ជនភៀសខ្លួន៖ ក្រសួងមហាផ្ទៃមិនដែលទទួលបានជំនួយពីរដ្ឋាភិបាលអូស្រ្តាលី
មន្ត្រីជាន់ខ្ពស់បានអះអាងជាលើកដំបូងថា ក្រសួងមហាផ្ទៃ ដែលជាអ្នកអនុវត្តដោយផ្ទាល់នូវកិច្ចព្រមព្រៀងក្នុងការទទួលយកជនភៀសខ្លួនពីកោះណេរុ Nauru ប្រទេស អូស្ត្រាលី មិនដែលទទួលបានជំនួយពីរដ្ឋាភិបាលអូស្ត្រាលី ដូចការលើកឡើង ដែលថា កម្ពុជាព្រមទទួលជនភៀសខ្លួនជាថ្នូរជាមួយទឹកប្រាក់ ៤០លានដុល្លារនោះទេ។ ការប្រកាសរបស់មន្ត្រីកម្ពុជាយ៉ាងដូច្នេះស្របពេលមានការលើកឡើងថា កម្មវិធីបញ្ជូនជនភៀសខ្លួនពីប្រទេសអូស្ត្រាលីមកកាន់កម្ពុជាទទួលបរាជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
-----សំឡេង------
លោក ខៀវ សុភ័គ អ្នកនាំពាក្យក្រសួងមហាផ្ទៃបានគូសបញ្ជាក់ថា កិច្ចព្រមព្រៀងស្ដីពីជនភៀសខ្លួនរវាងកម្ពុជា និងអូស្រ្តាលី គ្មានភាពល្អកកករនោះទេ បើទោះបីជានៅពេលនេះរដ្ឋាភិបាលកម្ពុជានៅមិនទាន់ទទួលបានជំនួយផ្លូវការពីភាគីអូស្ត្រាលីក៏ដោយ។ ភាគីទាំងពីរ ដែលបានចុះកិច្ចសន្យារួម កាលពីជាងមួយឆ្នាំមុន ជាមួយទឹកប្រាក់ច្រើនលានដុល្លារជាថ្នូរនឹងការទទួលយកជនភៀសខ្លួននេះ។
សូមបញ្ជាក់ថា បន្ទាប់ពីចុះកិច្ចព្រមព្រៀង ជនភៀសបួននាក់បានសម្រេចមករស់នៅកម្ពុជាតាមគោលការណ៍ស្ម័គ្រចិត្ត។ ក្នុងនោះជនជាតិរ៉ូហ៊ីងយ៉ាម្នាក់ និងជនជាតិអ៊ីរ៉ងពីរនាក់ទៀត ក៏បានត្រឡប់ទៅរស់នៅប្រទេសកំណើតរបស់ពួកគេវិញ ក្រោយការរស់នៅបានមួយរយៈ។
ហើយរហូតដល់ពេលនៅសល់តែជនភៀសខ្លួនម្នាក់ប៉ុណ្ណោះកំពុងរស់នៅកម្ពុជា។ ជនភៀសខ្លួន ដែលនៅសល់រូបនេះ ក៏បំរុងនឹងធ្វើដំណើរត្រឡប់ទៅកាន់អ៊ីរ៉ងវិញ ដែលជាប្រទេសកំណើត នៅពីរបីខែខាងមុខទៀត។ នេះបើយោងតាមការចុះផ្សាយរបស់សារព័ត៌មានអូស្ត្រាលី។
សារព័ត៌មាននេះក៏បានបង្ហើបឲ្យដឹងថា រដ្ឋាភិបាលកម្ពុជា បំរុងបង្កើតមជ្ឈមណ្ឌលជនភៀសខ្លួនមួយរស់នៅកម្ពុជា ដែលគ្រប់គ្រងដោយស្ថានទូតអូស្ត្រាលី តែមន្ត្រីកម្ពុជាមិនបាននិយាយឲ្យចំ ថាដំណើរការនេះនឹងចាប់ផ្ដើមនៅពេលណានោះទេ។ លោក ខៀវ សុភ័គ បានអះអាងថា ជាគោលការណ៍របស់ជនភៀសខ្លួនបួននាក់នោះ កម្ពុជាមិនមែនជាគោលដៅសម្រាប់ការរស់នៅរបស់ពួកគេនោះទេ គឺបំណងពួកគេចង់ទៅរស់នៅប្រទេសអូស្ត្រាលី
បច្ចុប្បន្នភាពនៃជនភៀសខ្លួន លោក ខៀវ សុភ័គ បញ្ជាក់ថា នៅមិនទាន់មានអ្នកថ្មី ដែលចង់មករស់នៅកម្ពុជានៅឡើយទេ។ តែលោកថា ក្នុងន័យនេះ មិនមែនកម្ពុជាជួបបញ្ហា ឬបរាជ័យនោះទេ គឺគ្រប់យ៉ាងអាស្រ័យលើការស្ម័គ្រចិត្តរបស់ជនភៀសខ្លួនទាំងនោះ។ ម្យ៉ាងទៀតកិច្ចព្រមព្រៀងនៃប្រទេសទាំងពីរកំពុងនៅជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ