គណៈកម្មការទី១រដ្ឋសភា ស្នើក្រសួងរៀបចំដែនដី ដោះលែងអ្នកជាប់ឃុំដោយសាររឿងដីធ្លី ៣នាក់
បន្ទាប់ពីបានទទួលការបំភ្លឺពីទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម រយៈពេលប្រមាណ ៣ម៉ោង នៅក្នុងវិមានរដ្ឋសភា នាព្រឹកថ្ងៃ ទី១០កញ្ញានេះរួចមក ប្រធានគណៈកម្មការទី១រដ្ឋសភា បានស្នើសុំឲ្យក្រសួងនេះ មានអន្តរាគម ដោះលែងពលរដ្ឋ ៣នាក់ ដែលកំពុងជាប់ឃុំនៅក្នុងពន្ធនាគារ ដោយសារបញ្ហាដីធ្លី។ យ៉ាងណាក៏ដោយ ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី លោកអ៊ឹម ឈុនលឹម បានបញ្ជាក់ថា នឹងពិចារណា ពិភាក្សាពីក្របខណ្ឌច្បាប់ ជាមួយសមត្ថកិច្ចជាមុនសិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា ដែលមានលោកអេង ឆៃអ៊ាង ជាប្រធាន នៅថ្ងៃទី ១០កញ្ញា បានកោះហៅលោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចូលបំភ្លឺចំពោះគណកម្មការទី១នៃរដ្ឋសភា អំពីលទ្ធផលនៃការដោះស្រាយទំនាស់ដីធ្លី ដែលទាក់ទងនឹងវិស័យទទួលខុសត្រូវរបស់ក្រសួង។
ហើយក្រោយពីការបំភ្លឺ ប្រមាណជា ៣ម៉ោង នៅវិមានរដ្ឋសភារួចមក ប្រធានគណៈកម្មការទី១ លោកអេង ឆៃអ៊ាង បានស្នើសុំឲ្យក្រសួងដែនដី ជួយអន្តរាគមន៍ដោះលែងពលរដ្ឋ ៣នាក់ ដែលកំពុងជាប់ពន្ធនាគារ ដោយសារបញ្ហាដីធ្លី។ ពលរដ្ឋទាំង៣នាក់ ដែល ២នាក់ មានជម្លោះដីធ្លី ក្នុងខេត្តកំពត និងម្នាក់ទៀត នៅរាជធានីភ្នំពេញ។ យ៉ាងណាក៏ដោយ លោកអ៊ឹម ឈុនលឹម បានតបវិញថា ចំពោះអន្តរាគមន៍ដោះលែង គឺត្រូវពិភាក្សា និងពិនិត្យមើល ទៅតាមផ្លូវច្បាប់ជាមុនសិន។
ក្រៅពីបញ្ហានេះ ក្រសួងដែនដី ក៏បានបង្ហាញពីកិច្ចការរយៈពេលកន្លងមក ដូចជាការចុះបញ្ជីដីធ្លី ការបែងចែកដីជូនពលរដ្ឋ និងលទ្ធផលការងារសម្បទានដីសង្គមកិច្ច ប្រាប់ដល់គណៈកម្មការទី១នៃរដ្ឋសភាផងដែរ។ ក្នុងនោះ រដ្ឋមន្ត្រីក្រសួងដែនដី បញ្ជាក់ថា កន្លងមកក្រសួង បានចេញបណ្ណកម្មសិទ្ធិជូនពលរដ្ឋ បានចំនួនជាង ៤លានប័ណ្ណ ដែលស្មើនឹងប្រមាណ ៥៧ភាគរយ នៃគោលការណ៍សរុប។
ក្រសួងដែនដី អះអាងបន្តថា ចំពោះលទ្ធផលដីសម្បទានសង្គមកិច្ច គឺក្រសួង រួមជាមួយនឹងធនាគារពិភពលោក និងអង្គការនៃប្រទេសអាល្លឺម៉ង់ កំពុងតែធ្វើការងាររួមគ្នា។ ដោយឡែក ចំពោះបញ្ហាទំនាស់ដីធ្លីវិញ ក្រសួង ក៏បញ្ជាក់ថា បាននិងកំពុងដោះស្រាយទៅតាមសមត្ថកិច្ចនៃក្រុមការងារជំនាញផងដែរ។ តាមក្រសួងដែនដី នគរូបនីយកម្ម និងសំណង់ តាំងពីឆ្នាំ ២០០៣មក ក្រសួង បានដោះស្រាយជម្លោះដីធ្លី បានជាង ៣ពាន់ករណី ក្នុងចំណោមករណីបណ្តឹងជាង ៧ពាន់ករណី។ ហើយករណីដែលនៅសេសសល់មកដល់ពេលនេះ មានប្រហែល ៧០០ករណី។
ក្រោយពីការចូលបំភ្លឺ និងសន្និសីទកាសែតរួមរួចមក ប្រធានគណកម្មការទី១នៃរដ្ឋសភា នឹងយកព័ត៌មាន និងគោលដៅ ដែលក្រសួងដែនដី បានធ្វើទាំងនោះ ទៅប្រាប់ដល់ប្រជាពលរដ្ឋដើមបណ្តឹង ដែលបានដាក់ញ្ញត្តិមកកាន់សភា ក្នុងបញ្ហាវិវាទដីធ្លីទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ