ADB៖ ប្រទេសកម្ពុជា ចាំបាច់ត្រូវពង្រីកមូលដ្ឋានសេដ្ឋកិច្ចឲ្យបានធំជាងមុន
របាយការណ៍របស់ធនាគារអភិវឌ្ឍន៍អាស៊ី ADB ដែលបានផ្សព្វផ្សាយនៅថ្ងៃទី១៧ធ្នូនេះ បង្ហាញថា ប្រទេសកម្ពុជា ចាំបាច់ត្រូវពង្រីកមូលដ្ឋានសេដ្ឋកិច្ចរបស់ខ្លួន ដើម្បីគាំទ្រឲ្យមានកំណើនរឹងមាំ និងមានលក្ខណៈចែករំលែក សម្រាប់ទាំងអស់គ្នា។ ការពង្រីកមូលដ្ឋានសេដ្ឋកិច្ចរបស់កម្ពុជា ក៏ត្រូវ ADB អះអាងថា ដើម្បីឲ្យប្រទេសកម្ពុជា អាចទាញប្រយោជន៍ពីសហគមន៍សេដ្ឋកិច្ចអាស៊ាន AEC ដែលនឹងលេចចេញជារូបរាង នាពេលខាងមុខ។
ចុះផ្សាយនៅថ្ងៃ៖
ស្តាប់ - ០២:០២
របាយការណ៍ថ្មីមួយរបស់ធនាគារអភិវឌ្ឍន៍អាស៊ី ហៅកាត់ថា ADB ដែលមានចំណងជើងថា “ប្រទេសកម្ពុជា៖ ការធ្វើពិពិធកម្មលើសពីវិស័យកាត់ដេរ និងវិស័យទេសចរណ៍” ត្រូវបានចេញផ្សាយនៅថ្ងៃពុធ ទី១៧ ខែធ្នូនេះ។ ជារបាយការណ៍ ដែលបង្ហាញឲ្យឃើញពីភាពចាំបាច់ ក្នុងការធ្វើពិពិធកម្មសេដ្ឋកិច្ច និងលើកកម្ពស់សមត្ថភាពឧស្សាហកម្ម ក៏ដូចជា ភាពចាំបាច់ក្នុងការខិតខំប្រឹងប្រែងបន្ថែមទៀត ដើម្បីធ្វើឲ្យឧស្សាហកម្មកាត់ដេរ ទេសចរណ៍ និងកសិកម្មរបស់ប្រទេសកម្ពុជា កាន់តែមានសក្តានុពលខ្លាំងក្លា។
របាយការណ៍ជាភាសាអង់គ្លេស កំរាស់ ១៥១ ទំព័រ របស់ ADB បានកំណត់ឧបសគ្គសំខាន់ៗ ចំនួន ៤ ដែលនាំឲ្យមានភាពរាំងស្ទះដល់សេដ្ឋកិច្ចកម្ពុជា ដូចជា ជំនាញ និងកម្រិតវប្បធម៌របស់កម្មករនិយោជិតនៅមានកម្រិតទាប កង្វះហេដ្ឋារចនាសម្ព័ន្ធ អំពើពុករលួយ និងការគ្រប់គ្រងវិស័យសាធារណៈនៅមានកម្រិត។ កង្វះពិពិធភាពនៃផលិតផល និងសេវាកម្ម ដែលផលិតនៅក្នុងប្រទេសនេះ ធ្វើឲ្យសេដ្ឋកិច្ចនេះ ងាយរងគ្រោះ ដោយសារតែបម្រែបម្រួលស្ថានភាពនៃតម្រូវការជាសាកល។
របាយការណ៍ដដែល លើកឡើងថា ដើម្បីជួយធ្វើពិពិធកម្មសេដ្ឋកិច្ច ដែលកំពុងប្រមូលផ្តុំខ្លាំងនៅក្នុងវិស័យចំនួន ៤ ជាអាទិ៍វិស័យស្រូវ អង្ករ កាត់ដេរ ទេសចរណ៍ និងសំណង់ គឺប្រទេសកម្ពុជា អាចកសាងវិស័យកម្មន្តសាលរបស់ខ្លួន ដោយផ្តោតការយកចិត្តទុកដាក់លើផលិតផល ដែលមានស្រាប់ផង និងផលិតផលថ្មីៗ ជាសក្តានុពលផង ដូចជា ឧស្សាហកម្មផលិតគ្រឿងយន្ត លោហធាតុ សារធាតុគីមី គ្រឿងសង្ហារឹម កង់ និងស្បែកជើង ជាដើម។ ក្នុងនោះ ក៏កម្ពុជាអាចពង្រីកសេដ្ឋកិច្ច ក្នុងវិស័យកសិកម្ម កសិផលនានា ដូចជា ពោត បន្លែ ស្ករ ប្រេង ដូង និងក្តារបន្ទះ សុទ្ធតែជាផលិតផលដែលមានសក្តានុពល ផងដែរ។
តាម ADB ផលិតផលដែលមានគុណតម្លៃបន្ថែមខ្ពស់មួយចំនួន ក្នុងចំណោមផលិតផលទាំងនេះ បច្ចុប្បន្ន ត្រូវបាននាំចេញក្នុងបរិមាណតិចតួច ហើយនៅមានវិសាលភាព សម្រាប់ពង្រីកផលិតកម្មផលិតផលទាំងនេះ បន្ថែមទៀត។
លោកស្រី Cyn-Young Park អនុប្រធានក្រុមសេដ្ឋវិទូរបស់ ADB ដែលបានប្រកាសផ្សព្វផ្សាយរបាយការណ៍នេះ បានលើកឡើងថា “កំណើនសេដ្ឋកិច្ចរបស់កម្ពុជា ដែលមានកន្លងមក មានភាពរឹងមាំ និងឋិតឋេរ ក្នុងរយៈពេលច្រើនឆ្នាំ ហើយឥឡូវនេះ ប្រទេសកម្ពុជា ចាំបាច់ត្រូវផ្តោតសំខាន់លើការផលិតទំនិញ និងសេវាកម្ម ដែលមានលក្ខណៈទំនើប និងមានគុណតម្លៃខ្ពស់ជាងមុនបន្ថែមទៀត ដើម្បីបង្កលក្ខណៈឲ្យប្រទេសកម្ពុជា អាចទាញប្រយោជន៍ពីឱកាស ដែលផ្តល់ដោយសហគមន៍សេដ្ឋកិច្ចអាស៊ាន។ កម្ពុជា គួរផ្តល់អាទិភាពសំខាន់លើការកែលំអឲ្យកាន់តែប្រសើរឡើងនូវបរិយាកាសធុរកិច្ច និងការវិនិយោគលើធនធានមនុស្ស និងសេវាសាធារណៈ។
របាយការណ៍ ADB បង្ហាញថា ប្រទេសកម្ពុជា មានកំណើនផលិតផលក្នុងស្រុកសរុប ផសស ជាមធ្យមប្រចាំឆ្នាំ ៧,៦% ចាប់ពីឆ្នាំ១៩៩៥ ដល់ឆ្នាំ២០១៣។ កំណើនសេដ្ឋកិច្ចកម្ពុជា ពីរខ្ទង់ ក្នុងពេល ៤ ឆ្នាំ បន្តបន្ទាប់ បានពឹងផ្អែកខ្លាំងលើការនាំចេញសម្លៀកបំពាក់ និងការប្រមូលផលកសិកម្ម។ ប៉ុន្តែបើទោះបីជាកម្ពុជាមានកំណើនសេដ្ឋកិច្ចបែបនេះក៏ដោយ ក៏ADB លើកឡើងថា ប្រទេសកម្ពុជា នៅតែជាប្រទេសក្រីក្រជាងគេមួយ នៅទ្វីបអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ