ក្រុមសមាជិកសភាអាស៊ានរិះគន់ការបំភិតបំភ័យដើម្បីឲ្យពលរដ្ឋទៅបោះឆ្នោតរបស់អាជ្ញាធរកម្ពុជា
ក្រុមសមាជិកសភាអាស៊ានដើម្បីសិទ្ធិមនុស្ស(APHR)នៅថ្ងៃទី១២ មិថុនានេះ បានចេញមុខរិះគន់ចំពោះការបំភិតបំភ័យដល់ពលរដ្ឋខ្មែរដែលពួកគេអះអាងថាធ្វើឡើងដោយអាជ្ញាធរកម្ពុជា ដើម្បីជំរុញឲ្យពលរដ្ឋទៅបោះឆ្នោតនាពេលខាងមុខ។ អ្នកនាំពាក្យគណបក្សកាន់អំណាចមិនភ្ញាក់ផ្អើលនឹងការរិះគន់នេះទេ ដោយអះអាងថា ក្រុមសមាជិកសភាអាស៊ាននេះ ជាក្រុមលម្អៀងទៅរកអតីតបក្សប្រឆាំង។ តែទោះជាបែបនេះក្តី លោកសុខ ឥសាន បានបញ្ជាក់ថាអ្វីដែលរដ្ឋាភិបាលបានធ្វើនាពេលកន្លងមក មិនមែនជាការបំភិតបំភ័យអ្វីឡើយ។
ចុះផ្សាយនៅថ្ងៃ៖
ស្តាប់ - ០២:៥៤
តាមរយៈសេចក្តីថ្លែងការណ៍នៅថ្ងៃអង្គារនេះ ក្រុមសមាជិកសភាអាស៊ានដើម្បីសិទ្ធិមនុស្សបានលើកឡើងពីការព្រួយបារម្ភយ៉ាងខ្លាំងទៅនឹងសេចក្តីរាយការណ៍នានាស្តីពីការបំភិតបំភ័យ និងវិធានការបង្រ្កាបដែលធ្វើឡើងដោយអាជ្ញាធរកម្ពុជា ដើម្បីធានាថា ប្រជាពលរដ្ឋខ្មែរជាច្រើននឹងចេញទៅបោះឆ្នោតនៅថ្ងៃទី២៩ ខែកក្កដា ខាងមុខនេះ។ ក្រុមសមាជិកសភាអាស៊ានបានចាត់ទុកទង្វើរបស់អាជ្ញាធរកម្ពុជានេះថា បានធ្វើឲ្យអន្តរាយដល់ភាពស្របច្បាប់នៃការបោះឆ្នោត និងថា ជម្រើសរបស់ពលរដ្ឋក្នុងការទៅឬក៏មិនទៅបោះឆ្នោតនោះត្រូវតែទទួលបានការគោរព។
សូមកត់សម្គាល់ថា អ្វីដែលធ្វើឲ្យក្រុមសមាជិកសភាអាស៊ានដើម្បីសិទ្ធិមនុស្សចាត់ទុកថាអាជ្ញាធរកម្ពុជាបានបំភិតបំភ័យដល់ប្រជាពលរដ្ឋនោះ គឺកាលពីថ្ងៃទី៤ មិថុនាកន្លងទៅ រដ្ឋាភិបាលកម្ពុជាបានប្រកាសបង្កើតក្រុមការងារអន្តរក្រសួងដែលនឹងឃ្លាំមើល និងគ្រប់គ្រងការផ្សព្វផ្សាយតាមអនឡាញដើម្បីការងារការធ្វើឲ្យអន្តរាយដល់សន្តិសុខជាតិ តួយ៉ាងដូចការផ្សព្វផ្សាយលើបណ្តាញសង្គមដោយអំពាវនាវកុំឲ្យពលរដ្ឋទៅបោះឆ្នោតជាដើម។ បន្ថែមលើនេះ កាលខែមុន មន្រ្តីជាន់គណបក្សកាន់អំណាចមួយរូបបាននិយាយជាសាធារណៈថា បុគ្គលណាដែលមិនមានស្នាមប្រឡាក់ទឹកខ្មៅលើម្រាមដៃនឹងត្រូវសម្គាល់ថា ជាជនឧទ្ទាម និងជាជនក្បត់ជាតិ។ នេះបើតាមការអះអាងរបស់ក្រុមសមាជិកសភាអាស៊ានដើម្បីសិទ្ធិមនុស្ស។
លោកCharles Santiago ប្រធានក្រុមសមាជិកសភាអាស៊ានដើម្បីសិទ្ធិមនុស្សបានអះអាងថា ទង្វើរបស់រដ្ឋាភិបាលកម្ពុជានេះកាន់តែបង្ហាញច្បាស់ទៅតាមការព្រួយបារម្ភអំពីភាពស្របច្បាប់នៃការបោះឆ្នោត។ លោកបានបន្ថែមទៀតថា វានឹងប៉ះពាល់ដល់អ្វីដែលរដ្ឋាភិបាលកម្ពុជាលើកឡើងថាការបោះឆ្នោតខាងមុខនឹងឆ្លុះបញ្ចាំងពីឆន្ទៈពិតប្រាកដរបស់ពលរដ្ឋ។ សម្រាប់ប្រធានក្រុមសមាជិកសភាអាស៊ានដើម្បីសិទ្ធិមនុស្ស បរិយាកាសនៃគំរាមកំហែងនេះបានបង្កើតឲ្យមានការសង្ស័យលើការបោះឆ្នោតរួចទៅហើយថា មានភាពសេរីតិចតួច។
ក៏ប៉ុន្តែ លោកសុខ ឥសាន ដែលជាអ្នកនាំពាក្យគណបក្សកាន់អំណាចហាក់មិនភ្ញាក់ផ្អើលនឹងការលើកឡើងរបស់ក្រុមសមាជិកសភាអាស៊ានដើម្បីសិទ្ធិមនុស្សនេះទេ។ មិនភ្ញាក់ផ្អើលដោយសារតែលោកចាត់ទុកថាក្រុមសមាជិកសភាអាស៊ានដើម្បីសិទ្ធិមនុស្សមានភាពលម្អៀងទៅរកអតីតបក្សប្រឆាំង។ សម្រាប់លោកសុខ ឥសាន អ្វីដែលរដ្ឋាភិបាលកម្ពុជាបានធ្វើ គឺក្នុងគោលបំណងការពារសន្តិសុខជាតិ និង ធ្វើតាមព្រះរាជសាររបស់ព្រះមហាក្សត្រកម្ពុជាដែលជំរុញឲ្យពលរដ្ឋខ្មែរទៅបោះឆ្នោតឲ្យបានគ្រប់គ្នាៗតែប៉ុណ្ណោះ។
ក៏ប៉ុន្តែលោកCharles Santiago បានអះអាងថា នៅពេលនេះ រដ្ឋាភិបាលកម្ពុជាកំពុងតែបដិសេធសិទ្ធិជាមូលដ្ឋានរបស់ពលរដ្ឋកម្ពុជាក្នុងការបញ្ចេញទស្សនៈនយោបាយ និងចូលរួមក្នុងដំណើរការលទ្ធិប្រជាធិបតេយ្យដោយគ្មានការភ័យខ្លាច។ យ៉ាងណាក៏ដោយ ក្រៅពីបញ្ហានេះ ក្រុមសមាជិកសភាអាស៊ានដើម្បីសិទ្ធិមនុស្សក៏បានអះអាងដែរថា អវត្តមានអតីតបក្សប្រឆាំងគឺជាការរារាំងដំណើរការបោះឆ្នោតពីភាពយុត្តិធម៌ឬក៏អាចទុកចិត្តបាន។ ដូច្នេះហើយពួកគេបានអំពាវនាវជាថ្មីឲ្យដំណើរការបក្សនេះឡើងវិញ និងដោះលែងលោកកឹម សុខាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ