបន្តឹងសិទ្ធិកម្មករក្នុងការតវ៉ា។
យ៉ាងណាក៏ដោយ គណៈប្រតិភូសហភាពអឺរ៉ុបមិនបាននិយាយទាក់ទងនឹងការបន្តការអនុគ្រោះពន្ធនាំចូលទំនិញពីកម្ពុជាទៅអឺរ៉ុប ឬក៏ព្យួរនោះទេ។ ប៉ុន្តែសហភាពអឺរ៉ុបបានសន្យាថា នឹងយកបញ្ហាបណ្តឹងប្រឆាំងមេដឹកនាំសហជីព និងការរិតបន្តឹងសិទ្ធិធ្វើកូដកម្ម ឬបាតុកម្មនេះទៅជជែកជាមួយរដ្ឋាភិបាលកម្ពុជា។ នេះបើតាម លោក អាត់ ធន់។
សូមបញ្ជាក់ថា សហភាពអឺរ៉ុប បានបញ្ជូនគណៈប្រតិភូរបស់ខ្លួនមកកម្ពុជារយៈពេល ៨ថ្ងៃ គឺចាប់ពីថ្ងៃទី៥ ដល់ថ្ងៃទី១១ខែកក្កដានេះ ដែលគេហៅថា ជាបេសកកម្មពិសេសដើម្បីស្វែងរកការពិតមួយនៅកម្ពុជាទាក់ទងបញ្ហាសិទ្ធិមនុស្ស សិទ្ធិការងារ និងសិទ្ធិធ្វើនយោបាយ មុនពេលសហភាពអឺរ៉ុបសម្រេចព្យួរប្រព័ន្ធអនុគ្រោះពន្ធពីកម្ពុជា ឬត្រូវបន្តទៅទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ