បញ្ជូនជនភៀសខ្លួនអូស្ត្រាលីមកកម្ពុជា៖ ទីក្រុងកង់បេរ៉ាផ្ដល់ថវិកាបន្ថែម១២លានដុល្លារ
អូស្ត្រាលីនឹងផ្ដល់ថវិកាបន្ថែមប្រមាណ១២លានដុល្លារ ទៅលើជំនួយដែលបានព្រមព្រៀងស្រាប់ចំនួន៣១,២លានដុល្លារ ទាក់ទងនឹងការបញ្ជូនជនភៀសខ្លួនអូស្ត្រាលីមកកម្ពុជា។ ជំនួយហិរញ្ញវត្ថុបន្ថែមថ្មីនេះ ត្រូវបានពិភាក្សានៅក្នុងការប្រជុំរបស់គណៈកម្មាធិការព្រឹទ្ធសភាអូស្ត្រាលី កាលពីថ្ងៃអង្គារម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ជំនួយហិរញ្ញវត្ថុបន្ថែមចំនួន១២,១លានដុល្លារអាមេរិក នឹងត្រូវប្រើប្រាស់សម្រាប់គាំទ្រដល់ការតាំងទីលំនៅរបស់ជនភៀសខ្លួនអូស្ត្រាលី នៅកម្ពុជា ដែលក្នុងនោះ រួមមានបញ្ហាសុខភាព ការអប់រំ និងការបណ្ដុះបណ្ដាល។ អ្នកនាំពាក្យនៃនាយកដ្ឋានអន្តោប្រវេសន៍អូស្ត្រាលី បានឲ្យដឹងនៅថ្ងៃអង្គារ ទី២៦ឧសភាថា ថវិកា១២,១លានដុល្លារថ្មីនេះ នឹងត្រូវបន្ថែមទៅលើជំនួយដែលបានព្រមព្រៀងស្រាប់ចំនួន៣១,២លានដុល្លារ ដើម្បីបញ្ជូនជនភៀសខ្លួនអូស្ត្រាលីមកកម្ពុជា។
គម្រោងថវិកាប្រចាំឆ្នាំរបស់អូស្ត្រាលី ដែលបានប្រកាសកាលពីពេលកន្លងទៅថ្មីៗនេះបង្ហាញឲ្យឃើញថា អូស្ត្រាលីនឹងកាត់បន្ថយជំនួយទៅកាន់ប្រទេសជិតខាងកម្ពុជាជាច្រើន ប៉ុន្តែជំនួយដ៏ច្រើនមកកាន់ប្រទេសកម្ពុជា មិនត្រូវបានប៉ះពាល់ ឬផ្លាស់ប្ដូរនោះ ទេ។
ទោះជាយ៉ាងណាក៏ដោយ កន្លងមក រាជរដ្ឋាភិបាលកម្ពុជាធ្លាប់បានអះអាងថា ការទទួលជនភៀសខ្លួនទាំងនោះ គឺស្របតាមច្បាប់អន្ដរជាតិ និងផ្អែកទៅលើគោលការណ៍ស្ម័គ្រចិត្តតែប៉ុណ្ណោះ។ បើតាមរដ្ឋាភិបាលកម្ពុជា ការសម្រេចទទួលយកជនភៀសខ្លួនអូស្ត្រាលីមកកម្ពុជានេះ មិនមែនជាថ្នូរនឹងថវិកាជាង៣០លានដុល្លារនោះទេ។ ថវិកាជាង៣០លានដុល្លារនោះ ត្រូវបានអូស្ត្រាលីបន្ថែមលើគម្រោងជំនួយអភិវឌ្ឍប្រចាំឆ្នាំ ដើម្បីជួយកម្ពុជាលើកំណែទម្រង់ការបោះឆ្នោត ផលិតកម្មស្រូវអង្ករ និងការដោះមីនប៉ុណ្ណោះ។
សូមរំលឹកជូនថា រហូតមកទល់ពេលនេះ មានជនភៀសខ្លួនតែ៤នាក់ប៉ុណ្ណោះ ដែលយល់ព្រមមកតាំងទីលំនៅថ្មីនៅកម្ពុជា ដែលក្នុងនោះ៣នាក់ជាជនជាតិអ៊ីរ៉ង់ និងម្នាក់ទៀតជាជនជាតិរ៉ូហ៊ីងយ៉ា។ កាលបរិច្ឆេទនៃការបញ្ជូនជនភៀសខ្លួនទាំង៤នាក់នោះមកកាន់កម្ពុជា មិនទាន់ត្រូវបានកំណត់ច្បាស់លាស់នៅឡើយទេ។ ក៏ប៉ុន្តែមន្ដ្រីជាន់ខ្ពស់ទទួលបន្ទុកការងារជនភៀសខ្លួនពីអូស្ត្រាលីមកកម្ពុជា ធ្លាប់បានអះអាងប្រាប់អ្នកកាសែតថា ជំហានដំបូង ជនភៀសខ្លួនទាំងនោះ អាចរស់នៅបណ្ដោះអាសន្ននៅក្នុងទីក្រុងភ្នំពេញ មុននឹងបញ្ជូនទៅកាន់មណ្ឌលរស់នៅក្រៅក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ